ПСАЛОМЩИК - <
Выделенная опечатка:
Сообщить Отмена
Закрыть
Наверх

Сборник Триоди постной (тропари, кондаки, прокимны, причастны)

В неделю о мытаре и фарисее.

 

Кондак, Глас 4

Фарисеева убежим высокоглаголания, и мытареве научимся высоте глагол смиренных, покаянием взывающе: Спасе мира, очисти рабы Твоя.

 

Ин кондак, Глас 3:

Воздыхания принесем мытарская Господеви, и к нему приступим грешнии, яко Владыце: хощет бо спасения всех Человеков, оставление подает всем кающимся, нас бо ради воплотися, Бог сый, Отцу Собезначальный.

 

В неделю о блудном сыне.

 

Кондак, Глас 3:

Отеческая славы Твоея удалихся безумно, в злых расточив, еже ми предал еси богатство. Темже Ти блуднаго глас приношу: согреших пред Тобою, Отче щедрый, приими мя кающася, и сотвори мя яко единаго от наемник Твоих.

 

Родительская суббота, мясопустная.

 

тропарь, глас 8-й:

Глубиною мудрости человеколюбно вся строяй, / и полезная всем подаваяй, / Едине Содетелю, упокой, Господи, душы раб Твоих: / на Тя бо упование возложиша, / Творца и Зиждителя и Бога нашего.

 

Богородичен: гл.8

Тебе и стену и пристанище имамы, / и Молитвенницу благоприятну к Богу. / Егоже родила еси, Богородице Безневестная, верных спасение.

 

Кондак, гл.8

Со святыми упокой Христе души раб Твоих, идеже несть болезнь, ни печаль, ни воздыхание, но жизнь безконечная.

 

тропари по непорочных, глас 5-й:

Благословен еси Господи, / научи мя оправданием Твоим.

Святых лик обрете источник жизни / и дверь райскую, да обрящу и аз путь покаянием: / погибшее овча аз есмь, / воззови мя Спасе и спаси мя.

Благословен еси Господи, / научи мя оправданием Твоим.

Агнца Божия проповдавше, / и заклани бывше якоже агнцы, / и к жизни нестареемей святи / и присносущней преставльшеся: / Того прилежно, мученицы, молите, / долгов разрешение нам даровати.

Благословен еси Господи. / научи мя оправданием Твоим.

В путь узкий хождшии прискорбный, / вси в житии крест яко ярем вземшии, / и Мне последовавшии верою, / приидите, насладитеся, / ихже уготовах вам почестей / и венцев небесных.

Благословен еси Господи, / научи мя оправданием Твоим.

Образ есмь неизреченныя Твоея славы, / аще и язвы ношу прегрешений: / ущедри Твое создание, Владыко, / и очисти Твоим благоутробием, / и вожделенное Отечество подаждь ми, / рая паки жителя мя сотворяя.

Благословен еси Господи, / научи мя оправданием Твоим.

Древле убо от несущих создавый мя, / и образом Твоим Божественным почтый, /     преступлением же заповеди / паки мя возвративый в землю, из неяже взят бых, / на еже по подобию возведи, / древнею добротою возобразитися.

Благословен еси Господи, / научи мя оправданием Твоим.

Упокой, Боже, рабы Твоя, / и учиния в раи, / идеже лицы святых, Господи, / и праведницы сияют яко светила: / усопшыя рабы Твоя, упокой, / презирая их вся согрешения.

Слава Отцу и Сыну и Святому Духу.

Трисиятельное Единаго Божества / благочестно поем, вопиюще: / свят еси, Отче Безначальный, / Собезначальный Сыне и Божественный Душе: / просвети нас, верою Тебе служащих, / и вечнаго огня исхити.

И ныне и присно и во веки веков. Аминь.

Радуйся, Чистая, / Бога плотию Рождшая во спасение всех, / Еюже род человеческий обрете спасение: / Тобою да обрящем рай, / Богородице Чистая Благословенная.

Аллилуиа, аллилуиа, аллилуиа, слава Тебе, Боже. (Трижды.)

 

Седален, гл.5

Покой Спасе наш, / с праведными рабы Твоя, / и сия всели во дворы Твоя, / якоже есть писано, / презирая яко Благ прегрешения их / вольная и невольная, / и вся яже в ведении и не ведении, Человеколюбче.

