Великомученику Иоанну Новому, Сочавскому (тропарь, кондак, молитвы и величание)
Тропарь, глас 4:
Житие́ на земли́ до́бре окормля́я, страда́льче,/ ми́лостынями, и ча́стыми моли́твами, и слеза́ми,/ па́ки же ко страда́нию му́жески устреми́вся,/ пе́рсское обличи́л еси́ нече́стие./ Те́мже Це́ркве был еси́ утвержде́ние/ и христиа́н похвало́,// Иоа́нне приснопа́мятне.
Кондак, глас 4:
Морску́ю пла́вая пучи́ну ку́плею,/ от восто́ка тща́лся еси́ к се́веру,/ но Бо́гу призва́вшу тя,/ я́коже Матфе́й мы́тницу, ты же ку́плю оста́вль/ и Тому́ после́довал еси́ кро́вию му́чения,/ вре́менными искупи́в непроходи́мая,// и вене́ц прия́л еси́ непобеди́мый.
Молитва первая
О святы́й уго́дниче Бо́жий, Иоа́нне! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́кого зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Молитва вторая
Святы́й, сла́вный и всехва́льный великому́чениче Христо́в Иоа́нне, несумне́нный хода́таю на́шего спасе́ния. Мо́лим тя раби́ твои́, со́брании днесь в Боже́ственнем твое́м хра́ме и ра́це святы́х моще́й поклоня́ющиеся; ми́лостив бу́ди я́коже нам, та́ко и дале́че отстоя́щим и на по́мощь тя призыва́ющим и му́ченическия твоя́ страда́ния похвала́ми ублажа́ющим. Испроси́ нам всем у многоми́лостиваго Го́спода Бо́га и Спа́са на́шего Иису́са Христа́ проще́ния и оставле́ния грехо́в, до сего́ дне и часа́ соде́янных на́ми. Сохрани́ нас невреди́мых от всех ко́зней лука́ваго и ненаве́тну жизнь на́шу соблюди́ от всех зол душе́вных и теле́сных, всегда́, ны́не и при́сно и во ве́ки веко́в. Ами́нь.
Величание
Велича́ем тя,/ великому́чениче Христо́в Иоа́нне,/ и чтим честна́я страда́ния твоя́,/ я́же за Христа́ // претерпе́л еси́.
Назад к списку
