Священномученику Петру (Полянскому), митрополиту Крутицкому (тропарь, кондак, молитвы и величание)

Тропарь, глас 2:

Бо́жиим смотре́нием к святи́тельскому служе́нию/ святы́м Патриа́рхом Ти́хоном призва́нный,/ ста́ду Христо́ву яви́лся еси́ стра́ж неусы́пный/ и защи́тник небоя́зненный,/ священному́чениче Пе́тре./ Жесто́кая заточе́ния и да́льная изгна́ния,/ страда́ния и сме́рть от богобо́рцев претерпе́л еси́./ Вене́ц му́ченический прие́м,/ на Небеси́ ны́не ра́дуешися./ Моли́ ми́лостиваго Бо́га,/ да сохрани́т Це́рковь на́шу от нестрое́ний,/ единомы́слие и мир лю́дем Свои́м да́рует// и спасе́т ду́ши на́ша.

Кондак, глас 7:

Ско́рби, труды́ и боле́зни,/ суд безбо́жный и неми́лостивый/ претерпе́л еси́, первосвяти́телю Пе́тре,/ оба́че сих не устраши́лся еси́,/ Еди́ному Судии́ ве́рен пребыва́я,/ Тому́ ны́не предстоя́й, о нас моли́ся, // прославля́ющих любо́вию па́мять твою́.

Молитва

О, святы́й священному́чениче Пе́тре, святи́телю сла́вный земли́ Ру́сския, архиере́йство, я́ко ча́шу сме́ртную, прие́мый и престо́л патриа́рший до́бре соблюды́й, ве́рою вся претерпе́вый и смире́нием благода́ть ве́лию стяжа́вый! Ку́ю похвалу́ воздади́м ти язы́ком худы́м? Во гресе́х и не́мощех су́ще, ка́ко дерзне́м призыва́ти тя? Оба́че ве́мы, я́ко со все́ми святы́ми земли́ на́шея, наипа́че же со святы́м Патриа́рхом Ти́хоном, не престая́, мо́лишися у Престо́ла Пресвяты́я Тро́ицы о Це́ркви Ру́сской, да сохрани́т ю́ Госпо́дь от вся́каго зла́ и искуше́ния, да пра́во пра́вят сло́во и́стины архипа́стыри и па́стыри ея́, да не изся́кает ве́ра в сердца́х людски́х, да в сове́те мно́зе разреша́ется вся́кое нестрое́ние и вся любо́вию всем да быва́ет! О, пресла́вный страда́льче! Ты, я́ко оте́ц чадолюби́вый, ве́си вся потре́бная нам, сего́ ра́ди еди́наго взыску́ем: тебе́ подража́тели бы́ти, я́коже и ты Христу́, да крест свой прии́мше, я́ко бре́мя благо́е и ле́гкое, путе́м у́зким ше́ствуем и та́ко оби́телей Небе́сных дости́гнем, иде́же вку́пе с тобо́ю и все́ми святы́ми сподо́бимся прославля́ти пречестно́е и великоле́пое и́мя Отца́ и Сы́на и Свята́го Ду́ха в безконе́чныя ве́ки. Ами́нь.

Величание

Велича́ем тя,/ священному́чениче Пе́тре,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия // претерпе́л еси́.

Тексты тропаря, кондака, молитвы и величания утверждены в составе службы на заседании Священного Синода 25 августа 2022 года (журнал № 78).

Ин кондак, глас 4:

Дух ми́рен и кро́ток стяжа́в,/ тве́рдое упова́ние на милосе́рдие Бо́жие име́я,/ блюсти́тель ве́рный Це́ркве Росси́йския/ и испове́дник Христо́в яви́лся еси́,/ священному́чениче Пе́тре,/ при́сный о нас пред Бо́гом предста́телю// и моли́твенниче о душа́х на́ших.

Молитва

О, святы́й священному́чениче Пе́тре, святи́телю сла́вный земли́ Ру́сския, архиере́йство, я́ко крест в годи́ну лю́тых испыта́ний, прие́мый, ча́шу го́рькую страда́ний испи́вый, и престо́л патриа́рший до́бре соблюды́й, ве́рою вся претерпе́вый и смире́нием благода́ть ве́лию стяжа́вый! Ку́ю похвалу́ воздади́м ти? И как, во гресе́х и не́мощех су́ще, дерзне́м призыва́ти тя? Оба́че ве́мы, я́ко со все́ми святы́ми земли́ на́шея, наипа́че же со святы́м Патриа́рхом Ти́хоном, не престая́, мо́лишися у Престо́ла Пресвяты́я Тро́ицы о Це́ркви Ру́сской, да сохрани́т ю́ Госпо́дь от вся́каго зла и искуше́ния, да пра́во пра́вят сло́во и́стины архипа́стыри и па́стыри ея́, да не изсяка́ет ве́ра в сердца́х людски́х, да в сове́те мно́зе разреша́ется вся́кое нестрое́ние и вся любо́вию всем да быва́ет! О, пресла́вный страда́льче! Ты, я́ко оте́ц чадолюби́вый, ве́си вся потре́бная нам, сего́ ра́ди еди́наго взыску́ем: тебе́ подража́тели бы́ти, я́коже и ты Христу́, да крест свой прии́мше, я́ко бре́мя благо́е и ле́гкое, путе́м у́зким ше́ствуем и та́ко оби́телей Небе́сных дости́гнем, иде́же вку́пе с тобо́ю и все́ми святы́ми сподо́бимся прославля́ти пречестно́е и великоле́пое и́мя Отца́ и Сы́на и Свята́го Ду́ха в безконе́чныя ве́ки. Ами́нь.

Текст молитвы священномученику Петру, митрополиту Крутицкому, утвержден к общецерковному богослужебному употреблению решением Священного Синода от 17 июня 2021 года (журнал № 34).