Собору Псковских святых (тропарь, кондаки молитвы)
Тропарь, глас 1:
Ны́не наста́ день сла́внаго торжества́, / и земля́ Пско́вская све́тло ра́дуется, / прославля́юще па́мять всех святы́х ней просия́вших, / сего́ ра́ди и мы, гре́шнии, дерза́ем приноси́ти вам хвале́бное пе́ние; / о всеблаже́ннии земли́ на́шея засту́пницы, / моли́теся ко Святе́й Тро́ице, / да ва́шим предста́тельством пода́ст благода́ть и мир стране́ Росси́йстей // и душа́м на́шим спасе́ние.
Кондак, глас 1:
Днесь лик святы́х земли́ Пско́встей просия́вших предстои́т в Це́ркви, / и неви́димо за ны мо́лится ко Святе́й Тро́ице,/ да досто́йни бу́дем оте́ц и бра́тий / в земли́ на́шей И́мя Твое́ просла́вльших // и сподо́бимся воспева́ти Его́ во вся ве́ки.
Молитва
О всеблаже́ннии и всехва́льнии уго́дницы Бо́жии, в земли́ Пско́встей просия́вшии и сию́ мно́гими звезда́ми равноа́нгельнаго жития́ укра́сившии, бу́дите моли́твенницы о оте́честве ва́шем, мы же про́сим предста́тельства ва́шего, е́же сохрани́те Дом Святы́я Тро́ицы – град Псков и вся гра́ды и ве́си Росси́йская земли́ от вся́каго зла и напа́сти, губи́тельства, гла́да, тру́са, пото́па, огня́, меча́, на́шествия иноплеме́нников и междоусо́бныя бра́ни. Моли́теся Живонача́льней Тро́ице о святе́й Правосла́вней Це́ркви и держа́ве Росси́йстей, да пребу́дут в ми́ре и благостоя́нии и сохраня́тся во благоче́стии христиа́нстем непоколеби́ми. О всечестны́й собо́ре а́нгелов на́ших, соблюди́те свяще́нныя оби́тели и хра́мы и всех подвиза́ющихся в них от вся́каго искуше́ния и напа́сти, всем же нам да́руйте покая́ние и сокруше́ние се́рдца, целому́дрие и воздержа́ние, да предста́тельством ва́шим со все́ми от ве́ка угоди́вшими святы́ми, водвори́мся и воздади́м сла́ву, честь и поклоне́ние Отцу́, и Сы́ну, и Свято́му Ду́ху во ве́ки веко́в. Ами́нь.
Молитва Псковским преподобным
О преподо́бнии и богоблаже́ннии отцы́ на́ши Ника́ндре, Иоаки́ме, Ону́фрие, Корни́лие, Са́вво, Евфроси́ние, Серапио́не, Илларио́не, Ма́рко, Ио́но, Вассиа́не, Дорофе́е, Марти́рие, Васи́лие, Иоаса́фе, Досифе́е, Харито́не, Игна́тие, Харла́мпие, Памфи́ле, Ни́ле, Фео́филе, Иа́кове, Авраа́мие, Корни́лие, Иоа́нне и про́чие чудотво́рцы Пско́вския! Приими́те ны́не нас, к вам усе́рдно моля́щихся и припа́дающих ко святы́м ико́нам ва́шим, ду́хом же на небесе́х предстоя́щих Святе́й Тро́ице со а́нгелы и преподо́бных оте́ц ли́ки, мо́литеся о нас, ча́дех ва́ших (имена), отцы́, да изба́вимся вся́ких ско́рбей, боле́зней, бед и обстоя́ний и благоче́стно поживе́м в настоя́щем житии́, ходя́ще в за́поведех и оправда́ниях Госпо́дних безпоро́чно. Испроси́те нам грехо́в проще́ние, телесе́м здра́вие и ве́чное спасе́ние, я́ко да ва́шим предста́тельством спаса́еми, сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.
Назад к списку
