Преподобному Иову (в схиме Иисусу), Анзерскому (тропари, кондаки и молитвы)

Тропарь, глас 5:

Безмо́лвия и́стинный рачи́тель быв,/ в пусты́ню во ото́це А́нзерстем всели́лся еси́,/ преподо́бне о́тче И́ове,/ Страсте́м же Госпо́дним усе́рдне покланя́яся,/ и́мя Иису́сово в се́рдце непреста́нно носи́л еси́,/ пустынножи́телей му́дрый наста́вниче,// моли́ Христа́ Бо́га спасти́ся душа́м на́шим.

Ин тропарь, глас 5:

Показа́вый о́браз доброде́телей, ве́сь стра́ха Бо́жия и Ду́ха Свя́та испо́лнен бы́сть, Преподо́бне о́тче И́ове, безмо́лвия и́стинный рачи́тель яви́лся еси́, страсте́м Госпо́дним покланя́яся, и́мже и оби́тель воздви́гл еси́ во ото́це А́нзерстем. Пустынножи́телей наста́вниче, моли́ Христа́ Бо́га спасти́ся душа́м на́шим.

Кондак, глас 8:

Боже́ственная восхожде́ния в се́рдце стяжа́в,/ и́хже ра́ди мно́ги ско́рби претерпе́л еси́,/ приста́нище обре́л еси́ в морсте́м ото́це,/ преподо́бнаго Елеаза́ра прее́мник заве́тов быв,/ Покро́вом Бо́жия Ма́тере осеня́емь,/ достоблаже́нне о́тче И́ове,// помина́й нас чту́щих святу́ю па́мять твою́.

Ин кондак, глас 8:

Любо́вь Христо́ву в се́рдце стяжа́, ея́же ра́ди мно́ги ско́рби претерпе́вый, приста́нище обре́л еси́ в морсте́м ото́це, Преподо́бнаго Елеаза́ра заве́тов ве́рный прее́мник яви́лся еси́, покро́вом Бо́жия Ма́тере осеня́емый: достоблаже́нне о́тче И́ове, помина́й на́с, чту́щих святу́ю па́мять твою́.

Молитва первая

O, преподóбне и богонóсне óтче наш И́ове! Пусты́ни Áнзерския безмóлвный обитáтелю, обéтов монáшеских и́стинный ревни́телю, áнгелов любéзный собесéдниче, и́ноков по Бóзе вéрный настáвниче! Чýдно житиé твоé, неисчи́слими пóдвизи твои́, вéлие пред Бóгом дерзновéние твоé! Мóлим тя, избрáнниче Христóв, посети́ немощствýющия дýши нáша, простри́ о нас тéплую к Бóгу моли́тву твою́, огради́ заступлéнием твои́м оби́тель, тебé во изгнáнии прии́мшую и на безмóлвие тебé подвигшую. Ты неустáнно в покая́нном плáчи пребывáвый, помози́ нам, погибáющим в нечýвствии и окая́нстве, твои́м благодáтным предстáтельством отвéргнутися вся́кия грехóвныя сквéрны и плоды́ и́стиннаго покая́ния Гóсподу принести́. Ты, украси́вый собóю сонм и́ноков соловéцких, украси́ нáше скýдное житиé, призывáя на нас благословéние Бóжие, да остáвивше вся дóлу влекýщая, обрати́м мы́сленная óчеса наша к Бóгу и и́стинных Небéсных благ наслади́мся. O, досточýдне И́ове, во смирéнии твоéм возвели́чивыйся и нищетóю твоéю обогати́выйся! Умоли́ Христá Бóга смирéнием дýши нáша украси́ти, оскудéвшая сердцá нáша Небéсными даровáнии испóлнити. Сподóби нас нищетý Христóву возлюби́ти и стяжáния Еди́наго Дýха Святáго в сéрдце своéм при́сно желáти. Ты, до концá зáповедь Бóжию о любви́ испóлнивый, недýгующим и стрáждущим со усéрдием вы́ну служи́вый и велию любóвь к лю́дем до послéдняго издыхания в сéрдце носи́вый, научи́ и нас сей вя́щшей добродéтели, да излиéт Господь, яко от приснотекýщаго истóчника в обнищáвшая сердцá нáша, капли Божественнаго мира Своея́ Божéственныя любвé. Ей, достоблажéнне И́ове, моли́твенниче к Бóгу усéрднейший и благоприя́тнейший, глубинóю сердéчною сокровéнныя тáйны Бóжия созерцáти сподóбивыйся, научи́ нас тéплая и сокрушéнная молéния к Томý простирáти, Имя Егó Сладчáйшее в сéрдце при́сно благодáрно храни́ти. Мóлим тя, преблаги́й óтче, богоугóднаго жития́ твоегó рáди сподóбившагося посещéния Мáтере Бóжия, и повелéние оби́тель Распя́тию Христá Бóга создáти от Нея́ прии́мшаго, испроси́ нам твоéю благомóщною моли́твою Тоя́ теплое заступлéние и покрóв. Не отлучáйся нас, раб твои́х, вéрою тебé моля́щихся и во благоврéменную пóмощь тя призывáющих. Моли́ за Церковь нашу и за оби́тели святыя сия, да процветает в них святы́ня Госпóдня, да не умóлкает в земли нашей глас воспевáющих Бóга, Емýже подобает слáва, честь и поклонéние во вéки векóв. Ами́нь.

Молитва вторая

O, преподóбне óтче И́ове, предстáтелю наш к Бóгу неусы́пный, моли́твенниче о душáх нáших дерзновéнный, пусты́ни Áнзерския красотó пресвéтлая, оби́тели Распя́тския си́ло духóвная! Мнóгими труды́ тя, Бóгу потруди́вшагося и к ли́ку и́ноческому приобщи́вшагося, сподóби Пресвятáя Богорóдица спаси́тельным Страстéм Христóвым послужи́ти, гóру безмóлвну, ю́же наречé Голгóфа, иноки населити. Óна же процветé чýдными пóдвиги и пóстническим житиéм твои́м и учени́к твои́х, и благодáть почи́ на ней, и слáва Небéсная озари ю́. Пóслежде же пáки оправди́ся и́мя горé сей за мнóжество зде претерпéвших гонéния и смерть вéры Христóвы и прáвды рáди, и слáва новомученников осия́ твою́ оби́тель, яже ныне от запустéния и поругáния воста, идéже и святы́я мóщи твоя́ я́ко многоцéнное сокрóвище во хрáме тобóю создáннем обретóшася. Темже, предстоя́ще сей святы́ни, усéрдно мóлим тя, достоблажéнне óтче: помози нам достодолжное почитание Всечестнаго Крестá Христова имéти, благодарéние сердéчное за ны распéншемуся Христý Бóгу выну приносити, воскресéния надéжду и уповáние спасéния к Томý простирати и, крест жития́ своегó взéмше, путéм Госпóдним шéствовати. И́ночествующих сподóби пóдвигом дóбрым подвизáтися и всем верным испроси́: в зáповедех Бóжиих хождéние, добродетелей исполнéние и Царствия Небеснаго присвоение, идеже вси святии непрестанно воспевáют Всесвятýю Трóицу, Отцá и Сы́на и Святáго Дýха, ны́не и при́сно и во вéки векóв. Ами́нь.