Святителям Петру, Алексию, Ионе, Филиппу и Ермогену Московским и всея России чудотворцам (тропарь, кондак, молитва и величание)
Тропарь, глас 4:
Первопресто́льницы Росси́йстии, / и́стиннии храни́телие апо́стольских преда́ний, / столпи́ непоколеби́мии, правосла́вия наста́вницы, / Пе́тре, Алекси́е, Ио́но, Фили́ппе и Ермоге́не, / Влады́ку всех моли́те / мир вселе́нней дарова́ти, // и душа́м на́шим ве́лию ми́лость.
Кондак, глас 3:
Во святи́телех благоче́стно пожи́сте, / и лю́ди к Богоразу́мию наста́висте, и до́бре Бо́гу угоди́сте, / сего́ ра́ди от Него́ нетле́нием и чудесы́ просла́вистеся, // я́ко ученицы́ Бо́жия благода́ти.
Молитва
О, всехва́льные святи́тели Христо́вы и чудотво́рцы Пе́тре, Алекси́е, Ио́но, Ермоге́не и Фили́ппе! Приими́те сие́ ма́лое моле́ние от нас гре́шных, к вам прибега́ющих, и те́плым ва́шим предста́тельством умоли́те Го́спода и Бо́га на́шего Иису́са Христа́, я́ко да, призре́в на ны ми́лостивно, да́рует нам согреше́ний на́ших во́льных и нево́льных проще́ние, и по вели́цей Свое́й ми́лости изба́вит нас от бед, печа́лей, ско́рби и боле́зней душе́вных и теле́сных, обдержа́щих нас; да пода́ст земли́ плодоно́сие, и вся, я́же на по́льзу настоя́щаго жития́ на́шего потре́бная; да да́рует нам сконча́ти житие́ сие́ привре́менное в покая́нии, и да сподо́бит нас гре́шных и недосто́йных Небе́снаго Ца́рствия Своего́, со все́ми святы́ми сла́вити Его́ безконе́чное милосе́рдие, со Безнача́льным Его́ Отце́м и Святы́м и Животворя́щим Его́ Ду́хом, во ве́ки веко́в. Ами́нь.
Величание
Велича́ем вас,/ святи́телие Христо́вы,/ Пе́тре, Алекси́е, Ио́но, Фили́ппе и Ермоге́не,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.
Назад к списку
