Преподобному Роману Сладкопевцу (тропари, кондак и молитва)
Тропарь, глас 8:
В тебе́, о́тче, изве́стно спасе́ся е́же по о́бразу: / прии́м бо крест, после́довал еси́ Христу́ / и, де́йствуя, учи́л еси́ презира́ти у́бо плоть, прехо́дит бо, / прилежа́ти же о души́ ве́щи безсме́ртней. // Те́мже и со А́нгелы сра́дуется, преподо́бне Рома́не, дух твой.
Ин тропарь, глас 3:
От ю́ности житию́ равноа́нгельному ревну́я, / ве́ру, смиренному́дрие и терпе́ние стяжа́в, / преподо́бне Рома́не Сладкопе́вче, / оби́тель Свята́го Ду́ха был еси́, / та́же избра́нник Бо́жия Ма́тере яви́лся еси́, / и от Нея́ ми́лостивно сподо́бися да́ра сла́вити Бо́га. / Сего́ ра́ди моли́ся о нас, недосто́йных ученице́х твои́х, // да воспое́м с тобо́ю сладкогла́сно сла́ву нас ра́ди Воплоти́вшемуся Преве́чному Бо́гу.
Ин тропарь, глас 3:
(творение Регентской школы МДА)
По́двигом поста́, моли́твы и бде́ния,/ глубино́ю ве́ры и смиренному́дрия/ от ю́ности совле́клся еси́ ве́тхаго челове́ка,/ равноа́нгельному житию́ уподо́бився,/ преподо́бне Рома́не Сладкопе́вче,/ досто́ин был еси́ явле́ния Богоро́дицы,/ я́же повеле́ ти ди́вный сви́ток сне́сти,/ и тем препода́ ти дар песнотворе́ния,/ а́бие воспе́л еси́, я́ко А́нгели Небе́снии,/ сла́ву Воплоти́вшемуся из Нея́ Сы́ну Бо́жию./ Моли́ся за ны ко Го́споду,/ дарова́ти всем воспева́ющим Христа́ Жизнода́вца/ согла́сное пе́ние,// мир и ве́лию ми́лость.
Кондак, глас 8:
Боже́ственными доброде́тельми ду́ха/ измла́да украси́вся, Рома́не прему́дре,/ Це́ркви Христо́ве пречестно́е украше́ние был еси́:/ пе́нием бо прекра́сным украси́в ю́, блаже́нне./ Тем мо́лим тя: пода́ждь жела́ющим Боже́ственнаго дарова́ния твоего́,/ я́ко да вопие́м ти:// ра́дуйся, о́тче преблаже́нне, красото́ церко́вная.
Молитва
О, преблаже́нне о́тче наш, Рома́не Сладкопе́вче! При́зри от го́рния сла́вы на нас, смире́нных и немощны́х, твоея́ по́мощи и утеше́ния прося́щих. Прини́кни к нам благосе́рдием твои́м и помози́ за́поведи Госпо́дни непоро́чно сохраня́ти, ве́ру правосла́вную кре́пко содержа́ти, покая́ние во гресе́х на́ших усе́рдно Бо́гу приноси́ти. Научи́ нас, уневе́стившихся Христу́, рабо́тати Ему́ со стра́хом и ра́доватися с тре́петом. Изба́ви нас от печа́ли и уны́ния, отжени́ от нас го́рдость и славолю́бие, да воспое́м сла́ву Бо́жию, да восхо́щем то́кмо сла́вы Небе́сныя. О, святы́й о́тче, всели́ в нас любо́вь нелицеме́рную к бли́жним, послуша́ние безро́потное нача́льником и страх Бо́жий в сердца́ на́ша. Да́руй позна́ти сла́дость отрече́ния во́ли своея́, ве́рой кре́пкой во благо́е Промышле́ние Бо́жие о спасе́нии челове́ка освяти́ ду́ши на́ша. Низпосли́ нам благослове́ние от Го́спода, да понесе́м благо́е и́го Христо́во в долготерпе́нии до конца́ дней на́ших, да сподо́бимся с му́дрыми де́вами вни́ти во бра́чный черто́г Жениха́ своего́ Небе́снаго и ку́пно со А́нгелами воспева́ти сла́ву вели́чия Его́, Отца́, и Сы́на, и Свята́го Ду́ха во ве́ки веко́в. Ами́нь.
Назад к списку
