Последование погребения диакона
Последование погребения диакона
Иерей начинает: Благослове́н Бог наш, всегда́, ны́не и при́сно и во ве́ки веко́в.
Чтец: Ами́нь. Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, Иже́ везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Возглас: Я́ко Твое́ есть Ца́рство, и си́ла и сла́ва, Отца́, и Сы́на, и Свята́го Ду́ха, и ны́не и при́сно, и во ве́ки веко́в.
Чтец: Аминь. Господи, помилуй. (12 раз)
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 90:
Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тме преходя́шия, от сря́ща, и бе́са полу́деннаго. Паде́т от страны́ Твоея́ ты́сяща, и тма одесну́ю Тебе́, к Тебе́ же не прибли́жится, оба́че очи́ма Твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к Тебе́ зло, и ра́на не прибли́жится телеси́ Твоему́, я́ко А́нгелом Свои́м запове́сть о Тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́: покры́ю и́, я́ко позна́ и́мя Мое́. Воззове́т ко Мне, и услы́шу его́: с ним есмь в ско́рби, изму́ его́, и просла́влю его́, долгото́ю дний испо́лню его́, и явлю́ ему́ спасе́ние Мое́.
Посем вышшим гласом поем: Благослове́н еси́, Го́споди, научи́ мя оправда́нием Твои́м.
Непоро́чнии в путь: Ạллилу́иа.
И поется первая статиа непорочных, глас 6. В концы же коегождо стиха поем: Ạллилу́иа.
1 Блаже́ни непоро́чнии в путь,/ ходя́щии в зако́не Госпо́дни./ Ạллилу́иа.
2 Блаже́ни испыта́ющии свиде́ния Его́,/ всем се́рдцем взы́щут Его́,/ Аллилу́иа.
3 не де́лающии бо беззако́ния,/ в путе́х Его ходи́ша./ Ạллилу́иа.
И прочее псалма:
4 Ты запове́дал еси́ за́поведи Твоя́/ сохрани́ти зело́.
5 Дабы́ испра́вилися путие́ мои́,/ сохрани́ти оправда́ния Твоя́.
6 Тогда́ не постыжу́ся,/ внегда́ призре́ти ми на вся за́поведи Твоя́.
7 Испове́мся Тебе́ в пра́вости се́рдца,/ внегда́ научи́ти ми ся судьба́м пра́вды Твоея́.
8 Оправда́ния Твоя́ сохраню́,/ не оста́ви мене́ до зела́.
9 В чесо́м испра́вит юне́йший путь свой;/ внегда́ сохрани́ти словеса́ Твоя́.
10 Всем се́рдцем мои́м взыска́х Тебе́,/ не отри́ни мене́ от за́поведей Твои́х.
11 В се́рдце мое́м скрых словеса́ Твоя́,/ я́ко да не согрешу́ Тебе́.
12 Благослове́н еси́ Го́споди:/ научи́ мя оправда́нием Твои́м.
13 Устна́ма мои́ма возвести́х/ вся судьбы́ уст Твои́х.
14 На пути́ свиде́ний Твои́х наслади́хся,/ я́ко о вся́ком бога́тстве.
15 В за́поведех Твои́х поглумлю́ся,/ и уразуме́ю пути́ Твоя́.
16 Во оправда́ниих Твои́х поучу́ся,/ не забу́ду слове́с Твои́х.
17 Возда́ждь рабу́ Твоему́:/ живи́ мя, и сохраню́ словеса́ Твоя́.
18 Откры́й о́чи мои́,/ и уразуме́ю чудеса́ от зако́на Твоего́.
19 Пришле́ц аз есмь на земли́:/ не скрый от мене́ за́поведи Твоя́.
20 Возлюби́ душа́ моя́ / возжела́ти судьбы́ Твоя́ на вся́кое вре́мя.
21 Запрети́л еси́ го́рдым:/ про́кляти уклоня́ющиися от за́поведей Твои́х.
22 Отъими́ от мене́ поно́с и уничиже́ние,/ я́ко свиде́ний Твои́х взыска́х.
23 И́бо седо́ша кня́зи, и на мя клевета́ху,/ раб же Твой глумля́шеся во оправда́ниих Твои́х:
24 И́бо свиде́ния Твоя́ поуче́ние мое́ есть,/ и сове́ти мои́ оправда́ния Твоя́.
25 Прильпе́ земли́ душа́ моя́:/ живи́ мя по словеси́ Твоему́.
