Преподобному Антонию Оптинскому (тропарь, кондак и молитва)
Тропарь, глас 1:
Украси́лся еси́, о́тче Анто́ние, смире́нием,/ благода́тию же о́чи душе́внеи просвети́л еси́,/ разсужде́ние, я́ко верх доброде́тели, стяжа́л еси́,/ и послуша́нием Бо́гу угоди́л еси́,/ сего́ ра́ди со умиле́нием зове́м ти:/ сла́ва Да́вшему ти кре́пость,/ сла́ва Просла́вльшему тя,// сла́ва Подаю́щему тобо́ю нам исцеле́ния.
Кондак, глас 7:
Преподо́бне о́тче Анто́ние,/ се́рдцем младе́нствуя, Бо́гу пел еси́,/ ра́зумом ста́рец быв,/ ю́ныя наставля́л еси́,/ ду́хом высо́к,/ пред отцы́ и бра́тиею себе́ ума́лил еси́,/ ве́рный же в ма́лом,/ ны́не вели́к в Ца́рстве Бо́жием нарече́н еси́,// я́ко ты еси́ вои́стинну О́птины похвало́.
Молитва
Преподо́бне и богоно́сне о́тче наш Анто́ние, О́птинская похвало́, услы́ши нас, гре́шных, с ве́рою ко святы́м моще́м твои́м припа́дающих. Ты бо в житии́ твое́м, я́ко свети́льник, свет любве́ Христо́вы лю́дем ще́дро дарова́л еси́; я́ко оте́ц чадолюби́вый, вся́каго ка́ющагося с любо́вию принима́л еси́. Те́мже мо́лим тя, о́тче: я́ко име́яй моли́твенное дерзнове́ние ко Святе́й Тро́ице, испроси́ у Го́спода Оте́чество на́ше в ми́ре и благоде́нствии сохрани́ти, наро́д его́ в благоче́стии утверди́ти, па́стырей ре́вностию Бо́жиею испо́лнити, мона́шеския оби́тели соблюсти́, мона́хов стра́ху Бо́жию научи́ти и к моли́твенному де́ланию наста́вити: да вси чи́стым се́рдцем просла́вим Бо́га, в Тро́ице Еди́наго, Отца́ и Сы́на и Свята́го Ду́ха. Ами́нь.
Священный Синод на заседании 16-17 июля 2020 года (журнал № 34) утвердил к общецерковному богослужебному употреблению текст службы преподобному Антонию Оптинскому.
Назад к списку
