Преподобному Анатолию Оптинскому, старшему (Зерцалову) (тропарь, кондак и молитва)
Тропарь, глaс 3:
У́мныя моли́твы пресве́тлый свети́льниче,/ О́птины пу́стыни ди́вная похвало́,/ Це́ркве Ру́сския украше́ние,/ Небе́снаго Иерусали́ма граждани́не,/ о́тче Анато́лие преподо́бне,/ моли́ Христа́ Бо́га// спасти́ся душа́м на́шим.
Кондак, глас 2:
Подобен: Вышних ища:
Богодарова́нною ти моли́твою/ возсия́л еси́, я́ко боже́ственное свети́ло,/ посреде́ собо́ра О́птинских отце́в,/ просвети́в мона́шествующих ли́ки и наста́вив,/ е́же вопи́ти непреста́нно се́рдцем и усты́:// Го́споди, Иису́се Христе́, Сы́не Бо́жий, поми́луй нас.
Молитва
О, преподо́бне о́тче Анато́лие, ди́вный ста́рче О́птинский! Предстоя́ще ра́це моще́й твои́х (пред о́бразом твои́м святы́м), воспомина́ем ди́вное твое́ житие́ и по́двиги, во сла́ву Го́спода на́шего Иису́са Христа́ подъя́тыя. Ты, от ю́ности красоту́ ми́ра сего́ презре́в, возжела́л еси́ Бо́гу усе́рдно послужи́ти и, от роди́телей теле́сную добро́ту унасле́довав, па́че украша́лся еси́ души́ благоле́пием, е́же в терпе́нии стяжа́ти подоба́ет. Ты, от двои́х ста́рцев, блаже́ннаго Мака́рия и пречу́днаго Амвро́сия, воспита́нный, ста́рец духоно́сный соде́лался еси́, я́ко и богому́дрый святи́тель Игна́тий о тебе́ удивля́шеся.
О, ста́рче ди́вный! Ты, моли́твою непреста́нною вы́ну со Христо́м пребыва́я, вели́кую благода́ть стяжа́л еси́, те́мже и мно́гая ча́да, путь у́зкий и приско́рбный избра́вше, ра́достно вслед тебе́ теча́ху, к Восто́ку восто́ков приближа́ющеся. Мы же, словесы́ твои́ми наставля́еми и моли́твами твои́ми огражда́еми, со умиле́нием зове́м ти: не оста́ви нас, скорбьми́ обурева́емых, грехи́ мно́гими обремене́нных, от лука́ваго врага́ смуща́емых, но помози́ по́двигом до́брым подвиза́тися, ве́ру соблюсти́ и Све́та Небе́снаго дости́гнути, да досто́йно восприи́мем вся от Го́спода угото́ванная и вку́пе с тобо́ю зерца́лом разре́шшимся чи́сте у́зрим Бо́га на́шего в Тро́ице сла́вимаго, Отца́ и Сы́на и Свята́го Ду́ха, во Ца́рствии Его́. Ами́нь.
Священный Синод на заседании 16-17 июля 2020 года (журнал № 34) утвердил к общецерковному богослужебному употреблению текст службы преподобному Анатолию Оптинскому старшему.
Назад к списку
