Собору Ростово-Ярославских святых (тропари, кондак, молитва и величание)
Тропарь, глас 4:
О благоче́стный собо́ре, / о лю́дие избра́ннии, / святи́телие преподо́бнии и пра́веднии, / и благове́рнии гра́ждане росси́йстии, / я́ко зве́зды, на тве́рди церко́вней / страны́ Росто́вския и Яросла́вския к Бо́гу предста́телие, / велича́ем с любо́вию вас, по пло́ти на́ших сро́дников. / вы же моли́теся дарова́ти мир стране́ и Це́ркви на́шей, / благослове́ние и ми́лость Бо́жию всем лю́дем, / всепроще́ние и спасе́ние, // хода́таи бо есте́ при́снии о нас ко Святе́й Тро́ице.
Тропарь святителям Ростовским, глас 4:
Святи́телие прему́дрии, / па́ствы ва́шея учи́телие богопросвеще́ннии, / ве́ру ева́нгельскую в лю́дех преумно́жившии, / любве́ Небе́сныя на земли́ достоподража́тельнии о́брази, / лю́ди страны́ Росто́вския и Яросла́вския приобща́вшии спасе́нию, / служи́телие вои́стинну Бо́жии / и соприча́стницы апо́столов досто́йнии яви́лися есте́, / Лео́нтие священному́чениче, Иса́ие, Игна́тие, Иа́кове, Фео́доре / и златослове́сниче Росси́йский Дими́трие, / Христа́ Бо́га моли́те / о архиере́ех, на престо́ле ва́шем прее́мницех, / о лю́дех, благоче́стно вас почита́ющих, / о стране́ на́шей правосла́вней // и о всей Христо́вей Це́ркви.
Кондак, глас 4:
Но́ваго Заве́та Бо́га с челове́ки храни́телие, / ева́нгельских за́поведей исполни́телие, / в до́брых де́лех соверше́ннии, / святи́телие му́дрии, преподо́бнии и пра́веднии Богоно́снии, / зе́млю Росто́вскую и Яросла́вскую / облагоуха́вшии моли́твами, / имену́емии вси и неимену́емии, / явле́ннии и сокрове́ннии, / предстоя́ще Живонача́льней Тро́ице, / не отступа́йте от нас ду́хом / и Боже́ственное милосе́рдие преклони́те к нам, / да с дерзнове́нием сла́ву Вы́шних Бо́гу вси прино́сим, / да пребу́дет на земли́ мир неруши́мый, / любо́вь же и благоволе́ние // посреде́ всех челове́к.
Молитва
О, святи́и уго́дницы Бо́жии, Бо́жии дру́зи, челове́цы Христо́вы, святи́телие и преподо́бнии и вси́, в Це́ркви прославле́нии! Ева́нгелие пропове́давшие сло́вом и жи́знию, по́двигом до́брым подвиза́стеся в земли́ Росто́встей и Яросла́встей, восприя́ли есте́ на небесе́х вене́ц пра́вды, его́же угото́вал е́сть Госпо́дь все́м лю́бящим Его́. Те́мже взира́юще на святы́й ва́ш о́браз, ра́дуемся о пресла́внем сконча́нии жи́тельства ва́шего и чти́м святу́ю па́мять ва́шу. Вы́ же, предстоя́ Престо́лу Бо́жию, приими́те моле́ния на́ша и ко Всеми́лостивому Бо́гу принеси́те, о е́же прости́ти на́м вся́кое прегреше́ние и по́мощи на́м ста́ти проти́ву ко́знем диа́вольским, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством ва́шим, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Величание
Велича́ем вас,/ святи́и вси́ земли Росто́вския и Яросла́вския,/ и чтим святу́ю па́мять ва́шу,/ вы бо мо́лите за нас // Христа́ Бо́га на́шего.
Назад к списку
