Преподобному Герману Соловецкому (тропари, кондак и молитва)
Тропарь, глас 8:
Жела́нием духо́вным от ю́ности распаля́емь, преподо́бне Ге́рмане,/ Христу́ те́сным жития́ путе́м после́довал еси́/ и, в морски́й пусты́нный о́стров, а́ки в ти́хое приста́нище, всели́вся,/ в нем мно́га ле́та по́стнически пожи́л еси́,/ иде́же блаже́нным отце́м Зоси́ме и Савва́тию сожи́тель был еси́,/ с ни́миже моли́ Христа́ Бо́га о нас,// любо́вию чту́щих святу́ю па́мять твою́.
Ин тропарь, древний, глас 8:
Украси́вся, прему́дре, по́стническим житие́м,/ спо́стник был еси́ и сожи́тель в морсте́м ото́це/ преподо́бным отце́м Зоси́ме и Савва́тию,/ сподвиза́вся в моли́твах, и труде́х, и в поще́ниих,/ преподо́бне о́тче Ге́рмане,/ но, я́ко име́я дерзнове́ние к Бо́гу,// моли́ изба́вити нас от враг и спасти́ ду́ши на́ша.
Кондак, глас 4:
Вы́шних жела́я,/ вся до́лу влеку́щая возненави́дел еси́/ и, отече́ство свое́ оста́вль,/ в помо́рие пусты́нное отше́л еси́,/ та́же в морски́й о́стров удали́вся,/ в нем мно́га ле́та Го́сподеви порабо́тал еси́./ Те́мже, па́мять твою́ пра́зднующе,/ любо́вию вопие́м ти:// ра́дуйся, Ге́рмане Богому́дре, о́тче наш.
Молитва
О, преподо́бне и Богоно́сне о́тче наш Ге́рмане, безмо́лвнаго и́ноческаго жития́ во о́строве Солове́цтем первонача́льниче! Мо́лим тя мы недосто́йнии, предстоя́ще пред честно́й ико́ной твое́й: бу́ди моли́твенник и хода́тай о нас гре́шных пред Престо́лом Вседержи́теля Бо́га, Ему́же в дерзнове́нии предстои́ши со А́нгелы и все́ми святы́ми, да да́рует нам, я́ко Благи́й и Человеколюби́вый, вся потре́бная к животу́ и благоче́стию, душа́м и телесе́м на́шим здра́вие, во всех благи́х преспе́яние и Свою́ всеси́льную по́мощь во вся́ких искуше́ниих, беда́х же и напа́стех, воздвиза́емых на ны от враг спасе́ния на́шего; оби́тели же твое́й моли́ изба́витися от вся́каго зла́го обстоя́ния, и приходя́щим в ню бли́жним и да́льним получи́ти вся проси́мая ко душе́вней и теле́сней по́льзе. Наипа́че же испроси́, уго́дниче Христо́в, всем нам грехо́в отпуще́ние, христиа́нскую кончи́ну жития́ и насле́дие Ца́рства Небе́снаго у Христа́ Бо́га на́шего, Ему́же честь и сла́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.
Назад к списку
