Преподобному Исааку Сирину (тропарь, кондак, молитва и величание)
Тропарь, глас 1:
До́бре свяще́нствуя во граде́х,/ и в пусты́нях всели́выйся процве́л еси́, Исаа́че,/ нача́льник мона́шествующим показа́лся еси́/ и учи́тель подви́жников,/ сего́ ра́ди па́мять твою́ достодо́лжно пра́зднующе, си́це взыва́ем:/ сла́ва просла́вльшему тя́ Христу́,/ сла́ва тя́ освяти́вшему, // сла́ва да́вшему на́м тя́, предста́теля иску́снаго.
Кондак, глас 8:
Я́ко иера́рха Богоно́снаго и преподо́бнаго,/ учреди́теля пу́стыни тя́ восхваля́ем,/ Исаа́че священноявле́нне, предста́телю на́ш./ Но я́ко име́яй дерзнове́ние ко Го́споду,/ о все́х моли́ чту́щих тя́ и взыва́ющих ти́: // ра́дуйся, о́тче богому́дре.
Молитва
О свяще́нная главо́, преподо́бне о́тче, преблаже́нне а́вво Исаа́че, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упасл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка (или: ико́на твоя́) пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными Си́лами, у Престо́ла Вседержителева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Величание
Ублажа́ем тя,/ преподо́бне о́тче Исаа́че,/ и чтим святу́ю па́мять твою́,/ наста́вниче мона́хов// и собесе́дниче А́нгелов.
Назад к списку
