Преподобному Неофиту, затворнику Кипрскому (тропари, кондаки и молитвы)

Тропарь, глас 1:

Земли́ Ки́прския затво́рниче и чудотво́рче яви́лся еси́, Богоно́сне Неофи́те, посто́м, бде́нием, моли́твою Небе́сная дарова́ния прии́м, исцеля́еши неду́жныя и ду́ши ве́рою приходя́щих ти. Сла́ва Да́вшему тебе́ кре́пость, сла́ва Венча́вшему тя, сла́ва Де́йствующему тобо́ю всем исцеле́ния.

Ин тропарь, глас 8:

В тебе́ о́тче, изве́стно спасе́ся е́же по о́бразу: прии́м бо крест после́довал еси́ Христу́, и де́я учи́л еси́ презира́ти у́бо плоть, прехо́дит бо, прилежа́ти же о души́, ве́щи безсме́ртней. Те́мже и со а́нгелы сра́дуется, преподо́бне о́тче Неофи́те, дух твой.

Кондак, глас 3:

Земны́х и тле́нных наслажде́ний презре́вше я́ве, преблаже́нне о́тче Неофи́те, пусты́ни Ки́прския яви́лся еси́ а́нгел непоро́чен, моли́твою, посто́м и покая́нием Небе́сныя оби́тели дости́г, и с ли́ки преподо́бных весели́шися, те́мже чту́ще па́мять твою́, вопие́м ти приле́жно: от бед нас изба́ви, о́тче преподо́бне.

Ин кондак, глас 2:

Чистото́ю душе́вною Боже́ственно вооружи́вся и непреста́нные моли́твы, я́ко копие́, вручи́в кре́пко, пробо́л еси́ бесо́вская ополче́ния, Неофи́те, о́тче наш, моли́ непреста́нно о всех нас.

Молитва первая

О вели́кий уго́дниче Бо́жий, преподо́бне о́тче наш Неофи́те, сла́вим твое́ во Христе́ смире́нное житие́, и́мже Бог превознесе́ и́мя твое́, еще́ на земли́ тебе́ су́щу, наипа́че же увенча́ тя Небе́сною че́стию по отше́ствии твое́м в черто́г сла́вы ве́чныя. Приими́ ны́не моле́ние от нас, недосто́йных чад твои́х, чту́щих тя и призыва́ющих и́мя твое́ свято́е, изба́ви нас твои́м предста́тельством пред Престо́лом Бо́жиим от всех ско́рбных обстоя́ний, душе́вных и теле́сных неду́гов, злых напа́стей, тлетво́рных и лука́вых искуше́ний. Низпосли́ Оте́честву на́шему от великодарови́таго Бо́га мир, тишину́ и благоде́нствие. Всеблагомо́щным предста́тельством твои́м укрепи́ ста́рцев немощны́х, уврачу́й ста́риц боля́щих, насы́ти а́лчущих, напо́й жа́ждущих, воодушеви́ ю́ношей к све́тлым по́двигом стремя́щихся, вразуми́ роди́телей в воспита́нии дете́й свои́х, сохрани́ младе́нцев от вся́ких бед и утверди́ в духо́вной пра́вде муже́й и во́инов. К тебе́ у́бо припа́даем и тебе́ про́сим: моли́ся, преблаже́нне Неофи́те, Всеми́лостивому Бо́гу на́шему о спасе́нии душ на́ших, да в покая́нии невозбра́нно пре́йдем от земли́ на Не́бо, мыта́рств го́рьких и ве́чныя му́ки изба́вльшеся, и Небе́снаго Ца́рствия насле́дники ста́ти возмо́жем со все́ми преподо́бными от ве́ка угоди́вшими Го́споду на́шему Иису́су Христу́, Ему́же сла́ва, со Безнача́льным Его́ Отце́м, и с Пресвяты́м и Животворя́щим Ду́хом, ны́не и при́сно и во ве́ки веко́в. Ами́нь.

Молитва вторая

О свяще́нная главо́, преподо́бне о́тче, преблаже́нне а́вво Неофи́те, не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу: помяни́ ста́до твое́, е́же сам упасл еси́, и не забу́ди посеща́ти чад твои́х. Моли́ за ны, о́тче святы́й, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас, недосто́йных, у Престо́ла Вседержи́телева, и не преста́й моли́тися о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый, а́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со А́нгельскими во́инствы, со Безпло́тными ли́ки, с Небе́сными Си́лами у Престо́ла Вседержи́телева предстоя́ши, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в, возду́шных князе́й и от ве́чныя му́ки изба́вимся, и Небе́снаго Ца́рствия насле́дницы бу́дем со все́ми пра́ведными, от ве́ка угоди́вшими Го́споду на́шему Иису́су Христу́; Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.