О болящих (тропарь, кондак, молитва и канон)
Тропарь, глас 4:
Ско́pый в заступле́нии Еди́н сый, Хpисте́,/ ско́pое свы́ше покажи́ посеще́ние стpа́ждущим pабо́м Твои́м,/ и изба́ви от неду́г и го́pьких боле́зней,/ и воздви́гни во е́же пе́ти Тя и сла́вити непpеста́нно,// моли́твами Богоpо́дицы, Еди́не Человеколю́бче.
Кондак, глас 2:
На одре́ боле́зни лежа́щих и сме́ртною ра́ною уя́звленных,/ я́коже иногда́ воздви́гл еси́, Спа́се, Петро́ву те́щу,/ и рассла́бленнаго на одре́ носи́маго,/ си́це и ны́не, Милосе́рде, стра́ждущих посети́ и исцели́:/ Ты бо Еди́н еси́ неду́ги и боле́зни ро́да на́шего понесы́й,// и вся моги́й, я́ко Многоми́лостив.
Молитва
Влады́ко, Вседержи́телю, Святы́й Царю́, наказу́яй и не умерщвля́яй, утвержда́яй низпа́дающия и возводя́й низве́рженныя, теле́сныя челове́ков ско́рби исправля́яй, мо́лимся Тебе́, Бо́же наш, раба́ Твоего́ (имярек) немощству́юща посети́ ми́лостию Твое́ю, прости́ ему́ вся́кое согреше́ние во́льное и нево́льное. Ей, Го́споди, враче́бную Твою́ си́лу с Небесе́ низпосли́, прикосни́ся телеси́, угаси́ огне́вицу, укроти́ стра́сть и вся́кую не́мощь тая́щуюся, бу́ди врач раба́ Твоего́ (имярек), воздви́гни его́ от одра́ боле́зненнаго и от ло́жа озлобле́ния це́ла и всесоверше́нна, да́руй его́ Це́ркви Твое́й благоугожда́юща и творя́ща во́лю Твою́. Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Канон за болящего, глас 3-й
Песнь 1
Ирмос: Пресека́емое мо́ре жезло́м дре́вле, Изра́иль про́йде я́ко по пусты́ни, и крестообра́зно я́ве предуготовля́ет стези́. Сего́ ра́ди пои́м во хвале́нии чу́дному Бо́гу на́шему, я́ко просла́вися.
Ми́лостиве Го́споди, услы́ши моли́тву раб Твои́х, моля́щихся Тебе́.
В день печа́ли, наше́дшия на ны, к Тебе́, Христе́ Спа́се, припа́дающе, Твоея́ ми́лости про́сим. Облегчи́ боле́знь раба́ Твоего́, изреки́ нам я́ко и со́тнику: иди́, се здрав есть о́трок твой.
Ми́лостиве Го́споди, услы́ши моли́тву раб Твои́х, моля́щихся Тебе́.
Мольбы́ и моле́ния, с воздыха́нием к Тебе́ вопие́м, Сы́не Бо́жий, поми́луй нас. Воздви́гни со одра́ лежа́щаго, я́ко разсла́бленнаго сло́вом: возьми́ одр твой, глаго́ля, отпуща́ются ти греси́ твои́.
Сла́ва Отцу́ и Сы́ну и Свято́му Ду́ху.
Твоего́, Христе́, о́браза подо́бию поклоня́ющеся, ве́рою целу́ем, и боля́щему здра́вия про́сим, подража́юще кровоточи́вей, я́же подо́льца риз Твои́х косну́ся, и исцеле́ние неду́га прия́т.
И ны́не и при́сно и во ве́ки веко́в. Ами́нь.
Пречи́стая Госпоже́ Богоро́дице, всем изве́стная Помо́щница, не пре́зри нас к Тебе́ припа́дающих, моли́ я́ко бла́га Твоего́ Сы́на и Бо́га на́шего, да́ти здра́вие боля́щему, да Тя с на́ми прославля́ет.
Песнь 3
Ирмос: И́же от не су́щих вся приведы́й, сло́вом созида́емая, соверша́емая ду́хом, Вседержи́телю Вы́шний, в любви́ Твое́й утверди́ мене́.
Ми́лостиве Го́споди, услы́ши моли́тву раб Твои́х, моля́щихся Тебе́.
И́же от тя́жких боле́зней на земли́ пове́ржен, к Тебе́, Христе́, с на́ми вопие́т, пода́ждь здра́вие телеси́ его́, я́ко же Иезеки́и пла́кавшуся к Тебе́.
Ми́лостиве Го́споди, услы́ши моли́тву раб Твои́х, моля́щихся Тебе́.
