Преподобной Марфе Дивеевской (тропари, кондаки, молитвы и величание)

Тропарь, глас 2:

Собесе́днице преподо́бнаго Серафи́ма,/ ди́вная отрокови́це и ма́ти на́ша Ма́рфо,/ равноа́нгельное житие́ стяжа́вши,/ на Небесе́х жи́тельства дости́гла еси́,// иде́же мо́лишися о спасе́нии душ на́ших.

Кондак, глас 8:

Кро́тостию и смире́нием украси́вшися/ и любве́ Боже́ственныя испо́лнившися,/ ра́дость Небе́сную стяжа́ла еси́,/ отрокови́це ю́ная и ма́ти на́ша Ма́рфо,/ и, в а́нгельский о́браз от преподо́бнаго Серафи́ма обле́кшися,/ с му́дрыми де́вами в Черто́г Небе́сный всели́лася еси́,// иде́же мо́лишися о спасе́нии душ на́ших.

Молитва

О, богому́драя ма́ти на́ша Ма́рфо! Ты, в простоте́ се́рдца пожи́вши, кро́тостию Небе́сною и чистото́ю просия́ла еси́ и благопло́дная послу́шница преподо́бнаго Серафи́ма яви́лася еси́. Бу́ди нам, ма́ти всечестна́я, хода́таица непреста́нная о спасе́нии душ на́ших, да моли́твами твои́ми в стра́се Бо́жии утверди́мся и го́рняя му́дрствуем, а не земна́я. Помози́ нам, изнемога́ющим, укрепи́тися в любви́ и единомы́слии и ве́рным Христу́ пребы́ти, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние, во ве́ки веко́в. Ами́нь.

Величание

Ублажа́ем тя,/ преподо́бная ма́ти на́ша Ма́рфо,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.

Тексты тропаря, кондака, молитвы и величания утверждены на заседании Священного Синода 23-24 сентября 2021 года (журнал № 67).

Ин тропарь, глас 1:

Де́вства цве́те, и́ночества украше́ние, Диве́евская ра́досте и похвало́, схи́мнице ю́ная, Ма́рфо богому́драя, досто́йная сотаи́нице вели́каго Серафи́ма Саро́вскаго, моли́ся за ны недосто́йныя, чту́щия с любо́вию па́мять твою́, да мимои́дет от нас ча́ша гне́ва Бо́жия и да изба́вится от поги́бели Ру́сская земля́.

Ин тропарь, глас 2:

Равноа́нгельное житие́ стяжа́вшая, ди́вная отрокови́це и собесе́днице Преподо́бнаго Серафи́ма, госпоже́ и ма́ти на́ша Ма́рфо, ны́не в нетле́нных моще́х почива́еши и у Престо́ла Бо́жия предстои́ши, моли́ о на́с Ми́лостиваго Бо́га Небе́снаго, Диве́ева нача́льнице.

Ин кондак, глас 6:

От Серафи́ма Саро́вскаго, чи́стая, Бо́гу возложе́на, Ма́рфо преподо́бная, и оби́тель твою́ небе́сную, я́ко град соде́лавши, мона́хинь Диве́евских мно́жество в ней собра́ла еси́, сла́вити многопе́тую Тро́ицу, Ю́же моли́ спасти́ся душа́м на́шим.

Ин кондак, глас 8:

Небе́сною кро́тостию, молча́нием и неземно́ю ра́достию испо́лнилася еси́, юная и невиданная досе́ле в Дивееве отрокови́це, преподо́бная ма́ти на́ша Ма́рфо, в вели́кую схи́му от преподо́бнаго Серафи́ма облече́нная; те́мже водвори́лася еси́ с му́дрыми де́вами в Небе́сном черто́зе и со А́нгелы Всецарю́ непреста́нно предстои́ши.

Молитва

О преподо́бная и богоно́сная ма́ти Ма́рфо, Диве́евская ра́досте и похвало́, о́трасль ди́вная семе́йства пра́веднаго и плод святы́й ро́да благочести́ваго, измла́да со сро́дники твои́ми к преподо́бному Серафи́му Саро́вскому притека́вшая, за послуша́ние ему́ по благода́ти Боже́ственней всесоверше́нно уцелому́дрившаяся, сотаи́нницею его́ ста́вшая и вели́кий а́нгельский о́браз от руки́ его́ прия́вшая, в ле́тех ма́лых испо́лнила еси́ вся благопотре́бная и в Ца́рствие Небе́сное душе́ю твое́ю де́вственною взошла́ еси́, ста́рцу свято́му твоему́ уневе́щенная. Моли́ся за ны, недосто́йныя и злонра́вныя, чту́щыя с любо́вию па́мять твою́, да очи́стит Госпо́дь ны от вся́кия скве́рны душе́вныя и теле́сныя, заступи́т, спасе́т, поми́лует и сохрани́т ны Свое́ю благода́тию. Ами́нь.