Преподобному Макарию Оптинскому (тропарь, кондак и молитва)
Тропарь, глас 4:
Прему́дрость Боже́ственную по́двиги и труды́ стяжа́в,/ ста́рческаго служе́ния сугу́бую благода́ть восприя́л еси́,/ да́ром же сло́ва свы́ше обогаще́нный,/ Бо́гу и лю́дем усе́рдно послужи́л еси́,/ о́тче богому́дре Мака́рие,/ моли́ Христа́ Бо́га// спасти́ся душа́м на́шим.
Кондак, глас 3:
Блаже́нству тезоимени́тый,/ девятери́цу блаже́нств испо́лнил еси́/ и тяготы́ притека́ющих к тебе́,/ я́ко благо́е и́го Христо́во, поне́сл еси́,/ о всех душе́ю боле́знуя/ и всех вмеща́я в се́рдце свое́м./ Те́мже не забу́ди нас, чад твои́х,// О́птинская похвало́, Мака́рие блаже́нне.
Священный Синод на заседании 16-17 июля 2020 года (журнал № 34) утвердил к общецерковному богослужебному употреблению текст службы преподобному Макарию Оптинскому.
Молитва
О свяще́нная и богому́драя главо́, богоно́се о́тче наш Мака́рие. За труды́ и по́двиги твоя́, и́миже Христа́ просла́вил еси́ и от гла́да духо́внаго лю́ди росси́йския изба́вил еси́, Христо́с Госпо́дь Воплоще́нная нас ра́ди Прему́дрость излия́ на верх твой неувяда́емую сла́ву смиренному́дрия. И́мже вся супоста́ты вра́жия низложи́л еси́ и басносло́вное суему́дрие фило́софов обличи́л еси́. Те́мже у́бо о́тче, я́ко со святы́ми вмени́лся еси́ и боголе́пное житие́ в Раи́ живе́ши, не оста́ви нас си́рых, гре́шная и неразу́мная ча́да твоя́. Но боголюби́вою твое́ю моли́твою нас посети́: изба́ви от неразу́мия умы́ на́ша в суете́ мирсте́й вы́ну шата́ющияся, утверди́ сердца́ на́ша Стра́хом Бо́жиим и́же плоди́т нача́тки прему́дрости, коле́блющуюся во́лю на́шу остени́ за́поведьми Христо́выми да не на одесну́ю ниже́ шу́юю отсту́пим от зако́на Всевы́шняго. Оте́ческим преда́нием научи́ ны внима́ти и со опа́стсвом ты́я храни́ти, да насле́дницы святы́х отце́в яви́мся. При́сно же сохрани́ насле́дие твое́ и оби́тель твою́ в не́йже добропобе́дный по́двиг соверши́л еси́ и те́ло твое́ я́ко драгоце́нный би́сер в ней оста́вил еси́. Да вси притека́ющии к ра́це моще́й твои́х исцеле́ния прие́млют и Бо́га просла́вят Ди́внаго во святы́х Свои́х всегда́ ны́не и при́сно и во ве́ки веко́в. Ами́нь.
Назад к списку
