Святителю Афанасию, Патриарху Константинопольскому, Лубенскому чудотворцу (тропарь, кондак и молитва)

Тропарь, глас 8:

Прему́дростию уче́ний твои́х ца́рствующий град просвети́в,/ тьму неве́дения ерети́ческого разгна́л еси́, преблаже́нне;/ твое́ благослове́ние земли́ Росси́йстей прине́сл еси́,/ о́тче наш, святи́телю Афана́сие,/ иде́же сконча́в тече́ние твое́,/ на кри́лех чистоты́ возлете́л еси́ в Небе́сное Ца́рство.// Моли́ Христа́ Бо́га непреста́нно о душа́х на́ших.

Кондак, глас 8:

О всесвяте́йший па́стырю и учи́телю вселе́нныя,/ преблаже́нне о́тче наш святи́телю Афана́сие!/ К ра́це моще́й твои́х припа́дающе, усе́рдно мо́лим тя:/ приими́ от убо́гих душ на́ших любо́вию приноси́мая тебе́ моле́ния/ и, я́ко име́я дерзнове́ние у Престо́ла Влады́чня,/ испроси́ моли́твами твои́ми чту́щим тя/ со А́нгелы и все́ми святы́ми // непреста́нно Пресвяте́й Тро́ице воспева́ти: аллилу́ия.

Молитва первая

О святи́телю Христо́в, уго́дниче Бо́жий Афана́сие! Веле́нием Бо́жиим жре́бий служе́ния святи́тельскаго восприи́м и крест Христо́в на ра́мена своя́ возложи́в, был еси́ па́стырь до́брый, свети́льник веесве́тлый, столп непоколеби́мый, Це́ркве служи́тель ве́рный, иера́рхов нача́льник, Правосла́вия защи́тник, нече́стия искорени́тель, сего́ ра́ди и водвори́лся еси́ в дому́ Го́спода твоего́. Тебе́ у́бо про́сим: моли́ся о нас, с ве́рою и любо́вию притека́ющих к честны́м и многоцеле́бным моще́м твои́м, не отри́ни прося́щих у тебе́ по́мощи в ско́рбех и боле́знех. Моли́твою твое́ю предста́ни ко Всевы́шнему Влады́це, исхода́тайствуй я́же на по́льзу душ и теле́с на́ших и отве́рзи нам две́ри милосе́рдия Бо́жия. Хода́тайством твои́м сохрани́ Це́рковь Святу́ю тве́рду и непоколеби́му от наве́т вра́жиих. Моли́ Го́спода и Влады́ку, да ти́хое и безмо́лвное житие́ поживе́м во вся́ком благоче́стии и чистоте́. Соблюди́ храм сей, в не́мже всели́лся еси́, от вся́ких бед и напа́стей и от всех враг ви́димых и неви́димых, и, я́коже в жи́зни кри́тския лю́ди от непра́веднаго ага́рянскаго убие́ния изба́вил еси́, та́ко и ны́не на Небесе́х непреста́нно моли́ся ко Го́споду изба́витися нам от вся́каго зла́го обстоя́ния. Пода́ждь ру́ку по́мощи и всем правосла́вным христиа́ном, притека́ющим к честны́м и нетле́нным моще́м твои́м и в моли́твах свои́х тя призыва́ющим. Ускори́ на моли́тву и потщи́ся на по́мощь, и́миже ве́си судьба́ми, да вси, безприкла́дное Бо́жие милосе́рдие ви́дяще и ча́емую по́мощь получи́вше, сла́вят пода́вшаго тебе́ си́лу и сла́ву Отца́ и Сы́на и Свята́го Ду́ха, во Еди́нем Существе́ сла́вимаго Бо́га, ны́не, и при́сно, и во ве́ки веко́в. Ами́нь.

Молитва вторая

О вели́кий и ди́вный святи́телю Христо́в Афана́сие Богому́дре, свети́льниче Це́ркве вселе́нския, Лу́бенский и всея́ Росси́и чудотво́рче и покрови́телю! Ты от ю́ности вся жите́йская оста́вль, к Бо́гу любо́вию и духо́вным благоразу́мием наставля́ем, увещава́л еси́ вся челове́ки, глаго́ля: что нам бога́тство, что нам зла́то, сла́ва и могу́тство? – ды́мове, расходя́щиися по возду́ху: вся та исче́знут, вся та понесе́т ве́тер! Многорачи́тельно же в бу́дущем ве́це да бу́дет нам бога́тство. Та́ко поуча́я, сам щедр, благосе́рд, кро́ток, смире́н и всем благопристу́пен был еси́. Те́мже и во успе́нии твое́м Всеблаги́й Госпо́дь тмочи́сленными чудесы́ озари́ и просла́ви нетле́нныя мо́щи твоя́. Име́я у́бо ко Го́споду дерзнове́ние, заступи́ и спаси́ хода́тайством всю храни́мую тобо́ю зе́млю Росси́йскую и град сей, в не́мже святы́ми моща́ми твои́ми почива́ти благоизво́лил еси́. Моли́ Христа́ Бо́га, да отпу́стятся всем нам согреше́ния на́ша, во́льная и нево́льная, да изба́вимся от всех враг ви́димых и неви́димых, от вся́ких бед и скорбе́й и вся́ких неду́гов. Моли́, да ми́лостив бу́дет всем нам Госпо́дь и зде и в бу́дущем ве́це, и преста́вльшияся от нас отцы́ и бра́тию, ма́тери и се́стры и ча́да на́ша, в ли́ки святы́х вчини́в, в ме́сте све́тле упоко́ит; да, предстоя́ще и покланя́ющеся ра́це моще́й твои́х, и́мамы тя неусыпа́ющаго моли́твенника и предста́теля о нас ко Го́споду и благода́рне с любо́вию велича́ем просла́вльшаго и послу́шающаго Тя в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.