Собору новомучеников и исповедников Белгородских (тропарь, кондак, молитва и величание)
Тропарь, глас 4:
Земли́ на́шея Белогра́дския/ новому́ченицы и испове́дницы:/ святи́телие Никоди́ме, Ону́фрие и Анто́ние,/ с ва́ми же – иере́е, диа́кони и миря́не благочести́вии,/ в житии́ свое́м све́том Христо́вым просия́вшии,/ за Него́же до́бре страда́вшии и венча́вшиися,/ и ны́не на́с, во труде́х и слу́жбах су́щих,/ предста́тельством свои́м вразумляющии и укрепля́ющии/ ко возрожде́нию и возвыше́нию Правосла́вия!/ Христа́ Бо́га моли́те/ ми́р и благоде́нствие Оте́честву на́шему дарова́ти // и душа́м на́шим — ве́лию ми́лость.
Кондак, глас 8:
Избра́нных святи́телей и му́чеников Бо́жиих/ досто́йнии сонасле́дницы,/ я́ко прия́вшии благода́ть победи́тельную,/ на́м, ны́не во стра́нствии су́щим/ прему́дрость и си́лу от Го́спода испроси́те,/ да благода́рственно к ва́м взыва́ем: // ра́дуйтеся, земли́ Белогра́дския похвало́ и утвержде́ние!
Молитва
О, святи́и сла́внии и добропобе́днии новому́ченицы и испове́дницы земли́ Белогра́дския: архипа́стырие и па́стырие, мона́шествующии и мирсти́и, во вся́цем ро́де и зва́нии до́бре по́двиг сво́й соверши́вшии и ве́ру Христо́ву да́же до кончи́ны соблю́дшии! Вы́ в годи́ну гоне́ний лю́тых и братоубийственныя бра́ни, постигшую страну́ на́шу от безбожников и отсту́пников, на непра́ведных суди́лищах, во вся́ческих обстоя́ниих и плене́ниих, темни́чных заточе́ниих и про́пастех земны́х, яви́ли есте́ о́бразы непоколеби́мыя ве́ры, терпе́ния, кро́тости и упова́ния на во́лю Бо́жию. От страда́ний же и кро́ве ва́шея, я́ко от се́мене до́браго, ве́ра и Це́рковь Христо́ва возраста́ют. Ве́мы бо, я́ко ны́не в одеждех бе́лых у Престо́ла Небе́снаго предстоите́ и на́м во служе́нии и труда́х благода́тно содействуете. Па́мять ва́шу собо́рне почита́юще, приле́жно мо́лим: испроси́те у́бо у Всемогу́щаго Влады́ки земно́му Оте́честву на́шему ми́р, благоде́нствие и процвете́ние, ве́ры правосла́вныя утвержде́ние, ересе́й и раско́лов низложе́ние, архипа́стырем, па́стырем и служи́телем Це́ркви — благода́тней по́мощи к досто́йному служе́нию, еще́ же и да́р прозре́ния и разсужде́ния духо́внаго; вла́сть предержа́щим — му́дрое правле́ние, христолюби́вому во́инству — си́л духо́вных и теле́сных укрепле́ние, всему́ же наро́ду Бо́жию — вся́ я́же ко спасе́нию проше́ния, да моли́твами Пресвяты́я Богоро́дицы, си́лою Честна́го и Животворя́щаго Креста́, предста́тельством честны́х Небе́сных Си́л Безпло́тных, святы́х сла́вных и всехва́льных апо́столов, добропобе́дных му́чеников, преподо́бных и богоно́сных оте́ц и все́х святы́х досто́йни бу́дем в де́нь Пра́веднаго Суда́ десна́го стоя́ния пред Престо́лом Триеди́наго Божества́ – Отца́ и Сы́на и Свята́го Ду́ха. Ами́нь.
Величание
Велича́ем вас,/ святи́и новому́ченицы и испове́дницы земли́ Белогра́дския,/ и чтим святу́ю па́мять ва́шу,/ вы бо мо́лите за нас // Христа́ Бо́га на́шего.
Назад к списку
