Святителю Антонию, епископу Вологодскому и Великопермскому, чудотворцу (тропарь, кондак и молитва)
Тропарь, глас 4:
И́же от ю́ности, Богому́дре, возсле́дуя Христу́,/ во бде́ниих и в поще́ниих пребыва́я,/ и па́ству от Бо́га дарова́нную ти до́бре пасы́й,/ и уче́ний Боже́ственных исполня́я и в жи́зненный путь наставляя́:/ отню́ду же и архиере́йства са́ном почте́ся,/ Це́рковь и лю́ди возвесели́л еси́;/ и по преставле́нии свое́м чуде́с лучи́ испуща́еши,/ неду́гом с ве́рою приходя́щим к тебе́ исцеле́ние подая́,/ и сле́пу младе́нцу свет дарова́,/ уго́дниче Христо́в, святи́телю Анто́ние,/ предстоя́ Престо́лу Христо́ву с ли́ки А́нгельскими,/ с ни́ми же моли́ Его́ о нас, притека́ющих к тебе́,// получи́ти от Него́ оставле́ние грехо́в и ве́лию ми́лость.
Кондак, глас 8:
Возвесели́ся, Христо́ва Честна́я Це́рковь,/ прии́мши тя в не́дра своя́ па́стыря и учи́теля;/ мы же, ве́рнии лю́дие, прославля́ем Пода́вшаго ти благода́ть неоску́дну,/ я́же твори́ши пресла́вная чудеса́./ Тем, святи́телю, не преста́й моля́ Христа́, Ему́же угоди́л еси́,/ о нас хва́лящих и чту́щих тя, к тебе́ притека́ющих,/ пода́ти ми́лость зде и в день Су́дный, да зове́м ти:// ра́дуйся, святи́телю Анто́ние, гра́ду на́шему похвала́ и утвержде́ние.
Молитва
О свяще́нная главо́, богоно́сне о́тче наш, богому́дре святи́телю Христо́в Анто́ние, па́стырю наш до́брый. Градо́в Во́логды и Перьми архиере́ю пресла́вный и украше́ние пресве́тлое. Преди́вный чудотво́рче, ко святы́м моще́м твои́м (ко святе́й ико́не твое́й) притека́юще, усе́рдно мо́лим тя: при́зри на ны, па́мять твою́ соверша́ющих и под кров моли́тв твои́х ны́не прибега́ющих, проле́й те́плое твое́ моле́ние ко Спа́су всех, я́ко да огради́т ми́ром держа́ву на́шу, святы́я оби́тели, гра́ды и ве́си ея́ и град наш до́бре да сохрани́т, благоче́стие лю́дем Свои́м да́рует, Правосла́вную же Це́рковь па́ки и па́ки да утверди́т и испо́лнит вся блага́я проше́ния рабо́в Свои́х, я́же ко спасе́нию. О всепозлаще́нный сосу́де Всесвята́го Ду́ха, бу́ди нам хода́тай ве́чных благ, да прославля́ем ди́внаго во святы́х уго́дницех Свои́х Бо́га на́шего Отца́ и Сы́на и Свята́го Ду́ха, всегда́, ны́не и при́сно и во ве́ки веко́в. Ами́нь.
Назад к списку
