Преподобному Антонию Радонежскому (тропарь, кондак и молитва)
Тропарь, глас 3:
Во́лю Бо́жию в житии́ твое́м взыску́я,/ предрече́ние преподо́бнаго Серафи́ма/ и Небе́сное призва́ние чрез святи́теля Филаре́та/ на служе́ние в Ла́вру вели́кую прия́л еси́./ И́стинный храни́тель заве́тов а́ввы Се́ргия быв,/ и́ноков наста́вник богому́дрый/ и Ла́вры благоукраси́тель иску́сный яви́лся еси́./ Ны́не же, предстоя́ Престо́лу Святы́я Тро́ицы,/ преподо́бие о́тче Анто́ние,// моли́ спасти́ся душа́м на́шим.
Кондак, глас 2:
Вы́шних жела́я улучи́ти, блаже́нне,/ от ю́ности Христу́ после́довал еси́,/ по́двигом и нра́вом святы́х оте́ц ревну́я,/ благода́ть ду́ха ми́рна стяжа́л еси́./ Сего́ ра́ди мно́жеству и́ноков/ и всем притека́ющим к тебе́/ ми́лостивый оте́ц яви́лся еси́./ Те́мже с любо́вию вопие́м ти:/ ра́дуйся, Анто́ние,// Ла́вры Се́ргиевы похвало́ и Це́ркви Росси́йския украше́ние.
Молитва
О преподо́бне о́тче Анто́ние, вели́каго а́ввы Се́ргия досто́йный прее́мниче, наставле́ний преподо́бнаго Серафи́ма исполни́телю, святи́теля Филаре́та дру́же и сотаи́нниче, и́ноков и всех ревни́телей благоче́стия учи́телю! Моли́ всеми́лостиваго Христа́ Бо́га на́шего и Его́ Пречи́стую Ма́терь Це́ркви и Оте́честву на́шему в ми́ре и тишине́ пребыва́ти, оби́тели Се́ргиевой, иде́же прославля́ется вели́кое и́мя Пресвяты́я Тро́ицы, непоколеби́мой сохрани́тися, учи́лищу духо́вному, в ней пребыва́ющему, в правосла́вней ве́ре утверди́тися. Испроси́ нам моли́твами твои́ми у Пресвяты́я Тро́ицы благода́ть во́лю Бо́жию взыска́ти и исполня́ти, житие́ в по́двизех покая́ния провожда́ти, ско́рби, боле́зни и искуше́ния с благодаре́нием терпе́ти, дух ми́рен стяжа́ти и иска́ти пре́жде Ца́рствия Бо́жия, в не́мже ты прославля́еши со все́ми святы́ми Отца́ и Сы́на и Свята́го Ду́ха. Ами́нь.
Назад к списку
