Святителю Никите, затворнику Печерскому, епископу Новгородскому (тропари, кондаки и молитва)
Тропарь, глас 2:
Небе́снаго простра́нства жела́я, / от ю́ности в те́сне ме́сте затвори́лся еси́, / в не́мже прельще́н быв от врага́, / па́ки смире́нием и послуша́нием победи́л еси́ преле́стника кре́пце, Ники́то, / и ны́не, предстоя́ Христо́ви, // моли́ спасти́ся всем нам.
Ин тропарь, глас 4:
Наслади́вся, Богому́дpе, воздеpжа́ния/ и жела́ние пло́ти твоея́ обузда́в,/ на пpесто́ле святи́тельства сел еси́,/ и я́ко звезда́ многосве́тлая, пpосвеща́я ве́pных сеpдца́/ заpя́ми чуде́с твои́х,/ о́тче наш, святи́телю Ники́то,/ и ны́не моли́ Хpиста́ Бо́га,// да спасе́т ду́ши на́ша.
Кондак, глас 1:
Победи́в вра́жия ле́сти до́бле / и све́тло доброде́тельми просия́в, / святи́тельства оде́ждою обле́клся еси́, пресла́вне Ники́то, / в не́мже све́том жития́ твоего́ и чудесы́ сия́я па́че со́лнца, / мно́гих просвети́в, приве́л еси́ Христо́ви, // Его́же моли́ о нас, пою́щих тя.
Ин кондак, глас 6:
Архиере́йства са́ном почти́вся/ и чи́сте Чисте́йшему предстоя́,/ приле́жно моле́ние за лю́ди твоя́ приноси́л еси́,/ я́ко и дождь моли́твою све́л еси́,/ овогда́ же и гра́да запале́ния угаси́л еси́./ И ны́не, святи́телю Ники́то,/ моли́ Христа́ Бо́га,/ спасти́ лю́ди твоя́ моля́щияся,/ да вси́ вопие́м ти́:// ра́дуйся, святи́телю, о́тче преди́вный.
Молитва
О, архиере́ю Бо́жий, святи́телю Ники́то! Услы́ши нас гре́шных, днесь во свяще́нный храм сей сте́кшихся, и честно́му о́бразу твоему́ поклоня́ющихся, и ко свяще́нней твое́й ра́це припа́дающих, и умиле́нно вопию́щих: я́коже си́дя на престо́ле святи́тельства в Вели́ком Но́вегра́де сем, и еди́ною належа́щу бездо́ждию, дождь моли́твами свел еси́, и па́ки гра́ду сему́ о́гненным пла́менем обстои́му, моли́твою пла́мень о́гненный угаси́л еси́. И ны́не мо́лим тя, о святи́телю Христо́в Ники́то: моли́ся ко Го́споду, е́же изба́вити Вели́кий Но́вград сей и вся гра́ды и страны́ христиа́нские от тру́са, пото́па, гла́да, огня́, гра́да, меча́ и от всех враго́в ви́димых к неви́димых, я́ко да изря́дных ра́ди моли́тв твои́х спаса́еми, сла́вим Пресвяту́ю Тро́ицу, Отца́ и Сы́на и Свята́го Ду́ха, и твое́ ми́лостивное предста́тельство, ны́не и при́сно, и во ве́ки веко́в. Ами́нь.
Назад к списку
