Святителю Иннокентию, митрополиту Московскому, апостолу Сибири и Америки (тропари, кондак и молитвы)

Тропарь, глас 1:

Во вся страны́ полу́нощныя изы́де веща́ние твое́, / я́ко прие́мшия сло́во твое́, / и́хже боголе́пно научи́л еси́, / неве́дущия Христа́ све́том Ева́нгелия просвети́л еси́, / челове́ческия обы́чаи украси́л еси́, / Росси́йская похвало́, святи́телю о́тче наш Инноке́нтие, / моли́ Христа́ Бо́га // спасти́ся душа́м на́шим.

Ин тропарь, глас 3:

Пе́рвый учи́тель пре́жде те́мным язы́ческим племена́м, / пе́рвый возвести́тель им пути́ спаси́тельнаго, / апо́стольски потруди́выйся в просвеще́нии Сиби́ри и Аме́рики, / святи́телю о́тче наш Инноке́нтие, / Влады́ку всех моли́ / мир вселе́нней дарова́ти // и душа́м на́шим ве́лию ми́лость.

Кондак, глас 4:

И́стинный и нело́жный учи́тель был еси́: / запове́данная бо Го́сподем сам сотвори́в, / и́мже учи́л еси́ и наказа́л еси́ ко благоче́стию приходя́щая ча́да, / неве́рныя вразумля́л еси́ позна́ти ве́ру и́стинную, / просвеща́я их святы́м Креще́нием. / Сего́ ра́ди со апо́столы ра́дуешися, // прие́мля по́честь благове́стника Христо́ва.

Молитва первая

 О па́стырю до́брый и учи́телю прему́дрый, о́бразе благонра́вия всем, благоче́стно жи́ти хотя́щим, святи́телю о́тче наш Инноке́нтие! К тебе́, я́ко ча́да ко отцу́, прибега́ем и мо́лимся, помина́я твою́ любо́вь к лю́дем: бу́ди щит несокруши́м Святе́й Це́ркви Правосла́вней и оте́честву на́шему, архиере́и благоле́пием святи́тельства и прему́дростию украси́, па́стырем в служе́нии ре́вность да́руй, мона́шествующия к по́двигом до́браго тече́ния в послуша́нии утверди́, правосла́вным христиа́ном ве́ру святу́ю непоро́чну соблюсти́ умоли́, мир весь предста́тельством твои́м умири́. Те́плый наш моли́твенниче, всеросси́йский свети́льниче, просвети́телю Сиби́ри и Аме́рики, осени́ го́рним благослове́нием нас, в ско́рбех су́щих, и пода́ждь утеше́ние и избавле́ние от боле́зней душе́вных и теле́сных; испроси́ нам свы́ше дух кро́тости, целому́дрия, смиренному́дрия, терпе́ния и любве́, да про́чее вре́мя жития́ на́шего в ве́ре и покая́нии поживе́м и в жи́зни ве́чней благода́рне восхва́лим просла́вльшаго тя Го́спода – Отца́, и Сы́на, и Свята́го Ду́ха, Тро́ицу Единосу́щную и Неразде́льную, ны́не и при́сно и во ве́ки веко́в. Ами́нь.

Молитва вторая

О святи́телю Христо́в Инноке́нтие, новоявле́нный уго́дниче! К тебе́ припа́даем, раби́ Бо́жии (имена), и мо́лимся: всели́ в сердца́ на́ша любо́вь твою́, е́юже к Бо́гу и бли́жним твои́м в житии́ твое́м преиспо́лнен был еси́. Моли́ Христа́ Бо́га, да отпу́стятся нам согреше́ния на́ша во́льная и нево́льная, да изба́вимся от всех враг ви́димых и неви́димых, от вся́ких бед и скорбе́й и вся́ких неду́гов. Моли́, да ми́лостив бу́дет нам Госпо́дь и зде, и в бу́дущем ве́це и преста́вльшияся от нас отцы́ и бра́тию, ма́тери и се́стры, и ча́да на́ша, в ли́ки святы́х вчини́в, в ме́сте све́тле упоко́ит: да предстоя́ще и поклоня́ющеся ико́не твое́й, и́мамы тя неусыпа́ющаго моли́твенника и предстоя́теля о нас ко Го́споду, и благода́рно с любо́вию велича́ем просла́вльшаго и послу́шающаго тя, в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.