26 Пути́ моя́ возвести́х, и услы́шал мя еси́:/ научи́ мя оправда́нием Твои́м:
27 Путь оправда́ний Твои́х вразуми́ ми,/ и поглумлю́ся в чудесе́х Твои́х.
28 Воздрема́ душа́ моя́ от уны́ния:/ утверди́ мя в словесе́х Твои́х.
29 Путь непра́вды отста́ви от мене́,/ и зако́ном Твои́м поми́луй мя.
30 Путь и́стины изво́лих,/ и судьбы́ Твоя́ не забы́х.
31 Прилепи́хся свиде́нием Твои́м, Го́споди,/ не посрами́ мене́.
32 Путь за́поведей Твои́х теко́х,/ егда́ расшири́л еси́ се́рдце мое́.
33 Законоположи́ мне, Го́споди, путь оправда́ний Твои́х,/ и взыщу́ и́ вы́ну:
34 Вразуми́ мя, и испыта́ю зако́н Твой,/ и сохраню́ и́ всем се́рдцем мои́м.
35 Наста́ви мя на стезю́ за́поведей Твои́х,/ я́ко ту́ю восхоте́х.
36 Приклони́ се́рдце мое́ во свиде́ния Твоя́,/ а не в лихои́мство.
37 Отврати́ о́чи мои́, е́же не ви́дети суеты́,/ в пути́ Твое́м живи́ мя.
38 Поста́ви рабу́ Твоему́ / сло́во Твое́ в страх Твой.
39 Отъими́ поноше́ние мое́, е́же непщева́х:/ я́ко судьбы́ Твоя́ бла́ги.
40 Се возжела́х за́поведи Твоя́,/ в пра́вде Твое́й живи́ мя.
41 И да прии́дет на мя ми́лость Твоя́ Го́споди,/ спасе́ние Твое́ по словеси́ Твоему́.
42 И отвеща́ю поноша́ющым ми сло́во:/ я́ко упова́х на словеса́ Твоя́.
43 И не отъими́ от уст мои́х словесе́ и́стинна до зела́,/ я́ко на судьбы́ Твоя́ упова́х.
44 И сохраню́ зако́н Твой вы́ну,/ в век и в век ве́ка.
45 И хожда́х в широте́,/ я́ко за́поведи Твоя́ взыска́х.
46 И глаго́лах о свиде́ниих Твои́х пред цари́,/ и не стыдя́хся:
47 И поуча́хся в за́поведех Твои́х,/ я́же возлюби́х зело́:
48 И воздвиго́х ру́це мои́ к за́поведем Твои́м, я́же возлюби́х,/ и глумля́хся во оправда́ниих Твои́х.
49 Помяни́ словеса́ Твоя́ рабу́ Твоему́,/ и́хже упова́ние дал ми еси́.
50 То мя уте́ши во смире́нии мое́м,/ я́ко сло́во Твое́ живи́ мя.
51 Го́рдии законопреступова́ху до зела́:/ от зако́на же Твоего́ не уклони́хся.
52 Помяну́х судьбы́ Твоя́ от ве́ка, Го́споди,/ и уте́шихся.
53 Печа́ль прия́т мя от гре́шник,/ оставля́ющих зако́н Твой.
54 Пе́та бя́ху мне оправда́ния Твоя́,/ на ме́сте прише́льствия моего́.
55 Помяну́х в нощи́ и́мя Твое́, Го́споди,/ и сохрани́х зако́н Твой.
56 Сей бысть мне,/ я́ко оправда́ний Твои́х взыска́х.
57 Часть моя́ еси́, Го́споди,/ рех сохрани́ти зако́н Твой.
58 Помоли́хся лицу́ Твоему́ всем се́рдцем мои́м:/ поми́луй мя по словеси́ Твоему́.
59 Помы́слих пути́ Твоя́,/ и возврати́х но́зе мои́ во свиде́ния Твоя́.
60 Угото́вихся и не смути́хся / сохрани́ти за́поведи Твоя́.
61 У́жя гре́шник обяза́шася мне,/ и зако́на Твоего́ не забы́х.
62 Полу́нощи воста́х испове́датися Тебе́/ о судьба́х пра́вды Твоея́.
63 Прича́стник аз есмь всем боя́щымся Тебе́,/ и храня́щым за́поведи Твоя́.
64 Ми́лости Твоея́, Го́споди, испо́лнь земля́:/ оправда́нием Твои́м научи́ мя.
