Преподобному Иосифу Оптинскому (тропари, кондаки и молитва)
Тропарь, глас 2:
Послужи́в ста́рцу твоему́ преусе́рдно,/ дарова́нии духо́вными оби́льно испо́лнился еси́/ и, я́ко свети́льник верху́ горы́ укры́тися немогу́щий,/ благообра́зне Ио́сифе преподо́бне,/ мона́шествующим и мирски́м наста́вник до́брый и предста́тель те́плый яви́лся еси́,/ те́мже моли́ Человеколю́бца Христа́ и Засту́пницу Усе́рдную,// спасти́ся душа́м на́шим.
Ин тропарь [на обретение], глас 3:
Я́ко к боже́ственней ча́ше утеше́ния,/ к ра́це моще́й твои́х притека́ем, о́тче Ио́сифе,/ ты бо, насле́довав благода́ть вели́каго ста́рца,/ напои́л еси́ то́ю оби́льно сосло́вия и́ноческая,/ избра́нниче возлю́бленный Бо́жия Ма́тере,/ те́мже с Не́ю моли́ся Христу́/ оби́тели твое́й дарова́ти утвержде́ние// и душа́м на́шим ве́лию ми́лость.
Кондак, глас 3:
Подобен: Красоте девства:
Кро́тостию и незло́бием украси́вся/ и целому́дрием в ле́поту оде́явся,/ тьму страсте́й прогна́л еси́,/ светолу́чныя же испуща́я, о́тче, моли́твы,/ яви́лся еси́ ста́рчества О́птинскаго похвала́ и изря́ден наста́вник мона́хов,/ те́мже вси зове́м ти:// ра́дуйся, богоно́се ста́рче Ио́сифе.
Ин кондак, глас 3:
Мир сия́нием озаря́еши,/ о́тче наш Ио́сифе блаже́нне,/ не́мощь бо естества́ препобеди́в,/ Ду́ха Свята́го сосу́д соде́лался еси́/ и, по́двиг ста́рчества восприи́м,/ му́дрый наста́вник ве́рным был еси́./ Ны́не, пребыва́я при́сно со святы́ми,// испроси́ нам ве́лию ми́лость.
Молитва
О, преподо́бне о́тче Ио́сифе, ста́рче О́птинский, ча́до возлю́бленное вели́каго ста́рца Амвро́сиа! Ты, от ю́ности Христа́ возлюби́в, да́же до сме́рти ве́рен Тому́ пребы́л еси́ и избра́нник возлю́блен Пречи́стыя Богоро́дицы яви́лся еси́. Ели́цы же не́когда лик твой благода́тный ви́деша, весе́лия Небе́снаго вы́ну исполня́хуся, та́ко и мы, о́тче, днесь к честны́м твои́м моще́м [или: к твоему́ свято́му о́бразу] припа́дающе, мо́лим тя: изба́ви нас от го́речи грехо́вныя, е́юже нас сопроти́вник напои́, помози́ нам, немощны́м, до́лу пони́кшим, не земна́я то́кмо и тле́нная зре́ти, но душе́ю живо́ю к житию́ ве́чному устремля́тися, грехо́в осужде́ния и злопомне́ния изба́витися, за́висти и гне́ву не предава́тися, да тиша́йшее дыха́ние благода́ти серде́ц на́ших косне́тся. Ей, о́тче, ты дар сове́та и блага́го разсужде́ния стяжа́л еси́, наста́ви и нас жизнь свою́ по во́ли Бо́жией устроя́ти. И та́ко, тобо́ю окормля́еми, пра́во по́йдем путе́м спаси́тельным и дости́гнем Ца́рствия Небе́снаго, иде́же вку́пе со все́ми святы́ми сподо́бимся прославля́ти Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.
Священный Синод на заседании 16-17 июля 2020 года (журнал № 34) утвердил к общецерковному богослужебному употреблению текст службы преподобному Иосифу Оптинскому.
Назад к списку
