Преподобному Ионе (в схиме Петру) Киевскому (тропари, кондаки и молитвы)

Тропарь, глас 4:

Я́ко лучеза́рное со́лнце/ от коне́ц земли́ возсия́вшее,/яви́лся еси́ напосле́док дни́й,/ тезоимени́тому проро́ку подо́бяся во е́же воздви́гнути лю́ди к покая́нию./ Те́мже и Сама́ Пречи́стая с со́нмом святы́х тебе́ мно́гажды яви́шася,/ Ея́же повеле́нием создана́ бы́сть оби́тель во и́мя Живонача́льныя Тро́ицы./ К Не́йже име́я дерзнове́ние,/ моли́, преподо́бне о́тче на́ш Ио́но, // пода́ти на́м ми́лость и оставле́ние грехо́в в де́нь су́дный.

Ин тропарь, на перенесение мощей, глас 4:

Дне́сь пресве́тло красу́ется сто́льный гра́д Ки́ев,/ я́ко светолу́чными заря́ми, мо́лниями чуде́с твои́х осия́емь,/ всю́ вселе́нную созыва́ет похвали́ти тя́, Богому́дре Ио́но;/ пречестна́я же сла́вная оби́тель твоя́,/ ю́же во И́мя Святы́я Тро́ицы мно́гими труды́ твои́ми созда́л еси́, о́тче,/ иму́щи в себе́ ста́да учени́к твои́х, весе́лия и ра́дости исполня́ется./ Мы́ же, пра́зднующе пресла́вное обре́тение честны́х моще́й твои́х,/ в земли́ сокрове́нных, я́ко цве́т благоуха́нен и кади́ло благово́нно,/ любе́зно я́ лобыза́юще, разли́чная исцеле́ния прие́млем/ и твои́ми моли́твами грехо́в проще́ния сподобля́емся,/ о́тче преподо́бне Ио́но, // моли́ Святу́ю Тро́ицу спасти́ ду́ши на́ша.

Кондак, глас 2:

Чистото́ю душе́вною боже́ственно вооружи́вся,/ и непреста́нныя моли́твы я́ко копие́ вручи́в кре́пко,/ пробо́л еси́ бесо́вская ополче́ния Ио́но о́тче на́ш. // Моли́ непреста́нно о все́х на́с.

Ин кондак, на перенесение мощей, глас 8:

Насле́дник отце́в бы́л еси́, преподо́бне,/ те́х после́дуя житию́ и уче́нию, обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ // вопию́щим ти́: ра́дуйся, о́тче Ио́но.

Молитва

О, свяще́нная главо́, преподо́бне о́тче, преблаже́нне а́вво Ио́но! Не забу́ди убо́гих твои́х до конца́, но помина́й на́с всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же са́м упа́сл еси́, и не забу́ди посеща́ти ча́д твои́х. Моли́ за ны́, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны́ ко Го́споду, и не пре́зри на́с, ве́рою и любо́вию чту́щих тя́. Помина́й на́с, недосто́йных у Престо́ла Вседержи́телева, и не преста́й моля́ся о на́с ко Христу́ Бо́гу: и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва: а́ще бо те́лом и преста́вился еси́ от на́с, но и по сме́рти жи́в сы́й пребыва́еши. Не отступа́й от на́с ду́хом, сохраня́я на́с от стре́л вра́жиих и вся́кия пре́лести бесо́вския и ко́зней диа́вольских, па́стырю на́ш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со А́нгельскими во́инствы, со Безпло́тными ли́ки, с Небе́сными си́лами у Престо́ла Вседержи́телева предстоя́щи, досто́йно весели́тся. Ве́дуще у́бо тя́ вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о на́с всеси́льному Бо́гу о по́льзе ду́ш на́ших, и испроси́ на́м вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми Пра́ведными, от ве́ка угоди́вшими Го́споду на́шему Иису́су Христу́: Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.