Преподобному Гавриилу (Ургебадзе) Самтаврийскому (тропарь, кондак и молитва)
Тропарь, глас 1:
Я́коже Влады́ка Христо́с сла́ву Свою́ неизглаго́ланную/ сокры́, пло́тию оде́явся,/ та́коже и ты юро́дства вре́тищем покры́л еси́/ свет Фаво́рский и́мже Тя Госпо́дь оси́я/ я́ко испове́дника и страда́льца,/ и па́стырь душ яви́лся еси́,/ о́тче преподо́бне Гаврии́ле,// моли́ Христа́ Бо́га поми́ловати ду́ши на́ша.
Кондак, глас 4:
Непости́жима есть ми́лость Бо́жия,/ Его́же благода́тию созда́ние обоже́но лицезре́ем вси,/ ты бо, преподо́бне о́тче,/ о́браз Творца́ в себе́ утверди́л еси́,/ возне́сши естество́ свое́ в подо́бие Бо́жие,/ те́мже сла́вим тя, о́тче Гаврии́ле, досто́йне похвалы́,/ я́ко был еси́ на земли́ гла́сом пра́вды и го́лубем чистоты́,/ жи́тельствовавши же в чу́дном смире́нии,/ звене́л еси́ ли́рою му́дрости и любви́ орга́ном,/ ны́не же на небесе́х предста́тельствуеши о спасе́нии на́шем,// хода́таю Бо́жия благода́ти.
Тропарь и кондак написаны архимандритом Кирионом (Ониани), переведены с грузинского на церковнославянский составителями полной службы Владиславом и Серафимом Алпатовыми (г. Москва, 2018 г.)
Молитва
О́, блаже́нне Гаврии́ле, древним отцем подо́бниче и тве́рдый веры испове́дниче, от младенства Госпо́да всем сердцем возлюбивый и ре́вностно Ему после́довавый! Мы же, яко раби́ недостойнии, благочестия и смире́ния не имущии, обаче себе́ на всяк день в души́ велича́ющии, ближних осуждающии, не и́мамы пред Бо́гом, чим оправдатися! Сего ради молим тя: моли́ за нас Господа, да пода́ст нам ум, сло́во Его разуме́ти, да бу́дем не то́кмо слы́шателие, но и ревностнии его творцы и да разуме́ем, я́ко ничесо́же мо́жем, кроме́ по́мощи Бо́жия.
Назад к списку
