Преподобному Ферапонту Монзенскому (тропари, кондак, молитва и величание)
Тропарь, глас 8:
Любо́вию Христо́вою, Богому́дре, просвети́вся и доброде́тельми / сожи́тельствовал еси́ Васи́лию блаже́нному, / и, вся́кое наслажде́ние плотско́е возненави́дев, / в пусты́ню всели́лся еси́, / в ней же вельми́ подвиза́лся еси́, в жи́зни сей вре́менней / плоть умершвля́я свою́ в пе́ниих, и во бде́ниих, и в поще́ниих. / Те́мже и Христо́с да́ром чуде́с обогати́ тя, / но помина́й у́бо нас, чту́щих пресве́тлую па́мять твою́, / преподо́бне о́тче Ферапо́нте, // и моли́ Христа́ Бо́га спасти́ся душа́м на́шим.
Ин тропарь, глас 8:
Любо́вию Христо́вою, богому́дре, просвети́вся,/ доброде́тельми Васи́лию блаже́нному подража́л еси́,/ вся́кое же наслажде́ние плотско́е возненави́дев/ и в пусты́ню всели́вся,/ та́мо вельми́ подвиза́лся еси́ в пе́нии, во бде́нии и в поще́нии./ Те́мже и Христо́с да́ром чуде́с обогати́ тя./ Помина́й у́бо нас, чту́щих пресве́тлую па́мять твою́,/ преподо́бне о́тче Ферапо́нте,// и моли́ Христа́ Бо́га спасти́ся душа́м на́шим.
Кондак, глас 8:
Возложи́в себе́ Бо́гу от ю́ности, преподо́бне, / Того́ па́че всех возлюби́в, / и Тому́ от всея́ души́ любо́вию после́довал еси́, / тле́нная и кра́сная ми́ра нивочто́же вмени́в, в пусты́ню всели́вся, / в ней же до́бре подвиза́лся еси́ проти́ву неви́димых враго́в ко́зней / и, я́ко светоза́рное со́лнце, в конце́х Га́лическия земли́ возсия́л еси́, / отону́ду же, веселя́ся, преше́л еси к Небе́сным оби́телем, / и ны́не со А́нгелы Влады́чню Престо́лу предстоя́, / помина́й нас, чту́щих па́мять твою́, да зове́м ти: // ра́дуйся, Ферапо́нте, о́тче наш.
Молитва
О, преподо́бный о́тче, вели́кий засту́пниче, ско́рый услы́шателю, уго́дниче Бо́жий и чудотво́рче Ферапо́нте! Не забу́ди ны, я́коже обеща́лся еси́, посеща́й ча́да твоя́; а́ще бо и отше́л еси́ от нас те́лом, но ду́хом при́сно с на́ми пребыва́еши. Мо́лим у́бо тя, о, преподо́бне о́тче: изба́ви ны от огня́ и меча́, от наше́ствия иноплеме́нных и междоусо́бныя бра́ни и от тлетво́рных ветро́в и от внеза́пныя сме́рти и от всех прило́г вра́жиих, находя́щих на ны. Услы́ши ны гре́шныя, прими́ моли́тву и моле́ние на́ше, е́же к тебе́, я́ко кади́ло благово́нное и я́ко же́ртву благоприя́тную, прино́сим. Умерщвле́нныя злы́ми де́лы, словесы́ и помышле́ньми ду́ши на́ша, преподо́бне о́тче, оживи́ и возста́ви. И я́коже мно́ги приходя́щыя к цельбоно́сному твоему́ гро́бу с ве́рою, вся́кими скорбьми́ и боле́зньми лю́те стра́ждущыя исцели́л еси́, та́ко и нас исцели́ от неду́гов душе́вных и теле́сных. Исто́ргни нас из глубины́ согреше́ний и на путь покая́ния наста́ви, ми́лостивым твои́м предста́тельством от ви́димых и неви́димых враг избавля́я. Помози́ нам в житии́ сем и во исхо́де душ на́ших и в бу́дущей жи́зни, во ве́ки веко́в. Ами́нь.
Величание
Ублажа́ем тя,/ преподо́бне о́тче Ферапо́нте,/ и чтим святу́ю па́мять твою́,/ наста́вниче мона́хов // и собесе́дниче А́нгелов.
Назад к списку