При́зри, Го́споди, на на́ше смире́ние, и не помяни́ беззако́ний на́ших, но ве́ры ра́ди боля́щаго, я́ко прокаже́ннаго сло́вом исцели́ ему́ боле́знь, да Твое́, Христе́ Бо́же, сла́вится и́мя.
Сла́ва Отцу́ и Сы́ну и Свято́му Ду́ху.
Це́рковь, ю́же еси́ освяти́л, на ту, Христе́, не даждь поноше́ния, но воздви́гни неви́димо в неду́зе на одре́ лежа́щаго, в не́йже мо́лим Ти ся: да не реку́т неве́рнии, где есть Бог их.
И ны́не и при́сно и во ве́ки веко́в. Ами́нь.
К Твоему́ пречи́стому, Богоро́дице, о́бразу ру́це возде́юще вопие́м, услы́ши раб Твои́х моли́тву и спаси́ в боле́зни лежа́щаго, да от боле́зни воста́в, возда́ст обе́ты, я́же в печа́ли глаго́лаша уста́ его́.
Седален, глас 8:
На одре́ грехо́вней лежа́ща мя, и страстьми́ уя́звена, и я́коже воздви́гл еси́ Петро́ву те́щу и спасе́ разсла́бленнаго носи́ма со одро́м, та́ко и ны́не посети́, Ми́лостиве, боля́щаго, понесы́й неду́ги ро́да на́шего. Тебе́ Еди́наго ве́мы, терпели́ва и милосе́рда, ми́лостива Врача́ душа́м и телесе́м, Христа́ Бо́га на́шего, наводя́ща неду́ги и па́ки исцеля́юща, подава́юща проще́ние ка́ющимся о согреше́ниих, Еди́наго Милосе́рдаго и Ми́лостиваго.
Сла́ва Отцу́ и Сы́ну и Свято́му Ду́ху.
Аз гре́шный пла́чуся на одре́ свое́м лежа́, проще́ние ми пода́ждь, Христе́ Бо́же, и от боле́зни сея́ воздви́гни мя, и я́же есмь от ю́ности грехи́ сотвори́л, избы́ти ми сих моли́твами Богоро́дицы да́руй.
И ны́не и при́сно и во ве́ки веко́в. Ами́нь.
Умилосе́рдися и спаси́ мя, воздви́гни мя от одра́ боле́зненнаго, мощь бо моя́ во мне изнемо́же и весь неча́янием одержи́м есмь, Ма́ти Бо́жия Пречи́стая, исцели́ неду́гующа лю́те, Ты бо еси́ Помо́щница Христиа́ном.
Песнь 4
Ирмос: Положи́л еси́ к нам тве́рдую любо́вь, Го́споди: Единоро́днаго бо Твоего́ Сы́на за ны на смерть дал еси́, те́мже Ти зове́м благодаря́ще: сла́ва си́ле Твое́й, Го́споди.
Ми́лостиве Го́споди, услы́ши моли́тву раб Твои́х, моля́щихся Тебе́.
Уже́ отча́янна лю́тым неду́гом и к сме́рти прибли́жившася, возврати́, Христе́, на живо́т и да́ждь пла́чущимся уте́ху, да вси прославля́ем Твоя́ свята́я чудеса́.
Ми́лостиве Го́споди, услы́ши моли́тву раб Твои́х, моля́щихся Тебе́.
К Тебе́, Тво́рче, ка́емся в свои́х гресе́х, я́ко не хо́щеши сме́рти гре́шничи, оживи́, уздра́ви боля́щаго, да воста́в послу́жит Ти, испове́дуя с на́ми Твою́ бла́гость.
Сла́ва Отцу́ и Сы́ну и Свято́му Ду́ху.
Сле́зы Манасси́ины, Ниневи́тян покая́ние, Дави́дово испове́дание прии́м, вско́ре спасл еси́, и на́ши мо́литвы ны́не приими́, да́ждь здра́вие боля́щему, о нем же Тя мо́лим.
И ны́не и при́сно и во ве́ки веко́в. Ами́нь.
Пода́ждь нам Твою́ ми́лость, Госпоже́, всегда́ на Тя наде́ющимся, испроси́ здра́вие боля́щему, враче́бнии Твои́ ру́це с Предте́чею, Богоро́дице, ко Го́споду Бо́гу простира́ющи.
Песнь 5
Ирмос: На земли́ Неви́димый яви́лся еси́, и челове́ком во́лею сожи́л еси́ Непостижи́мый, и к Тебе́ у́тренююще, воспева́ем Тя, Человеколю́бче.
Ми́лостиве Го́споди, услы́ши моли́тву раб Твои́х, моля́щихся Тебе́.
Дщерь Иаи́рову уже́ уме́ршу, я́ко Бог оживи́л еси́, и ны́не возведи́, Христе́ Бо́же, от врат сме́ртных боля́щаго, Ты бо еси Путь и Живо́т всем.
