Преподобной Ксении Миласской (тропарь и кондаки)
Тропарь, глас 8:
В тебе́, ма́ти, изве́стно спасе́ся е́же по о́бразу: / прии́мши бо крест, после́довала еси́ Христу́, / и, де́ющи учи́ла еси́ презира́ти у́бо плоть, прехо́дит бо, / прилежа́ти же о души́, ве́щи безсме́ртней. // Те́мже и со А́нгелы сра́дуется, преподо́бная Ксе́ние, дух твой.
Кондак, глас 2:
Твою́ страннонра́вную, Ксе́ние, па́мять соверша́юще, / любо́вию почита́ющии тя, пое́м Христа́, / во всех тебе́ подаю́щаго кре́пость исцеле́ний, // Ему́же всегда́ моли́ся о всех нас.
Ин кондак, глас 4:
И́же во святы́х свята́я / Христа́ Преблага́го всем се́рдцем возлюби́ла еси́, Богому́драя Ксе́ние сла́вная, / того́ ра́ди омерзи́ла еси́ мирску́ю сла́дость. / Крест же Его́ взе́мши честны́й, // возлюби́ пе́ти при́сно: аллилу́ия.
Назад к списку