65 Бла́гость сотвори́л еси́ с рабо́м Твои́м, Го́споди,/ по словеси́ Твоему́.
66 Бла́гости, и наказа́нию и ра́зуму научи́ мя,/ я́ко за́поведем Твои́м ве́ровах.
67 Пре́жде да́же не смири́ти ми ся, аз прегреши́х:/ сего́ ра́ди сло́во Твое́ сохрани́х.
68 Благ еси́ Ты, Го́споди,/ и бла́гостию Твое́ю научи́ мя оправда́нием Твои́м.
69 Умно́жися на мя непра́вда го́рдых,/ аз же всем се́рдцем мои́м испыта́ю за́поведи Твоя́.
70 Усыри́ся я́ко млеко́ се́рдце их,/ аз же зако́ну Твоему́ поучи́хся.
71 Бла́го мне, я́ко смири́л мя еси́,/ я́ко да научу́ся оправда́нием Твои́м. 72 Благ мне зако́н уст Твои́х,/ па́че ты́сящ зла́та и сребра́.
Сла́ва Отцу́ и Сы́ну/ и Свято́му Ду́ху / Аллилуиа.
И ны́не и при́сно/ и во ве́ки веко́в, ами́нь./ Аллилуиа.
Таже ектениа:
Па́ки и па́ки ми́ром Го́споду помо́лимся.
Лик: Го́споди, поми́луй.
Еще́ мо́лимся о упокое́нии души́ усо́пшаго раба́ Бо́жия диа́кона (имярек) и о е́же прости́тися ему́ вся́кому прегреше́нию во́льному же и нево́льному.
Лик: Го́споди, поми́луй.
Я́ко да Госпо́дь Бог учини́т ду́шу его́, иде́же пра́веднии упокоя́ются.
Лик: Го́споди, поми́луй.
Ми́лости Бо́жия, Ца́рства Небе́снаго и оставле́ния грехо́в его́ у Христа́, Безсме́ртнаго Царя́ и Бо́га на́шего, про́сим.
Лик: Пода́й, Го́споди.
Господу помолимся.
Лик: Го́споди, поми́луй.
Священник глаголет молитву: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ диа́кона (имярек), в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ диакона (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Посем начинаем вторую статию на глас 5. На коемждо же конце стиха глаголем: Поми́луй раба́ Твоего́.
73 Ру́це Твои́ сотвори́сте мя, и созда́сте мя:/ вразуми́ мя, и научу́ся за́поведем Твои́м./ Поми́луй раба́ Твоего́.
74 Боя́щиися Тебе́ у́зрят мя и возвеселя́тся,/ я́ко на словеса́ Твоя́ упова́х./ Поми́луй раба́ Твоего́.
75 Разуме́х Го́споди, я́ко пра́вда судьбы́ Твоя́, и вои́стинну смири́л мя еси́./ Поми́луй раба́ Твоего́.
И прочее псалма:
76 Бу́ди же ми́лость Твоя́, да уте́шит мя / по словеси́ Твоему́ рабу́ Твоему́.
77 Да прии́дут мне щедро́ты Твоя́, и жив бу́ду,/ я́ко зако́н Твой поуче́ние мое́ есть.
78 Да постыдя́тся го́рдии, я́ко непра́ведно беззако́нноваша на мя,/ аз же поглумлю́ся в за́поведех Твои́х.
79 Да обратя́т мя боя́щиися Тебе́,/ и ве́дящии свиде́ния Твоя́.
80 Бу́ди се́рдце мое́ непоро́чно во оправда́ниих Твои́х,/ я́ко да не постыжу́ся.
81 Исчеза́ет во спасе́ние Твое́ душа́ моя́ / на словеса́ Твоя́ упова́х.
82 Исчезо́ша о́чи мои́ в сло́во Твое́, глаго́люще: / когда́ уте́шиши мя;
83 Зане́ бых я́ко мех на сла́не:/ оправда́ний Твои́х не забы́х.
84 Коли́ко есть дней раба́ Твоего́; / когда́ сотвори́ши ми от гоня́щих мя суд;
85 Пове́даша мне законопресту́пницы глумле́ния,/ но не я́ко зако́н Твой, Го́споди.
86 Вся за́поведи Твоя́ и́стина:/ непра́ведно погна́ша мя, помози́ ми.
87 Вма́ле не сконча́ша мене́ на земли́:/ аз же не оста́вих за́поведей Твои́х.
88 По ми́лости Твое́й живи́ мя,/ и сохраню́ свиде́ния уст Твои́х.