Ми́лостиве Го́споди, услы́ши моли́тву раб Твои́х, моля́щихся Тебе́.
Сы́на вдови́ча оживи́в Спа́се, и тоя́ сле́зы преложи́в на ра́дость, спаси́ от неду́га тле́ющаго раба́ Твоего́, да и на́ша скорбь и боле́знь на ра́дость прии́дет.
Сла́ва Отцу́ и Сы́ну и Свято́му Ду́ху.
О́гненну боле́знь те́щи Петро́ве прикоснове́нием Твои́м исцели́в, и ны́не возста́ви боля́щаго раба́ Твоего́, да воста́в я́ко Ио́на, послу́жит Ти.
И ны́не и при́сно и во ве́ки веко́в. Ами́нь.
Ско́рбнии, смире́ннии, гре́шнии, не иму́щии дерзнове́ния к Тебе́, Пречи́стая Богома́ти, вопие́м, умоли́ Сы́на Твоего́ Христа́ да́ти боля́щему здра́вие телеси́.
Песнь 6
Ирмос: Бе́здна после́дняя грехо́в обы́де мя, и исчеза́ет дух мой: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.
Ми́лостиве Го́споди, услы́ши моли́тву раб Твои́х, моля́щихся Тебе́.
Бе́здну милосе́рдия и ми́лости име́я, Христе́ Бо́же, услы́ши моле́ния раб Твои́х. Ты бо еси́ Петро́м Тави́фу воскреси́л, Ты и ны́не в боле́зни лежа́щаго воздви́гни, послу́шав це́рковных моли́твенник.
Ми́лостиве Го́споди, услы́ши моли́тву раб Твои́х, моля́щихся Тебе́.
Врачу́ душа́м и телесе́м на́шим, понесы́й неду́ги всего́ ми́ра, Христе́, и Ене́я Петром исцели́вый, Ты и ны́не боля́щаго исцели́ святы́х апо́стол моли́твами.
Сла́ва Отцу́ и Сы́ну и Свято́му Ду́ху.
Преложи́, Христе́, на ра́дость рыда́ние о неду́жнем скорбя́щем, да Твою́ получи́вше ми́лость, вни́дут в дом Твой со обе́тными дарми́, сла́вяще Тя в Тро́ице Еди́наго Бо́га.
И ны́не и при́сно и во ве́ки веко́в. Ами́нь.
Прииди́те, о дру́зи, поклони́мся моля́щеся о боля́щем Бо́жией Ма́тери. Та бо име́ет власть неду́жныя исцеля́ти, со безме́здникома вку́пе, духо́вным неви́димо помазу́юще ма́слом.
Кондак, глас 3:
Ду́шу мою́, Го́споди, во гресе́х вся́ческих, безме́стными дея́ньми разсла́блену воздви́гни боже́ственным Твои́м человеколю́бием, я́ко же и разсла́бленнаго воздви́гл еси́ дре́вле, да зову́ Ти спаса́ем: ще́дре Христе́, да́ждь ми изцеле́ние.
Икос:
И́же руки Свое́й го́рстию содержа́й концы́, Иису́се Бо́же, И́же Отцу́ собезнача́льный и Ду́ху Свято́му совлады́чествуя, я́ко пло́тию яви́лся еси́ неду́ги исцеля́я и стра́сти очи́стил еси́, слепы́я просвети́л еси́, и разсла́бленнаго сло́вом Боже́ственным совоста́вил еси́, сего́ пра́во ходя́ща сотвори́в и одр повеле́л еси́ на ра́му взя́ти. Те́мже вси с ним воспева́ем и пое́м: ще́дре Христе́, даждь ми иcцеле́ние.
Песнь 7
Ирмос: Пре́жде о́бразу злато́му, перси́дскому чти́лищу о́троцы не поклони́шася, трие́ пою́ще посреде́ пе́щи: отце́в Бо́же, благослове́н еси́.
Ми́лостиве Го́споди, услы́ши моли́тву раб Твои́х, моля́щихся Тебе́.
О, Кре́сте Пресвяты́й Христо́в, честно́е Дре́во Живо́тное. Тобо́ю смерть поги́бе и ме́ртвии воскресо́ша, и ны́не боля́щаго изцели́ и оживи́, я́коже при Еле́не уме́ршую деви́цу.
Ми́лостиве Го́споди, услы́ши моли́тву раб Твои́х, моля́щихся Тебе́.
До́лгую и лю́тую боле́знь И́овлю на гно́ищи и в че́рвех, того́ моля́щася, сло́вом изцели́л еси́, Го́споди. И ны́не же в це́ркви о боля́щем мо́лим Тя: я́ко благ, изцели́ неви́димо моли́твами святы́х Твои́х.
