Святителю Антонию (Смирницкому), архиепископу Воронежскому и Задонскому (тропари, кондаки, молитвы и величание)

Тропарь, глас 4:

Преди́внаго селе́ния Бо́жия Ма́тере жи́тель сый,/ кро́тостию и смире́нием изря́дно украша́емь,/ гра́ду Воро́нежу тре́тие свети́ло благода́ти яви́лся еси́,/ святы́х Митрофа́на и Ти́хона сонасле́дниче,/ святи́телю о́тче наш Анто́ние,/ моли́ Ми́лостиваго Бо́га,/ гра́ду твоему́ мир дарова́ти,/ Оте́честву на́шему утвержде́ние // и душа́м ве́рных спасе́ние.

Кондак, глас 3:

Днесь земля́ Воро́нежская весе́лия исполня́ется,/ во иера́рсех вели́каго Анто́ния па́мять че́ствующи:/ той бо любо́вию Христо́вою воспламени́вся,/ моли́твами, бде́нием и поще́нием оби́тель Ду́ха Свята́го себе́ сотвори́,/ от Него́же вразумля́емь,/ па́ству церко́вную прему́дре упа́сл еси́;/ мы же, такова́го хода́тая ко Христу́ Бо́гу иму́ще,/ с ве́рою и любо́вию вопие́м:/ ра́дуйся, святи́телю Анто́ние, // те́плый о нас пред Бо́гом предста́телю.

Молитва

О, святи́телю о́тче наш Анто́ние, па́стырю до́брый, чудотво́рче изря́дный и моли́твенниче преди́вный! Ты во дни земна́го жития́ твоего́ нището́ю духо́вною, кро́тостию и чистото́ю се́рдца себе́ укра́сив, жа́ждою пра́вды, ми́лостынею и пла́чем покая́нным за́поведи Ева́нгельския испо́лнил еси́. Дух ми́рен стяжа́в и да́же до конца́ дней твои́х бли́жним послужи́в, Бо́гу угоди́л еси́ и Ца́рствия Небе́снаго дости́гл еси́. Ны́не же, со святи́телями Воро́нежскими Митрофа́ном и Ти́хоном Престо́лу Бо́жию предстоя́, моли́ Пресвяту́ю Тро́ицу па́ству твою́ до́бре упра́вити и всем вся, я́же ко спасе́нию поле́зная, пода́ти. Испроси́ у Отца́ Небе́снаго, Врача́ душ и теле́с, боля́щим исцеле́ние, скорбя́щим и озло́бленным утеше́ние, гре́шным покая́ние, неве́дующим вразумле́ние. Моли́ Сы́на Бо́жия, Го́спода на́шего Иису́са Христа́, о́троки в стра́се Бо́жии наста́вити и в целому́дрии возрасти́ти, ю́ныя во благоче́стии утверди́ти, ста́рыя без попече́ния не оста́вити. Умоли́ и Ду́ха Свята́го Уте́шителя Животворя́щаго Це́ркви Правосла́вней в еди́нстве сохраня́тися, па́стырем ре́вность о спасе́нии пасо́мых дарова́ти, да лю́дие в ве́ре, наде́жди и любви́ Бо́жией утвердя́тся и сла́вится от всех пречестно́е и великоле́пое и́мя Пресвяты́я Тро́ицы, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Величание

Велича́ем тя,/ святи́телю о́тче Анто́ние,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.

Тексты тропаря, кондака, молитвы и величания (в составе службы) утверждены к общецерковному богослужебному употреблению на заседании Священного Синода 29 декабря 2022 года (журнал № 130).

Ин тропарь, глас 8:

Правосла́вия наста́вниче, чистоты́ зерца́ло, мона́шескаго жития́ ревни́телю и ни́щих пита́телю, оте́ческаго попече́ния о па́стве твое́й до́брый о́бразе, от ю́ности себе́ смири́вый и десни́цею Христо́вою в сла́ву святы́х возвы́шенный, земли́ Воро́нежския украше́ние, Анто́ние о́тче на́ш, в труде́х святи́тельских Митрофа́ну и Ти́хону поревнова́вый,// с ни́миже в небесе́х ны́не лику́я, моли́ся Спа́су все́х дарова́ти ми́р и душа́м на́шим.

Ин кондак, глас 3:

От ю́ности твоея́ всего́ себе́ Го́сподеви преда́л еси́, в пеще́рах Ки́евских богому́дренно пребыва́я, и отту́ду во епи́скопа па́стве Воро́нежстей поста́вленный, святи́телю Христо́в Анто́ние всече́стне, в труде́х, бде́ниих и моли́твах до́бле подвиза́лся еси́, и та́ко во смире́нии дости́г доброде́телей соверше́нства и Це́ркви Святе́й и́стиннаго послуша́ния, па́ки в Небе́сныя Оби́тели всели́лся еси́, с вели́кими во святы́х Митрофа́ном и Ти́хоном, предстоя́ Престо́лу Христо́ву, Влады́ку Спа́са все́х моли́, оставле́ние грехо́в получи́ти и ве́лию ми́лость.

Молитва

О, святи́телю Христо́в, о́тче Анто́ние, свети́ло пресла́вное земли́ Воро́нежския! Ско́рый помо́щниче все́м с ве́рою к тебе́ притека́ющим, услы́ши ны́не на́ш во́пль серде́чный, к тебе́ возноси́мый. Исхода́тайствуй на́м ве́чное спасе́ние и проще́ние мно́жества грехо́в на́ших. Моли́ся приле́жно, да поми́ловани бу́дем, и Ца́рствия Небе́снаго насле́дницы яви́мся. Та́же и в многоразли́чных ско́рбех и ну́ждах на́ших помози́ на́м: боля́щия исцели́, оби́димыя защити́, печа́льныя возвесели́, о Держа́ве Росси́йстей и лю́дех ея́ моли́тву те́плую сотвори́. Егда́ же прибли́зится вре́мя сконча́ния земна́го жития́ на́шего, моли́, да не без покая́ния и причаще́ния Святы́х Христо́вых Та́ин оты́дем, да неосужде́нно предста́нем Царю́ Сла́вы, гро́зному Судии́ все́х и да сподо́бимся со все́ми святы́ми сла́вити Еди́наго И́стиннаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.