Святителю Иннокентию (Борисову), архиепископу Херсонскому (тропарь, кондак, молитва и величание)

Тропарь, глас 4:

От ю́ных ле́т прилежа́ уче́нию благоче́стия и стра́ху Бо́жию,/ во благода́ти Христо́вой преуспева́я, стяжа́л еси́ слове́сная дарова́ния/ и яви́лся еси́ неутоми́мый пропове́дник спасе́ния,/ ду́ши ве́рных озаря́я спаси́тельными смы́слы/ и приводя́ все́х ко исправле́нию./ Святи́телю о́тче Инноке́нтие,/ моли́ Христа́ Бо́га // да́ти на́м оставле́ние грехо́в и ве́лию ми́лость.

Кондак, глас 4:

Дне́сь гра́д Херсо́нский ра́дуется,/ весели́тся земля́ Таври́ческая,/ иму́ще моли́твенника святи́теля Христо́ва Инноке́нтия,/ па́стыря до́бра и пра́ведника изря́днаго,/ и́же Бо́жия Ма́тери о́браз Ка́сперовский просла́вил еси́,/ в кра́е новору́сстем ве́ру пра́вую утверди́л еси́./ Те́мже святи́телю о́тче Инноке́нтие,/ моли́ Христа́ Бо́га, // спасти́ся душа́м на́шим.

Ин кондак, глас 3:

Ю́га земли́ на́шея цве́те,/ Це́ркве Росси́йския украше́ние, / Правосла́вия наста́вниче пресла́вный, / защи́тниче и моли́твенниче Оте́чества усе́рдный, / но́вый ру́сский Златоу́сте, / богому́дре святи́телю Инноке́нтие, / моли́ Христа́ Бо́га // спасти́ся душа́м на́шим.

Молитва

О всезлата́я уста́ сло́ва, всехва́льный и всечестны́й архиере́ю, святи́телю Христо́в Инноке́нтие! Ты мно́гая и разли́чная дарова́ния от Го́спода прия́л еси́, и я́ко раб благи́й и ве́рный вся тала́нты, тебе́ да́нные, приумно́жил еси́, и́миже Це́ркви Христо́вей и Оте́честву на́шему сла́вне послужи́л еси́. Ны́не же ве́лие име́я ко Святе́й Тро́ице дерзнове́ние, при́зри ми́лостивно от го́рния твоея́ оби́тели на нас немощны́х, греха́ми мно́гими обремене́нных и умоли́ Го́спода Вседержи́теля, да отврати́т от нас гнев Свой, пра́ведно на ны дви́жимый, и на путь покая́ния нас обрати́т. Прельще́ние язы́ческое, зловре́дное нече́стие, раско́лы и е́реси, от Це́ркви Святы́я отчужда́ющия, да истреби́т, и от собла́знов ми́ра и ко́зней диа́вольских нас огради́т. Ей, кре́пкий сто́лпе церко́вный, сосу́де благода́ти предъизбра́нный, испроси́ от Отца́ све́тов, да соблюде́т нас от нечести́вых уче́ний и душепа́губных, неве́рия и суеве́рия изба́вит, в ве́ре Правосла́вной нас утверди́т и по о́бразу Святы́я и Неразде́льныя Тро́ицы ма́ло ста́до Свое́ в любви́ и едиому́дрии сохрани́т. Неве́рныя к позна́нию и́стины да обрати́т. Па́стырем Це́ркве пра́ведность и ре́вность о спасе́нии да пода́ст, мона́шествующим в по́двизе укрепи́т, мир уми́рит и зе́млю на́шу от крамолы́ и нестрое́ний свободи́т. О, хода́таю те́плый и чудотво́рче преди́вный, святи́телю о́тче наш Инноке́нтие, испроси́ нам у Го́спода Бо́га вре́мя на покая́ние исправле́ние; и во всех ну́ждах, ско́рбех и искуше́ниях утеше́ние и ско́рое поможе́ние. И та́ко да благода́тию и человеколю́бием в Тро́ице покланя́емого Бо́га сподо́бимся насле́дницы бы́ти Ца́рствия Небе́снаго, да прославля́ем вку́пе с тобо́ю всех благи́х Пода́теля, Триеди́наго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Величание

Велича́ем тя,/ святи́телю о́тче Инноке́нтие,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.