89 Во век, Го́споди, сло́во Твое́ / пребыва́ет на Небеси́
90 В род и род и́стина Твоя́./ Основа́л еси́ зе́млю, и пребыва́ет.
91 Учине́нием Твои́м пребыва́ет день,/ я́ко вся́ческая рабо́тна Тебе́.
92 Я́ко а́ще бы не зако́н Твой поуче́ние мое́ был,/ тогда́ у́бо поги́бл бых во смире́нии мое́м.
93 Во век не забу́ду оправда́ний Твои́х,/ я́ко в них оживи́л мя еси́.
94 Твой есмь аз, спаси́ мя,/ я́ко оправда́ний Твои́х взыска́х.
95 Мене́ жда́ша гре́шницы погуби́ти мя,/ свиде́ния Твоя́ разуме́х.
96 Вся́кия кончи́ны ви́дех коне́ц,/ широка́ за́поведь Твоя́ зело́.
97 Коль возлюби́х зако́н Твой, Го́споди,/ весь день поуче́ние мое́ есть.
98 Па́че враг мои́х умудри́л мя еси́ за́поведию Твое́ю,/ я́ко в век моя́ есть.
99 Па́че всех уча́щих мя разуме́х,/ я́ко свиде́ния Твоя́ поуче́ние мое́ есть.
100 Па́че ста́рец разуме́х,/ я́ко за́поведи Твоя́ взыска́х.
101 От вся́каго пути́ лука́ва возбрани́х нога́м мои́м,/ я́ко да сохраню́ словеса́ Твоя́.
102 От суде́б Твои́х не уклони́хся,/ я́ко Ты законоположи́л ми еси́.
103 Коль сладка́ горта́ни моему́ словеса́ Твоя́,/ па́че ме́да усто́м мои́м.
104 От за́поведей Твои́х разуме́х,/ сего́ ра́ди возненави́дех всяк путь непра́вды.
105 Свети́льник нога́ма мои́ма зако́н Твой,/ и свет стезя́м мои́м.
106 Кля́хся и поста́вих / сохрани́ти судьбы́ пра́вды Твоея́.
107 Смири́хся до зела́, Го́споди,/ живи́ мя по словеси́ Твоему́.
108 Во́льная уст мои́х благоволи́ же, Го́споди,/ и судьба́м Твои́м научи́ мя.
109 Душа́ моя́ в руку́ Твое́ю вы́ну,/ и зако́на Твоего́ не забы́х.
110 Положи́ша гре́шницы сеть мне,/ и от за́поведей Твои́х не заблуди́х.
111 Насле́довах свиде́ния Твоя́ во век,/ я́ко ра́дование се́рдца моего́ суть.
112 Приклони́х се́рдце мое́ / сотвори́ти оправда́ния Твоя́ в век за воздая́ние.
113 Законопресту́пныя возненави́дех,/ зако́н же Твой возлюби́х.
114 Помо́щник мой и Засту́пник мой еси́ Ты,/ на словеса́ Твоя́ упова́х.
115 Уклони́теся от мене́ лука́внующии,/ и испыта́ю за́поведи Бо́га моего́.
116 Заступи́ мя по словеси́ Твоему́, и жив бу́ду,/ и не посрами́ мене́ от ча́яния моего́.
117 Помози́ ми, и спасу́ся,/ и поучу́ся во оправда́ниих Твои́х вы́ну.
118 Уничижи́л еси́ вся отступа́ющия от оправда́ний Твои́х,/ я́ко непра́ведно помышле́ние их.
119 Преступа́ющия непщева́х вся гре́шныя земли́,/ сего́ ра́ди возлюби́х свиде́ния Твоя́.
120 Пригвозди́ стра́ху Твоему́ пло́ти моя́,/ от суде́б бо Твои́х убоя́хся.
121 Сотвори́х суд и пра́вду,/ не преда́ждь мене́ оби́дящым мя.
122 Восприими́ раба́ Твоего́ во бла́го,/ да не оклевета́ют мене́ го́рдии.
123 Очи мои́ исчезо́сте во спасе́ние Твое́,/ и в сло́во пра́вды Твоея́.
124 Сотвори́ с рабо́м Твои́м по ми́лости Твое́й,/ и оправда́нием Твои́м научи́ мя.
125 Раб Твой есмь аз: вразуми́ мя,/ и уве́м свиде́ния Твоя́.
126 Вре́мя сотвори́ти Го́сподеви:/ разори́ша зако́н Твой.