Сла́ва Отцу́ и Сы́ну и Свято́му Ду́ху.
Вси ве́мы, я́ко умре́ти нам есть, Тебе́ Бо́гу та́ко изво́лившу, но на ма́ло вре́мя, Ми́лостиве, здра́вия про́сим боля́щему, премени́ от сме́рти на живо́т, да́ждь скорбя́щим уте́ху.
И ны́не и при́сно и во ве́ки веко́в. Ами́нь.
Посо́бствуй и помога́й на́шему сиро́тству, Богоро́дице, Ты бо ве́си вре́мя и час, когда́ умоли́ти Сы́на Твоего́ и Бо́га на́шего, да́ти боля́щему здра́вие и проще́ние от всех грех.
Песнь 8
Ирмос: Служи́ти Живо́му Бо́гу, в Вавило́не о́троцы претерпе́вше, о муси́кийских орга́нех неради́ша, и посреде́ пла́мене стоя́ще, боголе́пную песнь воспева́ху, глаго́люще: благослови́те вся дела́ Госпо́дня Го́спода.
Ми́лостиве Го́споди, услы́ши моли́тву раб Твои́х, моля́щихся Тебе́.
Ми́лость покажи́, Влады́ко, в боле́зни раба́ Твоего́, и ско́ро изцели́, ми́лостиве Христе́ Бо́же, и а́ще сме́рти не преда́ждь су́дней, да Ти покая́ние возда́ст. Сам бо рекл еси́: не хощу́ сме́рти гре́шничи.
Ми́лостиве Го́споди, услы́ши моли́тву раб Твои́х, моля́щихся Тебе́.
Го́споди ми́лостиве, Твоя́ пресла́вная чудеса́ да и до нас ны́не дости́гнут: бе́сы прожени́, неду́ги погуби́, ра́ны изцели́, боле́зни уврачу́й, и потво́ры и чароде́яния и вся́кия я́зи изба́ви ны.
Сла́ва Отцу́ и Сы́ну и Свято́му Ду́ху.
Запрети́вый, Христе́, морски́м ве́тром, и страх учени́к на ра́дость преложи́вый, и ны́не запрети́ тя́жким боле́знем, тружда́ющим раба́ Твоего́, да вси возвесели́мся хва́ляща Тя во ве́ки.
И ны́не и при́сно и во ве́ки веко́в. Ами́нь.
Изба́ви, Богоро́дице, от обыше́дших ны печа́лей, разли́чных неду́г, отра́вы же и чароде́йства, и бесо́вскаго мечта́ния, и от наве́та злых челове́к и от напра́сныя сме́рти, мо́лим Ти ся.
Песнь 9
Ирмос: На Сина́йстей горе́ ви́де Тя в купине́ Моисе́й, неопа́льно огнь Божества́ заче́ншую во чре́ве: Дании́л же Тя ви́де го́ру несеко́мую, жезл прозя́бший, Иса́иа взыва́ше, от ко́рене Дави́дова.
Ми́лостиве Го́споди, услы́ши моли́тву раб Твои́х, моля́щихся Тебе́.
Исто́чниче жи́зни, пода́телю, Христе́, ми́лости, не отврати́ лица́ Твоего́ от нас. Облегчи́ боле́знь утруже́ному боле́знию, и воздви́гни я́ко Фадде́ем А́вгаря, да при́сно Тебе́ сла́вит со Отце́м и Святы́м Ду́хом.
Ми́лостиве Го́споди, услы́ши моли́тву раб Твои́х, моля́щихся Тебе́.
Ева́нгельскому ве́рующе гла́су, Твоего́ и́щем обе́та, Христе́: проси́те бо, рече́, и да́стся вам. Тем и ны́не предстоя́ще мо́лим Тя, возста́ви со одра́ здра́ва лю́тым пове́ржена неду́гом, да Тя с на́ми вку́пе велича́ет.
Сла́ва Отцу́ и Сы́ну и Свято́му Ду́ху.
Му́чимый неду́гом, внутрь неви́димыми ра́нами, Тебе́, Христе́, с на́ми вопие́т, не нам, Го́споди, не нас ра́ди, вси бо мы испо́лнены грехо́в, но Ма́терними Твои́ми и Предте́чевыми моли́твами даждь исцеле́ние боля́щему, да Тя вси возвели́чим.
И ны́не и при́сно и во ве́ки веко́в. Ами́нь.
Бо́жия Ма́ти Пречи́стая, со все́ми святы́ми призыва́ем Тя, со а́нгелы и арха́нгелы, с проро́ки и патриа́рхи, со апо́столы, с преподо́бными и пра́ведными моли́ся Христу́ Бо́гу на́шему да́ти здра́вие боля́щему, да Тя вси велича́ем.
Назад к списку
