Преподобному Феодору Санаксарскому (тропари, кондак, молитвы и величание)

Тропарь на Преставление, глас 4:

Ре́вностию Крести́телю уподобля́яся,/ от ю́ности Бо́гови угоди́в,/ ста́рец благода́тный мно́жеству учени́к яви́лся еси́,/ с ни́миже лику́еши на Небесе́х./ Фео́доре преподо́бне о́тче наш,/ моли́ Христа́ Бо́га // спасти́ся душа́м на́шим.

Ин тропарь, глас 4:

От ю́ности твоея́ сыно́вне Христа́ возлюби́л еси́,/ и то́кмо Го́сподеви служи́ти восхоте́в,/ благу́ю ча́сть избра́л еси́, я́же не исхища́ется сме́ртию./ Еди́ному на потре́бу себе́ преда́в и Жи́зни Пода́телю,/ от Него́же сподо́бился еси́ даро́в боже́ственнаго учи́тельства и духо́внаго разсужде́ния,/ окормля́я все́х прибега́ющих к тебе́ и и́щущих души́ спасе́ние,// богому́дре ста́рче Санакса́рский Фео́доре.

Ин тропарь, глас 4:

От ю́ности пусты́нное безмо́лвие возлюби́л еси́,/ и еди́ному Бо́гу то́чию порабо́тати возжеле́л еси́,/ мирски́я сла́вы со вся́ким смиренному́дрием удали́лся еси́,/ по́двигом до́брым подвиза́яся/ со ученики́ твои́ми я́ко зве́зды во оби́тели Санакса́рстей сия́я/ и вся притека́ющия к тебе́ ве́рныя просвеща́я./ Сего́ ра́ди, иму́ще тя на небесе́х те́плаго моли́твенника, / усе́рдно мо́лим тя, ча́да твоя́, о́тче Фео́доре:/ моли́ся о нас ко Го́споду Сил/ и Пречи́стей Богоро́дице// да спасе́т и просвети́т Собо́ю ду́ши на́ша.

Тропарь на Обретение мощей, глас 4:

Днесь све́тло красу́ется честна́я оби́тель твоя́,/ преподо́бне о́тче Фео́доре,/ мона́си со мирски́ми ликовству́ют/ обре́тше тя усе́рднаго засту́пника и те́плаго моли́твенника за ны,/ у Престо́ла Бо́жияго предстоя́щаго/ и за оби́тель и ча́да своя́ усе́рдно моля́щагося./ Сего́ ра́ди и мы приле́жно вопие́м ти:/ умоли́ о нас Всеми́лостиваго Бо́га// да спасе́т Богоро́дицею от сме́рти ду́ши на́ша.

Кондак, глас 2:

Ми́ра суету́ и вся я́же в нем тле́нная оста́вив, преподо́бне,/ в Санакса́рскую оби́тель всели́лся еси́,/ иде́же а́нгельски пожи́в,/ мно́гим путь был еси́ ко спасе́нию,/ сего́ ра́ди и Христо́с тебе́ да́ром разсужде́ния и учи́тельства обогати́,/ те́мже и мы вопие́м ти: // спаса́й ны, Фео́доре, святы́ми твои́ми моли́твами!

Молитва

О преподо́бне и богоно́сне о́тче наш ста́рче Фео́доре, Санакса́рския оби́тели Пресвяты́я Влады́чицы на́шея Богоро́дицы сла́во и похвало́! Ве́рный ра́бе Христо́в, сугу́баго да́ра разсужде́ния духо́внаго от Спаси́теля ми́ра сподо́бльшийся. Зане́ я́ко ви́дяще безвре́менную и безсла́вную кончи́ну и́скренняго твоего́, воззва́л еси́ ко Го́сподеви: где обря́щуся аз, а́ще в сицевы́х заста́неши мя? Во ад ли сни́ду или́ вчиню́ся в раи́? И глас ева́нгельский услы́шал еси́, его́же Христо́с изво́ли изрещи́: я́коже заста́ну, та́кожде и сужду́. И та́ко в се́рдце свое́м положи́л еси́: от тле́на ми́ра сего́ бе́гати и ду́хом ни́щенствовати, о гресе́х свои́х пла́кати, иска́ти кро́тости, пра́вды Бо́жией алка́ти и жажда́ти, неми́лостивых к тебе́ ми́ловати, се́рдце очища́ти, вражду́ющих умиротворя́ти, пра́вды ра́ди страда́ти, Христа́ ра́ди поноше́ния потерпе́ти, злосло́вие прия́ти, в злострада́ниях сих ра́доватися и мзды небе́сныя ча́яти. Та́кожде и пожи́л еси́ и сла́ву ве́лию прия́л еси́ за по́двиги земны́я на небеси́. Те́мже и мы взыва́ем ти: спаса́й нас, блаже́нне, твои́ми моли́твами. Оби́тель твою́ свято́ю сохрани́, бра́тию в по́двизе крестоноше́ния утверди́, послу́шникам терпе́ние ниспосли́, тружда́ющихся благослови́ и укрепи́, моля́щияся лю́ди услы́ши и вся блага́я жела́ния их испо́лни, всем же смиренному́дрия и́стиннаго, бла́гости непреле́стныя и любви́ соверше́нныя у Го́спода испроси́, да покло́нятся вси Бо́гу Еди́ному и и́стинному в Тро́ице Святе́й сла́вимому Отцу́, и Сы́ну, и Свято́му Ду́ху, и благода́рственныя своя́ хвалы́ Ему́ принесу́т ны́не и при́сно, и во ве́ки веко́в. Ами́нь.

Ина молитва

О, ра́досте на́ша! Па́стырю наш, преподо́бне о́тче Фео́доре! Воздыха́ем из глубины́ се́рдца на́шего и со слеза́ми вопие́м ти: ви́диши на́ше неможе́ние, во мра́це страсте́й пребыва́ние, сил душе́вных разслабле́ние, своево́лием обдержа́ние, плотоуго́дием плене́ние и вся́кия доброде́тели обнища́ние! Виждь плач и недоуме́ние на́ше! Вразуми́ ны и наста́ви на спасе́ния стези́, испроси́ нам у великодарови́таго Бо́га нищеты́ на́шея позна́ние, сле́зное покая́ние, нелицеме́рное смире́ние и в моли́тве непреста́нное терпе́ние, да си́ми бла́гость Его́ к себе́ приклони́м ко проще́нию грехо́в и сподо́бимся с тобо́ю ве́чно пребыва́ти во Ца́рствии Небе́снем, пою́ще и благословя́ще Всесвяту́ю Тро́ицу: Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Величание

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов // и собесе́дниче А́нгелов.