Слава, и ныне:

От Девы возсиявый миру Христе Боже, / сыны света Тою показавый, помилуй нас.

 

По 6-ой песне канона.

 

Кондак.

Со святыми упокой Христе, души раб Твоих, идеже несть болезнь, ни печаль, ни воздыхание, но жизнь безконечная.

 

Икос:

Сам Един еси безсмертный, / сотворивый и создавый человека, / земнии убо от земли создахомся, / и в землю туюжде пойдем, / якоже повелел еси создавый мя и рекий ми, / яко земля еси и в землю отидеши, / аможе вси человецы пойдем, / надгробное рыдание творящее песнь: / аллилуия, аллилуия, аллилуия.

 

На стиховне:

Стих:               Души их во благих водворятся.

Стих:               Блажени яже избрал, и приял еси Господи.

 

Прокимен на литургии, гл.6

Души их во благих водворятся.

 

Причастен:

Блажени, яже избрал и приял еси, Господи, и память их в род и род.

 

 

В неделю мясопустную.

 

Кондак, Глас 1:

Егда приидеши, Боже, на землю со славою, и трепещут всяческая: река же огненная пред судищем влечет, книги разгибаются, и тайная являются; тогда избави мя от огня неугасимаго, и сподоби мя одесную Тебе стати, Судие Праведнейший.

 

Прокимен, гл.3

Велий Господь наш, и велия крепость Его, и разума Его несть числа.

 

Причастен.

Хвалите Господа с небес, хвалите Его в вышних.

Радуйтеся, праведнии, о Господе, правым подобает похвала.

 

Суббота сыропустная.

(Память всех святых, в подвиге поста просиявших).

 

Тропарь, гл.4

Боже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.

 

Кондак, гл.8

Яко благочестия проповедники, и нечестия обуздатели, Богоносных собор уяснил еси, подсолнечную осиявающия в мире совершенном: тех молитвами Тебе славящия и величащия сохрани, поющия Ти, Господи, аллилуиа.

 

Прокимен, гл.4

Восхвалятся преподобнии во славе и возрадуются на ложах своих.

 

Причастен.

Радуйтеся, праведнии, о Господе, правым подобает похвала.

 

В неделю сыропустную.

 

Кондак, Глас 6:

Премудрости наставниче, Смысла Подателю, немудрых Наказателю, и нищих Защитителю, утверди, вразуми сердце мое, Владыко! Ты даждь ми слово, Отчее слово, се бо устне мои не возбраню, во еже звати Тебе: Милостиве, помилуй мя падшаго.

 

Прокимен, гл.8

Помолитеся и воздадите Господеви Богу нашему.

 

Причастен.

Хвалите Господа с небес, хвалите Его в вышних.

 

В неделю вечера.

 

Прокимен, гл.8

Не отврати лица Твоего от отрока Твоего, яко скорблю, скоро услыши мя; вонми души моей и избави ю.

 

 

На Великом повечерии в 1-ю седмицу.

 

Кондак Великого канона, Гл. 6:

Душе моя, душе моя, востани, что спиши? Конец приближается, и имаши смутитися; воспряни убо, да пощадит Тя Христос Бог, везде сый и вся исполняяй.

Ирмосы Великого канона.

 

Песнь 1

Помошник и Покровитель бысть мне во спасение: Сей мой Бог, и прославлю Его, Бог отца моего, и вознесу Его: славно бо прославися.

Песнь 2

Вонми, небо, и возглаголю, и воспою Христа, от Девы плотию пришедшаго.

Видите, видите, яко Аз есмь Бог, манну одождивый и воду из камене источивый древле в пустыни людем Моим десницею и крепостию Моею.

Песнь 3.

На недвижимом, Христе, камени заповедей Твоих утверди мое помышление.

Утверди, Господи, на камени заповедей Твоих подвигшееся сердце мое, яко един Свят еси и Господь.

Песнь 4

Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся: слава силе Твоей, Господи.

Песнь 5

От нощи утренююща, Человеколюбче, просвети, молюся, настави и мене на повеления Твоя, и научи мя, Спасе, творити волю Твою.

Песнь 6

Возопих всем сердцем моим к щедрому Богу, и услыша мя от ада преисподняго, и возведе от тли живот мой.

