Собору преподобномучеников Казанских, в Свято-Успенском Зилантовом монастыре пострадавших (тропарь, кондак, молитва и величание)
Тропарь, глас 5:
Бо́жией Прему́дрости,/ Соде́тельной и Содержи́тельной Си́ле после́дующе,/ неизрече́нного ли́ка небе́сного достиго́сте,/ му́ченицы сла́внии:/ иде́же подвиза́лися есте́/ та́мо ны́не прославля́етеся,/ в ве́ре и благоче́стии ве́рных утвержда́юще,/ огражда́ете же и оби́тель Успе́нскую,/ науча́юще искуше́ниям противобо́рствовати./ Сего́ ра́ди мо́лим вы:// испроси́те душа́м на́шим мир и ве́лию ми́лость.
Кондак, глас 2:
Дре́вле зми́ева гора́/ просвеща́яся и́стины позна́нием,/ днесь освеща́ется кро́ви ва́шея тече́нием,/ пору́ганные и́мамы оби́тели воздви́жение,/ ва́шими, А́нгелов собесе́дницы, хода́тайствы // непреста́нно возноси́мыя о всех с ве́рою почита́ющих вас.
Молитва
О, непреобори́мии во́ини Христо́вы, добропобе́днии му́ченицы, преподо́бнии отцы́ на́ши: Се́ргие, Лавре́нтие, Серафи́ме, Феодо́сие, Лео́нтие, Стефа́не, Гео́ргие, Илларио́не, Иоа́нне и Се́ргие! Взира́юще на ве́ру ва́шу и на до́брое сконча́ние жи́зни вре́менныя, мо́лимся. Испроси́те нам у Го́спода, с любо́вию ва́шу па́мять чту́щим, исправле́ния жития́, в ве́ре утвержде́ние и му́жество в бра́ни на ны воздвиза́емой ду́хами зло́бы поднебе́сныя. Сохрани́те ны ва́шими моли́твами в ми́ре и любви́, да единомы́слием испове́мы Отца́ и Сы́на и Свята́го Ду́ха, ами́нь!
Величание
Велича́ем вас,/ преподо́бнии отцы́ Каза́нские,/ и чтим святу́ю па́мять ва́шу,/ вы бо мо́лите за нас // Христа́ Бо́га на́шего.
Назад к списку
