Преподобным Андронику, Савве, Александру, Даниилу и Андрею Московским (тропари, кондаки и молитва)
Тропарь Андроника, Саввы и Александра Московских, Даниила Черного, Андрея Рублева, глас 2:
Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,// Ю́же дерзнове́нно моли́те// спасти́ся душа́м на́шим.
Ин тропарь Андроника и Саввы Московских, глас 8:
От ю́ности своея́, преподо́бнии отцы́ Андрони́че и Са́вво, / в пусты́ни всели́стеся Се́ргия вели́каго, / того́ житию́ после́дующе, / плоды́ смире́ния и послуша́ния возрасти́ли есте́, / сего́ ра́ди сподо́бившеся бы́ти строи́тели и первонача́льники / обе́тныя оби́тели святи́теля Алекси́я, / с ни́мже испроси́те у Христа́ Бо́га ве́рным лю́дем здра́вие и спасе́ние // и душа́м на́шим ве́лию ми́лость.
Ин тропарь Андроника Московского, глас 1:
Безмо́лвие от ю́ности возлюби́в,/ на го́ру Ма́ковец прише́л еси́, Андрони́че блаже́нне,/ оби́тель о́бщаго жития́ устро́ил еси́ в земне́м гра́де Москве́,/ во оби́тели Небе́снаго гра́да ны́не ликовству́еши,/ моли́ся Христу́ Бо́гу// спасти́ся душа́м на́шим.
Кондак Андроника, Саввы и Александра Московских, Даниила Черного, Андрея Рублева, глас 3:
Вас мо́лим, преподо́бнии отцы́ на́ши,/ те́лом почива́ющия на земли́,/ ду́хом же Бо́жию Престо́лу предстоя́щия:/ моли́теся о гра́де Москве́ // и о всех, почита́ющих честну́ю па́мять ва́шу.
Молитва преподобным отцам
О преподо́бнии и Богоно́снии отцы́, па́стырие и учи́телие и неле́ностнии наста́вницы на́ши! О земны́х небре́гше, в зе́млю кро́тких всели́лися есте́, из нея́же израсти́ли есте́ плоды́ доброде́телей; тле́нныя тала́нты не сокро́виществовавше, нетле́нныя тала́нты преумно́жили есте́ во сто крат и мно́жае; челове́ческия сла́вы теку́щия не иска́вше, возда́ли есте́ сла́ву Бо́гу и Спа́су всех и сего́ ра́ди прославля́етеся ны́не на Небесе́х в Це́ркви перворо́дных. Моли́те Человеколю́бца Спа́са Христа́, да просвети́т ны, помраче́нныя, покая́нием, да освяти́т ны, гре́шныя, си́лою, наи́тием и де́йствием благода́ти Свята́го Ду́ха, чрез достопокланя́емыя ико́ны подае́мою, да поми́лует ны, немощны́я, моли́твами ва́шими и предста́тельством Пренепоро́чныя Его́ Ма́тере и сподо́бит узре́ти сла́ву Пречи́стого ли́ка Своего́ во Ца́рствии Небе́снем. Ами́нь.
Назад к списку