 

Кондак, глас 6

Душе моя, душе моя, востани, что спиши? Конец приближается, и имаши смутитися: воспряни убо, да пощадит Тя Христос Бог, везде сый и вся исполняй.

 

Песнь 7

Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам: но не предаждь нас до конца, отцев Боже.

Песнь 8

Егоже воинства небесная славят, и трепещут Херувими и Серафими, всяко дыхание и тварь, пойте, благословите и превозносите во вся веки.

Песнь 9

Безсеменнаго зачатия рождество несказанное Матере безмужныя нетленен плод: Божие бо рождение обновляет естества. Темже Тя вси роди, яко Богоневестную Матерь, православно величаем.

 

В субботу первую Великого Поста.

вмч. Феодору Тирону.

 

Тропарь, Глас 2:

Велия веры исправления, во источнице пламене, яко на воде упокоения, святый мученик Феодор радовашеся; огнем бо всесожжегся, яко хлеб сладкий Троице принесеся. Того молитвами, Христе Боже, спаси души наша.

 

Кондак, Глас 8:

Веру Христову, яко щит, внутрь приим в сердцы твоем, противныя силы попрал еси многострадальче, и венцем небесным венчался еси вечно, Феодоре, яко непобедимый.

 

Прокимен, гл.7

Возвеселится праведник о Господе и уповает на Него.

 

Причастен.

В память вечную будет праведник, от слуха зла не убоится.

 

В неделю первую Великого Поста.

Торжество Православия.

 

Тропарь, Глас 2:

Пречистому Образу Твоему покланяемся, Благий, просяще прощения прегрешений наших, Христе Боже; волею бо благоволил еси плотию взыти на крест, да избавиши яже создал от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

 

Кондак, Глас 2:

Неописанное Слово Отчее, из Тебе, Богородице, описася воплощаем: и оскверншийся образ в древнее вообразив, Божественною добротою смеси. Но исповедающе спасение, делом и словом, сие воображаем.

 

Прокимен, гл.4

Благословен еси, Господи, Боже отец наших, и хвально и прославлено имя Твое во веки.

 

Причастен.

Хвалите Господа с небес, хвалите Его в вышних.

Радуйтеся, праведнии, о Господе, правым подобает похвала.

 

 

В неделю вечера.

 

Прокимен, гл. 8

Дал еси достояние боящимся Тебе, Господи.

 

 

Суббота вторая, третья и четвертая Великого поста.

 

Тропарь, глас 2-й:

Апостоли, мученицы и пророцы,  святителие, преподобнии и праведнии добре подвиг совершивши и веру соблюдшии, дерзновение имуще ко Спасу, о нас Того, яко Блага, молите, спастися молимся душам нашим.

 

Тропарь, гл.2

Помяни, Господи, яко благ рабы Твоя и елика в житии согрешиша прости: никтоже бо безгрешен, токмо Ты, могий и преставленным дати покой.

 

Богородичен: гл.2

Мати Святая неизреченнаго света ангельскими Тя песньми почитающе, благочестно величаем.

 

Кондак, гл.8

Со святыми упокой Христе души раб Твоих, идеже несть болезнь, ни печаль, ни воздыхание, но жизнь безконечная.

 

Богородичен: гл.8

Тебе и стену и пристанище имамы, / и Молитвенницу благоприятную к Богу. / Егоже родила еси, Богородице Безневестная, верных спасение.

 

тропари по непорочных, глас 5-й:

Благословен еси Господи, / научи мя оправданием Твоим.

Святых лик обрете источник жизни / и дверь райскую, да обрящу и аз путь покаянием: / погибшее овча аз есмь, / воззови мя Спасе и спаси мя.

Благословен еси Господи, / научи мя оправданием Твоим.

Агнца Божия проповдавше, / и заклани бывше якоже агнцы, / и к жизни нестареемей святи / и присносущней преставльшеся: / Того прилежно, мученицы, молите, / долгов разрешение нам даровати.

Благословен еси Господи. / научи мя оправданием Твоим.

В путь узкий хождшии прискорбный, / вси в житии крест яко ярем вземшии, / и Мне последовавшии верою, / приидите, насладитеся, / ихже уготовах вам почестей / и венцев небесных.

Благословен еси Господи, / научи мя оправданием Твоим.

