Преподобному Марку, гробокопателю, Печерскому в Ближних пещерах почивающему (тропарь и кондак)
Тропарь, глас 1:
Умертви́в плотски́я по́хоти мно́гим воздержа́нием / и копа́нием гробо́в святы́м, / при́сно, а́ки мертв, в пеще́ре живя́, / ме́ртвыя повеле́нием свои́м воздвиза́л еси́, / Ма́рко прехва́льне, / мертви́ и на́ша мудрова́ния плотска́я / и наста́ви нас на тече́ние доброде́телей, // моля́ о нас Еди́наго Человеколю́бца.
Кондак, глас 8:
Врача́ изря́дна и чудотво́рца любо́вию, ве́рнии, ублажи́м, прося́ще его́: / да моли́твами свои́ми уврачу́ет на́ша стра́сти, душе́вныя и теле́сныя, / и́мать бо на сие́ благода́ть от Бо́га, / и прого́нит ду́хи лука́выя от всех, ве́рно ко гро́бу его́ притека́ющих и зову́щих: // ра́дуйся, Ма́рко, цели́телю не́мощей на́ших.
Назад к списку
