Святителю Иову, Патриарху Московскому и всея Руси (тропари, кондаки, молитва и величание)

Тропарь, глас 3:

Да торжеству́ет Це́рковь Христо́ва/ и да ра́дуется град Москва́/ я́ко возсия́ свети́льник земли́ Росси́йския/ во испове́дании И́стины непоколеби́мый И́ов Патриа́рх,/ его́же моли́твами, Го́споди,/ вся собла́зны ми́ра сего́ и е́реси искорени́,/ лю́ди во благоче́стии наста́ви// и утверди́ в Правосла́вии.

Ин тропарь, глас 5:

Правосла́вия побо́рниче, / ве́ры Христо́вы испове́дниче, / первоиера́рше Це́ркве Ру́сския, / святи́телю о́тче И́ове, / за ны Христа́ Бо́га моли́, / ве́ру оте́ческую утверди́ти, / грехо́в оставле́ние нам дарова́ти // и пода́ти ми́ру ве́лию ми́лость.

Ин тропарь, глас 5:

Правосла́вия побо́рниче, / ве́ры Христо́вы испове́дник был еси́, / первоиера́рше Це́ркве Ру́сския, / святи́телю о́тче И́ове, / за ны Христа́ Бо́га моли́: / ве́ру оте́ческую утверди́ти, / грехо́в оставле́ние нам дарова́ти // и пода́ти ми́ру ве́лию ми́лость.

Кондак, глас 6:

Свети́льник Це́ркве Ру́сския/ и па́стырь до́брый яви́лся еси́,/ святи́телю о́тче И́ове,/ моли́твою твое́ю ко Го́споду/ храни́ зе́млю Росси́йскую// и спаси́ ду́ши на́ша.

Ин кондак, глас 7:

В годи́ну лю́тых искуше́ний / многострада́льному И́ову подо́бяся, / в же́ртву жи́ву и непоро́чну / себе́ Христу́ прине́сл еси́, / обрати́в па́ству к покая́нию, / терпели́ве И́ове святи́телю, / моли́ и нам за вся благодари́ти Го́спода / и всегда́ воздава́ти // сла́ву Бо́гови.

Молитва

О пресла́вне о́тче наш И́ове, пе́рвенец во Патриа́рсех Росси́йских и ве́рный испове́дниче Христо́в! Во дни святи́тельства твоего́ му́дро Це́рковь Росси́йскую пасл еси́, лю́ди просвеща́я и утвержда́я сло́вом Христо́вы ве́ры, хра́мы и оби́тели созида́я, та́же Це́рковь Росси́йскую укрепля́я от мо́ря до мо́ря и да́же до грани́ц Сиби́рских. Тверд муж и испове́дник Правосла́вныя ве́ры яви́лся еси́, о́тче, во времена́ попуще́ния Бо́жия, та́же поруга́ние и изгна́ние подъе́м, во оби́тели пусты́нней, иде́же и чин и́ноческий прия́л еси́, ду́шу твою́ в ру́це Бо́жии све́тло пре́дал еси́. Не преста́й, свя́тче Бо́жий, первосвяти́телю Христо́в, лю́ди земли́ твоея́ укрепля́ти ве́ру Правосла́вную кре́пко держа́ти и во смире́нии пребыва́ти. Град сто́льный Москву́ сохрани́ и от нахожде́ния лю́тых изба́ви. О святи́телю прети́хий и прему́дрый! Сподо́би и нас све́тлости ра́ди жития́ твоего́ смиренному́дрию поучи́тися, да та́ко живу́ще, ми́рный коне́ц сподо́бимся прия́ти и Ца́рствие Христа́ Сы́на Бо́жия получи́ти сла́вным и ми́лостивыми моли́твами твои́ми. Ами́нь.

Поставление святителя Иова, патриарха Московскаго и всея Руси (начало патриаршества в Русской Церкви)

Тропарь, глас 8:

Препросла́влен еси́, Христе́ Бо́же наш,/ И́ова пе́рваго Патриа́рха Руси́ свя́тостию просла́вивый/ и тем во и́стинней ве́ре лю́ди Твоя́ наста́вивый,// Многоблагоутро́бне, сла́ва Тебе́.

Кондак, глас 4:

Пе́рвый в Патриа́рсех Росси́йских,/ И́ове, досточу́дне о́тче наш,/ па́ству твою́ до́бре упа́сл еси́,/ и ве́рен да́же до конца́ пребы́л еси́./ Те́мже мо́лим Тя, святи́телю Христо́в:/ Це́рковь и Оте́чество на́ше во благоче́стии укрепи́// до сконча́ния ве́ка.

Молитва

Бо́же вели́кий и ди́вный, прему́дрым и всеблаги́м Твои́м про́мыслом управля́я вся́ческая, созда́вый Це́рковь Твою́ Святу́ю и утверди́вый ю́ святы́ми Твои́ми апо́столы, благочести́выми царьми́, святи́тельми и учи́тельми и вся му́дре ко спасе́нию люде́й Твои́х устроя́яй! Приими́ благодаре́ние раб Твои́х, ны́не приноси́мое Тебе́ о Твои́х вели́ких благодея́ниих ко отце́м на́шим, в пре́жния ве́ки бы́вших, и о неизрече́нней Твое́й ми́лости, в благознамени́тый сей день я́вльшейся, во́ньже благоволи́л еси́ Це́ркве Ру́сския предстоя́теля святи́теля И́ова патриа́ршеским са́ном облещи́ и досто́йна духо́внаго отца́ лю́дем Ру́сским того́ яви́ти, последи́ же и гоне́ния за ве́ру Правосла́вную претерпе́ти сподо́бил еси́. Те́мже мо́лим Тя, Царю́ Святы́й: не преста́ни и на бу́дущее вре́мя всеблаги́м Твои́м про́мыслом назира́ти Це́рковь Твою́ Святу́ю и Оте́чество на́ше от вся́каго кова́рства вра́жия огражда́ти, во благоче́стии же лю́ди Твоя́ укрепи́ти и на защище́ние Ева́нгельских Твои́х уче́ний вся ны наста́вити. Ты бо еси́ промышле́ние и заступле́ние на́ше, и Тебе́ сла́ву возсыла́ем Отцу́ и Сы́ну и Свято́му Ду́ху во ве́ки веко́в. Ами́нь.

Величание

Велича́ем тя,/ святи́телю о́тче наш И́ове,/ Це́ркве Ру́сския Патриа́рха пе́рваго/ и ве́ры Правосла́вныя// кре́пкаго побо́рника.

Тексты тропаря, кондака, молитвы и величания утверждены на заседании Священного Синода 14 мая 2026 года.