Образ есмь неизреченныя Твоея славы, / аще и язвы ношу прегрешений: / ущедри Твое создание, Владыко, / и очисти Твоим благоутробием, / и вожделенное Отечество подаждь ми, / рая паки жителя мя сотворяя.

Благословен еси Господи, / научи мя оправданием Твоим.

Древле убо от несущих создавый мя, / и образом Твоим Божественным почтый, /     преступлением же заповеди / паки мя возвративый в землю, из неяже взят бых, / на еже по подобию возведи, / древнею добротою возобразитися.

Благословен еси Господи, / научи мя оправданием Твоим.

Упокой, Боже, рабы Твоя, / и учиния в раи, / идеже лицы святых, Господи, / и праведницы сияют яко светила: / усопшыя рабы Твоя, упокой, / презирая их вся согрешения.

Слава Отцу и Сыну и Святому Духу.

Трисиятельное Единаго Божества / благочестно поем, вопиюще: / свят еси, Отче Безначальный, / Собезначальный Сыне и Божественный Душе: / просвети нас, верою Тебе служащих, / и вечнаго огня исхити.

И ныне и присно и во веки веков. Аминь.

Радуйся, Чистая, / Бога плотию Рождшая во спасение всех, / Еюже род человеческий обрете спасение: / Тобою да обрящем рай, / Богородице Чистая Благословенная.

Аллилуиа, аллилуиа, аллилуиа, слава Тебе, Боже. (Трижды.)

 

Седален, гл.5

Покой Спасе наш, / с праведными рабы Твоя, / и сия всели во дворы Твоя, / якоже есть писано, / презирая яко Благ прегрешения их / вольная и невольная, / и вся яже в ведении и не ведении, Человеколюбче.

Слава, и ныне:

От Девы возсиявый миру Христе Боже, / сыны света Тою показавый, помилуй нас.

 

По 6-ой песне канона.

 

Кондак.

Со святыми упокой Христе, души раб Твоих, идеже несть болезнь, ни печаль, ни воздыхание, но жизнь безконечная.

 

Икос:

Сам Един еси безсмертный, / сотворивый и создавый человека, / земнии убо от земли создахомся, / и в землю туюжде пойдем, / якоже повелел еси создавый мя и рекий ми, / яко земля еси и в землю отидеши, / аможе вси человецы пойдем, / надгробное рыдание творящее песнь: / аллилуия, аллилуия, аллилуия.

 

Прокимны на литургии:        гл.8

Веселитеся о Господе, и радуйтеся праведнии.

И  гл.6                                             Души их во благих водворятся.

 

Причастен:

Радуйтеся, праведнии, о Господе, правым подобает похвала.

 Блажени, яже избрал и приял еси, Господи, и память их в род и род.

 

 

В неделю вторую Великого Поста.

Свт. Григория Паламы.

 

Тропарь, Глас 8:

Православия светильниче, Церкве утверждение и учителю, монахов доброто, богословов поборниче непреборимый, Григорие чудотворче, Фессалонитская похвало, проповедниче благодати, молися выну спастися душам нашим.

 

Кондак святителю, гл. 8

Премудрости священный и божественный орган, богословия светлую и согласно трубу воспеваем тя, Григорие богоглагольниче: но яко ум Уму первому предстояй, к Нему ум наш, отче, настави, да зовем: радуйся, проповедниче благодати.

 

Кондак Триоди, Глас 4:

Ныне время делательное явися, при дверех суд, востанем убо постящеся, принесем слезы умиления, милостынями, зовуще: согрешихом паче песка морскаго, но ослаби, Содетелю всех, яко да приимем нетленныя венцы.

 

Прокимен, гл.5

Ты, Господи, сохраниши ны и соблюдеши ны от рода сего и во век.

 

Прокимен святаго, гл.1

Уста моя возглаголют премудрость, и поучение сердца моего разум.

 

Причастен.

Хвалите Господа с небес, хвалите Его в вышних.

В память вечную будет праведник, от слуха зла не убоится.

 

В неделю вечера.

 

Прокимен, гл.8

Не отврати лица Твоего от отрока Твоего, яко скорблю, скоро услыши мя; вонми души моей и избави ю.

 

В неделю третию Великого Поста.

Крестопоклонная.

