Священномученикам Ермолаю, Ермиппу и Ермократу иереем Никомидийским (тропари и кондак)
Тропарь священномученику Ермолаю, глас 1:
Ми́ром благода́ти пома́зан, / преблаже́нне о́тче Ермола́е, / иере́й Бо́га Вы́шняго яви́лся еси́ / и благоче́стия све́тлый пропове́дник, / му́ченик же тве́рдый и безме́здный врач притека́ющих к тебе́. / Сла́ва Да́вшему тебе́ кре́пость, / сла́ва Венча́вшему тя, // сла́ва Де́йствующему тобо́ю всем исцеле́ния.
Ин тропарь святым, глас 8:
Тро́ицы провозве́стницы, / тро́ице му́чеников честна́я, / и́дольское нече́стие обличи́вшии / и тьмочи́сленнаго врага́ сокруши́вшии, / ны́не, со Христо́м ца́рствующе, моли́те, / свяще́нный Ермола́е со Ерми́ппом и Ермокра́том сла́вным, / я́ко да и на́ша враги́ победи́м / и прии́мем от Царя́ всех, Бо́га, ве́чный живо́т // и вене́ц нетле́нный.
Ин тропарь святым общий, глас 4:
Му́ченицы Твои́, Го́споди, / во страда́ниих свои́х венцы́ прия́ша нетле́нныя от Тебе́, Бо́га на́шего: / иму́ще бо кре́пость Твою́, / мучи́телей низложи́ша, / сокруши́ша и де́монов немощны́я де́рзости. / Тех моли́твами // спаси́ ду́ши на́ша.
Кондак священномученику Ермолаю, глас 4:
Я́ко святи́тель благоче́стно пожи́в / и священномуче́ния вене́ц прия́л еси́. / И́дольския же́ртвы погаси́в, / до́брый па́стырь Христо́ва ста́да был еси́, прему́дре, / и Пантелеи́мону и́стинный учи́тель. / Сего́ ра́ди почита́ем тя пе́сньми, вопию́ще: // от бед изба́ви нас при́сно моли́твами твои́ми, Ермола́е, о́тче наш.
Назад к списку
