Преподобномученицам Елисавете, великой княгине и инокине Варваре (тропари, кондаки, молитвы и величание)

Тропарь, глас 1:

Смире́нием досто́инство кня́жеское сокры́вши, / богому́драя Елисаве́то, / сугу́бым служе́нием Ма́рфы и Мари́и / Христа́ почти́ла еси́. / Милосе́рдием, терпе́нием и любо́вию себе́ предочи́стивши, / я́ко же́ртва пра́ведная Бо́гу принесла́ся еси́. / Мы же, чту́ще доброде́тельное житие́ и страда́ния твоя́, / я́ко и́стинную наста́вницу усе́рдно про́сим тя: / свята́я му́ченице вели́кая княги́не Елисаве́то, // моли́ Христа́ Бо́га спасти́ и просвети́ти ду́ши на́ша.

Кондак, глас 2:

Вели́чие по́двига ве́ры кто пове́сть:/ во про́пасти земне́й све́том небе́сным осия́нная,/ страстоте́рпица вели́кая княги́ня Елисаве́та/ со А́нгелы во псалме́х и пе́ниих ра́довашеся/ и, убие́ние претерпева́ющи,/ о безбо́жных мучи́телех взыва́ше:/ Го́споди, прости́ им грех сей,/ не ве́дят бо, что творя́т./ Тоя́ моли́твами, Христе́ Бо́же, // поми́луй и спаси́ ду́ши на́ша.

Молитва

О, вели́кая княги́не, свята́я преподобному́ченице Елисаве́то, оте́чества на́шего похвало́, гра́да Москвы́ пресла́вное украше́ние и Святы́я Земли́ свяще́нное достоя́ние! Ты во дни жития́ твоего́ ве́ру, наде́жду, любо́вь нело́жно стяжа́вши, милосе́рдием к стра́ждущим све́тло просия́ла еси́. Терпе́нием же скорбе́й и искуше́ний о́браз смире́ния бли́жним яви́вши, изгна́нием и муче́нием житие́ увенча́ла еси́ и во Ца́рствии Небе́снем с преподобному́ченицею Варва́рою ны́не пребыва́еши. Сего́ ра́ди мо́лим вас, страстоте́рпицы святы́я, моли́твами ва́шими да́руйте нам се́рдце смире́нное и покая́нное, милосе́рдие неоскудева́ющее, служе́ние бли́жним же́ртвенное, терпе́ние непоколе́блемое, му́жество в скорбе́х и обстоя́ниих неослабева́ющее, в стра́шный же час сме́ртный упова́ние тве́рдое на Го́спода на́шего Иису́са Христа́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и со Пресвяты́м Благи́м и Животворя́щим Его́ Ду́хом ны́не и при́сно и во ве́ки веко́в. Ами́нь.

Величание

Велича́ем тя,/ свята́я преподобному́ченице вели́кая княги́не Елисаве́то,/ и чтим честна́я страда́ния твоя́,/ я́же за Христа́ // претерпе́ла еси́.

Тексты тропаря, кондака, молитвы и величания утверждены (в составе службы) к общецерковному богослужебному употреблению на заседании Священного Синода 29 декабря 2022 года (журнал № 130).

Ин тропарь, глас 2:

В красоте́ земне́й красоту́ Небе́сную показа́ла еси́, свята́я преподобому́ченица Елисаве́то, и жена́м-мироно́сицам Мари́и и Ма́рфе подража́ла еси́, в служе́нии Бо́гу и лю́дем стра́ждущим. Те́мже просла́ви тя Христо́с Бог, я́ко еди́ну от святы́х жен росси́йских, да́рующих нам мир и ве́лию ми́лость.

Ин тропарь, глас 4:

Страстоте́рпица преподо́бная Варва́ро, в напа́стех с наста́вницей свое́ю да́же до сме́рти пребы́вшая, Христо́во бо Ева́нгелие испо́лнив, положи́ла еси́ ду́шу свою́ за дру́ги своя́. Ны́не же предстоя́ с собо́ром святы́х жен росси́йских, моли́ оставле́ние грехо́в дарова́ти чту́щим любо́вию святу́ю па́мять твою́.

Ин тропарь, глас 4:

Кро́тость и смире́ние и любо́вь всели́вши в ду́шу свою́, усе́рдно послужи́ла еси́ стра́ждущим, страстоте́рпице свята́я княги́не Елисаве́то, та́же с ве́рою претерпе́ла еси́ страда́ния и смерть за Христа́, с му́ченицею Варва́рою. С не́ю же моли́ о всех с любо́вию почита́ющих вас.

Ин кондак, глас 5:

От сла́вы ца́рственныя, взе́мши Крест Христо́в, прешла́ еси́ к сла́ве Небе́сней, моля́щи за враго́в, и обрела́ еси́ ра́дость ве́чную, свята́я му́ченице княги́не Елисаве́то, с Варва́рою му́ченицею. Те́мже мо́лим вас: моли́те о душа́х на́ших.

Ин кондак, глас 4:

Воспое́м днесь сла́ву святы́м новому́ченицам Росси́йским, благове́рной княги́не Елисаве́те с Варва́рою ве́рною, в Гефсимани́йстей ве́си погребе́нным, о́браз бо нам показа́вшим му́жества духо́внаго во испове́дании ве́ры Правосла́вныя. Те́мже мо́лим вас, моли́теся Христу́ Бо́гу, да изведе́т на жа́тву де́латели Своя́, просвети́ти све́том и́стинныя ве́ры страну́ ея́же возлюби́ли есте́, и спасе́т ду́ши на́ша.

Молитва

О святы́я новому́ченицы Росси́йския, вели́кая княги́не Елисаве́то и сестро́ ея́ кресто́вая пречестна́я иноки́не Варва́ро, ку́пно путь свой во мно́зех му́ках сконча́вшия, Ева́нгельския за́поведи де́лом во Оби́тели милосе́рдия соверши́вшия, ве́ры ра́ди Правосла́вныя подвиза́ющися до сме́рти в после́дняя времена́ сия́, и до́брый плод в терпе́нии страсте́й Христу́ прине́сшия! Моли́теся Ему́, я́ко победи́телю сме́рти, да утверди́т Це́рковь Ру́сскую Правосла́вную и оте́чество на́ше, кро́вию и страда́ньми новому́чеников искупле́нныя, и не даст в расхище́ние враго́м Росси́и достоя́ния на́шего. Се бо лука́вый враг вооружи́ся на ны, хотя́ нас погуби́ти в междоусо́бных бране́х, ско́рбех, нестерпи́мых печа́лех, боле́знех, ну́ждах и беда́х лю́тых. Умоли́те Го́спода низложи́ти вся немощны́я де́рзости их; ве́ру в сердца́х люде́й росси́йских укрепи́те, да егда́ на́йдет на ны испыта́ния час, му́жества дар восприи́мем ва́шими моли́твами, отве́ргшеся себе́ и взе́мше крест свой, после́дуем Христу́, распина́юще плоть свою́ со страстьми́ и похотьми́. Сохрани́те нас от вся́каго зла, освяти́те пути́ жи́зни на́шея, да́руйте покая́ние нелицеме́рное, тишину́ и мир душа́м на́шим, испроси́те у Го́спода всем нам мыта́рств го́рьких и ве́чныя му́ки изба́витися и Небе́сному Ца́рствию насле́дники бы́ти со все́ми святы́ми, от ве́ка угоди́вшими Бо́гу, да ра́дующеся воздади́м хвалу́, честь и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.