 

Тропарь, Глас 1:

Спаси, Господи, люди Твоя и благослови достояние Твое, победы православным христианом на сопративныя даруя, и Твое сохраняя Крестом Твоим жительство.

 

Кондак, Глас 7:

Не ктому пламенное оружие хранит врат Едемских; на тыя бо найде преславный соуз древо крестное, смертное жало, и адова победа прогнася. Предстал бо еси, Спасе мой, вопия сущим во аде: внидите паки в рай.

 

Тропарь на поклонение Кресту, Глас 6:     и вместо Трисвятаго:

Кресту Твоему покланяемся, Владыко, и святое воскресение Твое славим.

 

Прокимен, гл.6

Спаси, Господи, люди Твоя и благослови достояние Твое.

 

Причастен.

Знаменася на нас свет лица Твоего, Господи.

 

В неделю четвертую Великого Поста.

Прп. Иоанна Лествичника.

 

Тропарь, Глас 1:

Пустынный житель и телеси ангел, и чудотворец явился еси, богоносе отче наш Иоанне; постом, бдением, молитвою небесная дарования приим, исцеляеши недужныя, и души верою притекающих ти. Слава Давшему Ти крепость, слава Венчавшему тя, слава Действующему тобою всем исцеления.

 

Кондак преподобному, Глас 4:

На высоте Господь воздержания истинна тя положи, якоже звезду нелестную, световодящую концы, наставниче, Иоанне, отче наш.

 

Кондак Триоди, гл.4

Креста Твоего, Господи, поклонению сподобльшеся, духом приближаемся и верою, и молящееся вопием: воскресение всех нас достигнути сподоби.

 

Прокимен преподобному, гл.4

Восхвалятся преподобнии во славе и возрадуются на ложах своих.

 

Причастен.

Хвалите Господа с небес, хвалите Его в вышних.

В память вечную будет праведник, от слуха зла не убоится.

 

В неделю вечера.

 

Прокимен, гл.8

Не отврати лица Твоего от отрока Твоего, яко скорблю, скоро услыши мя; вонми души моей и избави ю.

 

Суббота пятая Великого поста.

Акафиста.

 

Тропарь гл.8

Повеленное тайно прием в разуме, в крове Иосифеве тщанием предста безплотный, глаголя Неискусобрачней: Приклонивый схождением небеса вмещается неизменно весь в Тя: Егоже и видя в ложеснах Твоих, приемша рабий зрак, ужасаюся звати Тебе:  радуйся, Невесто Неневестная.

 

Кондак, глас 8

Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

 

Прокимен, гл.3

 Величит душа Моя Господа, и возрадовася дух Мой о Бозе, Спасе Моем.

 

Причастен:

 Чашу спасения приму, и имя Господне призову.

 

В неделю пятую Великого Поста.

Прп. Марии Египетской.

 

Тропарь, Глас 8:

В тебе, мати, известно спасеся еже по образу; приимши бо крест, последовала еси Христу, и деющи учила еси презирати убо плоть, преходит бо, прилежати же о души вещи безсмертней. Темже и со ангелы срадуется, преподобная Марие, дух твой.

 

Кондак, Глас 3:

Блудами первее преисполнена всяческими, Христова невеста днесь покаянием явися, ангельское жительство подражающи, демоны Креста оружием погубляет. Сего ради Царствия невеста явилася еси, Марие преславная.

 

Прокимен преподобной, гл.4

Дивен Бог во святых Своих, Бог Израелев.

 

Причастен.

Хвалите Господа с небес, хвалите Его в вышних.

В память вечную будет праведник, от слуха зла не убоится.

 

Суббота шестая Великого поста.

Лазарева.

 

Тропарь, гл.1

Общее воскресение прежде Твоея страсти уверяя, из мертвых воздвигл еси Лазаря, Христе Боже, темже и мы, яко отроцы победы знамения носяще, Тебе, победителю смерти, вопием: осанна в вышних, благословен Грядый во имя Господне.

 

Кондак, гл.2

Всех радость, Христос, истина, свет, живот и мира воскресение, сущим на земли явися Своею благостию, и бысть образ воскресения, всем подая Божественное оставление.

 

Вместо Трисвятаго:

Елицы во Христа крестистеся, во Христа облекостеся.

 

Прокимен, гл.3

Господь просвещение мое и Спаситель мой, кого убоюся.

