Преподобному Герману Зосимовскому (тропарь, кондак и молитва)
Тропарь, глас 8:
Непреста́нныя моли́твы до́брый ревни́телю,/ святы́я пусты́ни му́дрый устрои́телю,/ богомы́слия и ста́рчества в ней насади́телю,/ доброде́тельми мно́гими, я́ко ри́зою укра́шенный,/ по́стническое житие́ яви́вый, преподо́бне о́тче Ге́рмане,/ приими́ нас, чту́щих любо́вию честну́ю па́мять твою́,/ да отве́ргнем льсти́вую пре́лесть ми́ра сего́/ те́плым предста́тельством твои́м у Престо́ла Вседержи́теля.
Кондак, глас 6:
В преподо́бстве и пра́вде му́жественне пожи́в,/ пустынножи́телю, о́тче Ге́рмане,/ мно́гим путь ко спасе́нию,/ я́ко звезда́ пресве́тлая, озари́л еси́/ и, всем быв для всех,/ Бо́гу и лю́дем усе́рдно послужи́л еси́.
Молитва
О, блаже́нне о́тче Ге́рмане! Земли́ Влади́мирския пресла́вная похвало́, чу́дный уго́дниче Христо́в и и́ноков ди́вное украше́ние! Зря́ще оби́тель Зоси́мову, стопа́ми мно́гих подви́жников освяще́нную, ны́не же зрак свой обнови́вшую, та́же и святы́я мо́щи твоя́ обре́тшую, ра́дуемся ея́ восхо́ду но́вому. Те́мже досто́йно воспева́ем тя, о́тче Ге́рмане, я́ко строи́теля оби́тели му́драго, наста́вника мона́хов неусы́пнаго, о́бщаго жития́ ре́вностнаго насади́теля, непреста́нныя моли́твы учи́теля, святы́х ико́н иску́снаго изо́графа и ста́рца ми́лостиваго. Ты, о ле́тех ско́рбных па́стырски воздыха́я, моли́твою и сове́том мно́гия ве́рныя лю́ди укрепля́л еси́. Ны́не же, благода́тию свы́ше облагоуха́нный, во Ца́рствии Небе́снем престо́лу Бо́жию предстоя́, моли́ся о нас, гре́шных, в страсте́х мно́зех пребыва́ющих, и о умире́нии во вражде́ су́щих, да озари́т Госпо́дь све́том покая́ния и исправле́ния житие́ начше, да с любо́вию просла́вим Пречестно́е и Великоле́пое и́мя Отца́ и Сы́на и Свята́го Ду́ха во ве́ки веко́в. Ами́нь.
Тексты тропаря, кондака и молитва утверждены решением Священного Синода от 15 июля 2016 года (журнал № 70).
Назад к списку
