Собору преподобных отцов Святогорских (тропарь, кондак и молитва)

Тропарь, глас 4:

Свети́льницы многосве́тлии, на све́щнице Святы́х Гор поста́вленнии, / и мона́хов мно́жества учи́телие, / глас Христо́в в се́рдце свое́м услы́шавшии, / во оби́тель Бо́жия Ма́тере всели́лися есте́ / и та́мо в разли́чных о́бразех жития́ Бо́гу угоди́вшии, / да́ры духо́вныя от Него́ восприя́в, / Влады́ку всех моли́те / мир Це́ркви и Оте́честву на́шему дарова́ти // и душа́м на́шим ве́лию ми́лость.

Кондак, глас 1:

Отложи́вше пре́лесть ми́ра / и презре́вше го́рдость жите́йскую, / вре́менная а́ки су́етная вмени́ли есте́, / мона́шеское житие́ возлюби́в, / поноше́нии же и злострада́нии / я́ко зла́то в горни́ле очи́стишася, / и я́ко кри́ны се́льныя / во пусты́ни Святы́х Гор доброде́тельным житие́м процве́тшии, / дерзнове́ние ко Спа́су стяжа́в, / моли́теся ко Го́споду за оби́тель, град и лю́ди, / любо́вию свяще́нный ваш собо́р почита́ющия / и ве́рою вопию́щия: / ра́дуйтеся, преблаже́ннии и богоно́снии отцы́, // неусы́пнии моли́твенницы о душа́х на́ших.

Молитва

О преподо́бнии и богоно́снии отцы́ на́ши святого́рстии! Житие́м и по́двигами свои́ми стяжа́вшии нетле́нныя венцы́ Небе́сныя сла́вы и водвори́вшись со святы́ми в ве́чных оби́телях, нам земны́м я́ко бесце́нное сокро́вище многоце́нныя мо́щи своя́ оста́вили есте́, на них же взира́юще, мо́лим вас те́пле се́рдцем умиле́нным и сокруше́нным и из глубины́ душ на́ших взыва́ем к вам: Дру́зи Христо́вы, не оста́вьте предста́тельством ва́шим оби́тели, в ней же трудолю́бно подвиза́лися есте́, ме́сту сему́ сла́ву и благода́ть от Бо́га стяжа́в и са́мое ме́сто сие́ во свиде́тельство свя́тости жития́ ва́шего Святы́ми Гора́ми нарече́но бы́сть. Не оста́вьте нас си́рых, духо́внии сро́дницы на́ши и собра́тие, при́зрите на нас; моли́твами ва́шими поддержи́те на́ша немощны́я моли́твы ко Творцу́ вся́ческих; испроси́те у Пода́теля ве́чных благ мир во днех на́ших; Це́рковь незы́блему от ересе́й и раско́лов моли́твами ва́шими сохрани́те; Оте́чество безмяте́жно соблюди́те; дух покая́ния и па́мятования о Го́споде и Его́ святы́х за́поведех в сердца́х на́ших насади́те; рассла́бленныя ду́ши на́ши сном грехо́вным и мно́гою ле́ностию па́мятию сме́ртною и мы́слию о бу́дущем воздая́нии оживи́те; укрепи́те до́брые наме́рения нас, немощны́х; помози́те сами́м де́лом испо́лнити за́поведи Христо́вы, да поживе́м во вся́ком благоче́стии и чистоте́. Кончи́ну живота́ на́шего, испо́лнену покая́ния и Святы́х Та́ин прича́стну, испроси́те у Го́спода дарова́ти нам, гре́шным и недосто́йным, с любо́вию па́мять ва́шу соверша́ющим. Благоде́телем и доброде́ющим сотвори́те досто́йное, да ми́лостыни их пред Престо́лом Бо́жиим предста́нут во спасе́ние душ их. Бра́тии и всем правосла́вным христиа́ном да́руйте дух любви́ и единомы́слия, дух смире́ния и кро́тости, иска́ния еди́ного на потре́бу, жа́жду жи́зни духо́вной, е́ю же возжа́ждали в жити́и свое́м и напое́ни бы́вшее от исто́чника жи́зни, ороси́те и на́ша иссо́хшия умы́ и безпло́дныя ду́ши, да и мы, взира́я на приме́р жития́ ва́шего, принесе́м плод жи́зни духо́вной, стремя́сь ко блаже́нной ве́чности со Христо́м Спаси́телем, Ему́ же сла́ва со Отце́м и Святы́м Ду́хом во ве́ки веко́в. Ами́нь.