 

Причастен.

Из уст младенец и ссущих совершил еси хвалу.

 

Неделя ваий.

 

Тропарь, гл.1

Общее воскресение прежде Твоея страсти уверяя, из мертвых воздвигл еси Лазаря, Христе Боже, темже и мы, яко отроцы победы знамения носяще, Тебе, победителю смерти, вопием: осанна в вышних, благословен Грядый во имя Господне.

 

Тропарь, гл.4

Спогребшеся Тебе крещением, Христе Боже наш, безсмертныя жизни сподобихомся воскресением Твоим, и воспевающее зовем: осанна в вышних, благословен Грядый во имя Господне.

 

Кондак, гл.6

На престоле на небеси, на жребяти на земли носимый, Христе Боже, ангелов хваление и детей воспевание приял еси, зовущих Ти: благословен еси, Грядый Адама воззвати.

 

Величание.

Величаем Тя, Живодавче Христе, осанна в вышних, и мы Тебе вопием: благословен Грядый во имя Господне.

 

Прокимен на утрени, гл.4

Из уст младенец и ссущих совершил еси хвалу.

 

Прокимен на литургии, гл.4

Благословен Грядый во имя Господне, Бог Господь и явися нам.

 

Задостойник.

Бог Господь, и явися нам, составите праздник, и веселящеся приидите, возвеличим Христа, с ваиами и ветвьми, песньми зовуще: благословен Грядый во имя Господа Спаса нашего.

 

Причастен.

 Благословен Грядый во имя Господне, Бог Господь и явися нам.

 

Страстная седмица.

В Великий Понедельник, Вторник и Среду.

 

Тропарь, Глас 8:

Се Жених грядет в полунощи, и блажен раб, Егоже обрящет бдяща, недостоин же паки, Егоже обрящет унывающа. Блюди убо, душе моя, не сном отяготися, да не смерти предана будеши, и Царствия вне затворишися, но воспряни зовущи: Свят, Свят, Свят еси, Боже, Богородицею помилуй нас.

 

Кондак Великого Понедельника, Глас 8:

Иаков рыдаша Иосифова лишения, и доблий седяше на колеснице, яко царь почитаемъ; египтяныни бо тогда сластем не поработав, воспрославляшеся от Ведущаго человеческая сердца, и посылающаго венец нетленный.

 

Кондак Великого Вторника, Глас 2:

Час душе конца помысливши, и посечения смоковницы убоявшися, данный тебе талант трудолюбно делай, окаянная, бодрствующи и зовущи: да не пребудем вне чертога Христова.

 

Кондак Великой Среды, Глас 4:

Паче блудницы, Блаже, беззаконновав, слез тучи никакоже Тебе принесох; но молчанием моляся припадаю Ти, любовию облобызая пречистеи Твои нозе, яко да оставление мне, яко Владыка подаси долгов, зовущу Ти, Спасе: от скверных дел моих избави мя.

 

Ексапостиларий.

Чертог Твой вижду, Спасе мой, украшенный, и одежды не имам, да вниду в онь: просвети одеяние души моея, Светодавче, и спаси мя.

 

Во Святой и Великий Четверток.

 

Тропарь, Глас 8:

Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся, и беззаконным судиям Тебе, Праведнаго Судию, предает. Виждь, имений рачителю, сих ради удавление употребивша! Бежи, несытыя души, Учителю таковая дерзнувшия; Иже о всех Благий, Господи, слава Тебе.

 

Кондак, Глас 2:

Хлеб прием в руце предатель, сокровенно тыя простирает, и приемлет цену Создавшаго Своима руками человека, и неисправлен пребысть Иуда раб и льстец.

 

Прокимен, гл.7

Князи людстии собрашася вкупе, на Господа и на Христа Его.

 

Вместо Херувимской;                                                                                         Причастен;

Вечери Твоея тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам яко Иуда, но яко разбойник исповедаю Тя: помяни мя, Господи, во Царствии Твоем.

( сие поется вместо «Да исполнятся уста наша»…)

 

Во Святой и Великий пяток.

 

Тропарь, Глас 8:

Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся, и беззаконным судиям Тебе, Праведнаго Судию, предает. Виждь, имений рачителю, сих ради удавление употребивша! Бежи, несытыя души, Учителю таковая дерзнувшия; Иже о всех Благий, Господи, слава Тебе.

