26 Исповедницы Российской xx века (тропарь, кондак, молитва и величание)
Тропарь, глас 4:
Благоче́стно в зако́не Госпо́дни пожи́вши, / ве́ру правосла́вную сохрани́ла еси́, / и терпе́нием гони́тели Це́ркве Ру́сския посрами́вши, / страда́ния за Христа́ претерпе́ла еси́, / испове́днице сла́вная (имярек), / Престо́лу Бо́жию предстоя́щи, // моли́ спасти́ся душа́м на́шим.
Кондак, глас 4:
Я́ко крин благоуха́нный, / посреде́ пусты́ни безбо́жия / в земне́м оте́честве твое́м процвела́ еси́, / блаже́нная ма́ти (имярек), / и житие́ доброде́тельное испове́данием ве́ры украси́вши, / востекла́ еси́ к Небе́сному Жениху́ Христу́, // и́же увенча́ тя красото́ю сла́вы нетле́нныя.
Молитва
О до́блественная испове́днице Христо́ва (имярек), земли́ на́шея до́брое прозябе́ние, Це́ркве Ру́сския избра́нная дщи! Кто не удиви́тся си́ле Бо́жией, в не́мощи твое́й соверши́вшейся? Ты бо му́жески враги́ ви́димыя и неви́димыя низложи́вши, заточе́ния и мно́гия му́ки Христа́ ра́ди претерпе́ла еси́ и Ца́рствие Небе́сное насле́довала еси́. Те́мже тя, я́ко благу́ю и ве́рную рабу́ Госпо́дню, досто́йно почита́юще, приле́жно мо́лим: моли́ о нас всеще́драго Бо́га, да да́рует Це́ркве Росси́йстей благостоя́ние, оте́честву на́шему мир, лю́дем во благоче́стии преспе́яние, в ско́рби утеше́ние, в обстоя́ниих по́мощь и заступле́ние: да благода́тию Бо́жиею и твои́м те́плым предста́тельством земно́е жи́тельство про́йдем и Ца́рствия Небе́снаго дости́гнем, иде́же вку́пе с тобо́ю сподо́бимся прославля́ти ди́вного во святы́х свои́х Бо́га на́шего, Отца́, и Сы́на, и Свята́го Ду́ха, во ве́ки веко́в. Ами́нь.
Величание
Велича́ем тя, / испове́днице Христо́ва (имярек), / и чтим святу́ю па́мять твою́, / ты бо мо́лиши за нас // Христа́ Бо́га на́шего.
Назад к списку
