Собору Симбирских святых (тропарь, кондак и молитва)
Тропарь, глас 4:
Днесь све́тло красу́ется славне́йший град Симби́рск, / велича́я святы́х земли́ окре́стныя, / Андре́я блаже́ннаго и му́чеников и испове́дников, / юро́дством но́вым безу́мие ми́ра обличи́вших. / О, святи́и сро́дницы на́ши, / умоли́те Царя́ Небе́снаго, / да сохрани́т всю зе́млю и лю́ди Своя́, / невреди́мы от мечта́ний вра́жиих, // и спасе́т ду́ши на́ша, я́ко Милосе́рд.
Кондак, глас 6:
Избра́нницы Госпо́дни, / днесь прославля́ются во гра́де на́шем, / и́же не от ми́ра бы́вше, / посрами́ша ми́ром владе́ти хотя́щаго, / к небесе́м от него́ восте́кше: / те́мже и нас научи́те, / бе́гати греха́ и сыно́в его́, / лю́дие Бо́жии святи́и, // сла́во Земли́ Симби́рския.
Молитва
О, пресла́внии Бо́жии уго́дницы, вси святи́и Земли́ Симби́рския! Ка́ко похва́лим вас, похвалы́ себе́ не иска́вших? Зде бо, в земли́ на́шей, мно́ги суть пра́ведницы, Еди́ному Бо́гу ве́домии. О святы́й Андре́е блаже́нный, засту́пниче Симби́рский, не оста́ви нас, собла́знов удали́тися хотя́щих, оба́че поноше́ний от ми́ра стыдя́щихся. О святы́й Гаврии́ле, преподобноиспове́дниче Мелеке́сский, нау́чи нас Бо́га на́шего пра́во сла́вити, и подо́бно отце́м святы́м испове́дати. О священному́чениче Иоа́нне, до́брый па́стырю Томыло́вский, помози́ нам от Креста́ Госпо́дня не отступа́ти, да не лиши́мся Святы́х Та́ин благода́тнаго причаще́ния. О священному́чениче Нико́лае Горю́шкинский, научи́ нас роди́телей почита́ти, да не подве́ргнемся от чад на́ших посмея́нию. О священному́чениче Неофи́те, Симби́рска и Москвы́ похвало́, помози́ нам нача́льствующих в ро́де свое́м не злосло́вити, да не увлеку́т нас мудрецы́ лука́вии, от ни́хже и весь род наш поги́бнет. О священному́чениче Алекса́ндре Бря́ндинский, четыредесяти́ лет к Бо́гу отше́дый, испроси́ нам му́дрости ста́рческия, е́же ра́доватися и благослови́ти Бо́га на всяк день, и не забыва́ти о покая́нии. О священному́чениче Алекса́ндре, па́стырю Чума́кинский, вразуми́ нас, е́же благогове́ти о хра́ме Бо́жием, и по́мнити, я́ко и телеса́ на́ша хра́ми Бо́жии суть, да не оскверня́ем их. О Екатери́но преподобному́ченице, послу́шнице Христо́ва, ма́ти Симби́рская богому́драя, пода́ждь по́мысл до́брый сердца́м на́шим, е́же ми́ловати бли́жних, не на грехи́ их зря́ще, но прозрева́юще во вся́ком челове́це о́браз возлю́бленный. О вси святи́и на́ши сро́дницы, я́вленнии ми́ру и не я́вленнии, му́жие и жены́, ста́рцы и ю́ноши, де́вы и ча́да! Помози́те нам в еди́ном на потре́бу, да научи́мся люби́ти Бо́га, Творца́ вся́ческих, и о́браз Бо́жий в лю́дех. Уче́ний же лука́вых, я́же не то́кмо Бо́га отверга́ют, но и проти́ву о́браза Его́ до днесь вражду́ют, помози́те нам и ны́не отвраща́тися, да не поги́бнет вся земля́ на́ша, но до сконча́ния ве́ка сла́вит Бо́га, Отца́, и Сы́на, и Свята́го Ду́ха, в Тро́ице еди́наго. Ами́нь.
Назад к списку