 

Кондак, Глас 8:

Нас ради Распятого приидите вси воспоим, Того бо виде Мария и глаголаше: аще и распятие терпиши, Ты еси Сын и Бог Мой.

 

Ексапостиларий.

Разбойника благоразумнаго, во едином часе раеви сподобил еси, Господи: и мене Древом Крестным просвети и спаси мя.

 

На вечерне.

 

Прокимен, гл.6

Положиша мя в рове преисподнем, в темных и сени смертней.

 

Стихира на стиховне: Слава и ныне, гл.5

Тебе одеющагося светом яко ризою, снем Иосиф с древа с Никодимом, и видев мертва нага непогребена, благосердный плач восприим, рыдая глаголаше: увы мне, Сладчайший Иисусе, Егоже вмале солнце, на кресте висима узревшее, мраком облагашеся, и земля страхом колебашеся, и раздерашеся церковная завеса; но се ныне вижу Тя, мене ради волею подъемша смерть. Како погребу Тя, Боже мой, или како плащаницею обвию? Коима ли рукама прикоснуся нетленному Твоему Телу, или кия песни воспою Твоему исходу, Щедре? Величаю страсти Твоя, песнословлю и погребение Твое со воскресением, зовый: Господи, слава Тебе.

 

Стихира на целование Плащаницы, гл.5

Приидите, ублажим Иосифа приснопамятного, в нощи к Пилату пришедшаго, и Живота всех испосившаго: даждь ми Сего страннаго, Иже не имеет где главы подклонити; даждь ми Сего страннаго, Егоже ученик лукавый на смерть предаде;  даждь ми Сего страннаго, Егоже Мати зряще на кресте висяща, рыдающе вопияше, и матерски восклицаше: увы Мне, Чадо Мое! Увы Мне, Свете Мой, и утроба Моя возлюбленная! Семионом бо предреченное в церкви днесь собыстся: Мое Сердце оружие пройде;  но в радость Воскресения Твоего плач преложи. Покланяемся страстем Твоим, Христе, покланяемся страстем Твоим, Христе, покланяемся страстем Твоим, Христе и Святому Воскресению.

 

Во Святую и Великую Субботу.

 

На утрени по великом славословии прокимен, гл.7

Воскресни Господи Боже мой, да вознесется рука Твоя, не забуди убогих Твоих до конца.

 

Тропарь, Глас 2:

Благообразный Иосиф, с древа снем пречистое Тело Твое, плащаницею чистою обвив, и вонями во гробе нове покрыв положи.

Слава:

Егда снизшел еси к смерти, Животе Безсмертный, тогда ад умертвил еси блистанием Божества. Егда же и умершия от преисподних воскресил еси, вся силы небесныя взываху: Жизнодавче Христе Боже наш, слава Тебе.

И ныне:

 Мироносицам женам при гробе представ, ангел вопияше: мира мертвым суть прилична, Христос же истления явися чуждь.

 

Кондак, Глас 6:

Бездну заключивый, мертв зрится, и смирною и плащаницею обвився, во гробе полагается, яко смертный, Бессмертный; жены же приидоша помазати Его миром, плачущи горько и вопиющия: сия Суббота есть Преблагословенная, в нейже Христос уснув, воскреснет тридневен.

 

 

На литургии вместо Трисвятаго:

 Елицы во Христа крестистеся, во Христа облекостеся.

 

Прокимен, гл.5

Вся земля да поклонится Тебе, и поет Тебе, да поет же имени Твоему, Вышний.

 

Вместо аллилуия.

Воскресни Боже, суди земли, яко Ты наследиши во всех языцех.

 

 

Вместо Херувимской песни.

Да молчит всякая плоть человеча и да стоит со страхом и трепетом, и ничтоже земное в себе да помышляет: Царь бо царствующих, и Господь господствующих, приходит заклатися и датися в снедь верным. Преходят же Сему лицы ангельстии со всяким началом и властию, многоочитии Херувими и шестокрылатии Серафими, лица закрывающе,  и вопиюще песнь: аллилуиа, аллилуиа, аллилуиа.

 

Причастен.

Воста яко спя Господь, и воскресе спасаяй нас.


Назад к списку