127 Сего́ ра́ди возлюби́х за́поведи Твоя́ / па́че зла́та и топа́зия.
128 Сего́ ра́ди ко всем за́поведем Твои́м направля́хся,/ всяк путь непра́вды возненави́дех.
129 Ди́вна свиде́ния Твоя́,/ сего́ ра́ди испыта́ я́ душа́ моя́.
130 Явле́ние слове́с Твои́х / просвеща́ет и вразумля́ет младе́нцы.
131 Уста́ моя́ отверзо́х, и привлеко́х дух,/ я́ко за́поведей Твои́х жела́х.
Сла́ва Отцу́ и Сы́ну/ и Свято́му Ду́ху / Поми́луй раба́ Твоего́.
И ны́не и при́сно/ и во ве́ки веко́в, ами́нь./ Поми́луй раба́ Твоего́.
Таже ектениа:
Па́ки и па́ки ми́ром Го́споду помо́лимся.
Лик: Го́споди, поми́луй.
Еще́ мо́лимся о упокое́нии души́ усо́пшаго раба́ Бо́жия диа́кона (имярек) и о е́же прости́тися ему́ вся́кому прегреше́нию во́льному же и нево́льному.
Лик: Го́споди, поми́луй.
Я́ко да Госпо́дь Бог учини́т ду́шу его́, иде́же пра́веднии упокоя́ются.
Лик: Го́споди, поми́луй.
Ми́лости Бо́жия, Ца́рства Небе́снаго и оставле́ния грехо́в его́ у Христа́, Безсме́ртнаго Царя́ и Бо́га на́шего, про́сим.
Лик: Пода́й, Го́споди.
Господу помолимся.
Лик: Го́споди, поми́луй.
Священник глаголет молитву: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ диа́кона (имярек), в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ диакона (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
И паки начинаем третию статию, глас 3. В концы же коегождо стиха поем: Аллилуиа.
132 При́зри на мя и поми́луй мя,/ по суду́ лю́бящих и́мя Твое́./ Аллилуиа.
133 Стопы́ моя́ напра́ви по словеси́ Твоему́,/ и да не облада́ет мно́ю вся́кое беззако́ние./ Аллилуиа.
134 Изба́ви мя от клеветы́ челове́ческия,/ и сохраню́ за́поведи Твоя́./ Аллилуиа.
И прочее псалма:
135 Лице́ Твое́ просвети́ на раба́ Твоего́,/ и научи́ мя оправда́нием Твои́м.
136 Исхо́дища водна́я изведо́сте о́чи мои́,/ поне́же не сохрани́х зако́на Твоего́.
137 Пра́веден еси́, Го́споди,/ и пра́ви суди́ Твои́.
138 Запове́дал еси́ пра́вду свиде́ния Твоя́ / и и́стину зело́.
139 Иста́яла мя есть ре́вность Твоя́,/ я́ко забы́ша словеса́ Твоя́ врази́ мои́.
140 Разжже́но сло́во Твое́ зело́,/ и раб Твой возлюби́ е́.
141 Юне́йший аз есмь и уничиже́н,/ оправда́ний Твои́х не забы́х.
142 Пра́вда Твоя́ пра́вда во век,/ и зако́н Твой и́стина.
143 Ско́рби и ну́жды обрето́ша мя,/ за́поведи Твоя́ поуче́ние мое́.
144 Пра́вда свиде́ния Твоя́ в век,/ вразуми́ мя, и жив бу́ду.
145 Воззва́х всем се́рдцем мои́м, услы́ши мя, Го́споди,/ оправда́ния Твоя́ взыщу́.
146 Воззва́х Ти, спаси́ мя,/ и сохраню́ свиде́ния Твоя́.
147 Предвари́х в безго́дии и воззва́х,/ на словеса́ Твоя́ упова́х.
148 Предвари́сте о́чи мои́ ко у́тру,/ поучи́тися словесе́м Твои́м.
149 Глас мой услы́ши, Го́споди, по ми́лости Твое́й:/ по судьбе́ Твое́й живи́ мя.
150 Прибли́жишася гоня́щии мя беззако́нием,/ от зако́на же Твоего́ удали́шася.
151 Близ еси́ Ты, Го́споди,/ и вси путие́ Твои́ и́стина.
152 Испе́рва позна́х от свиде́ний Твои́х,/ я́ко в век основа́л я́ еси́.
153 Виждь смире́ние мое́ и изми́ мя,/ я́ко зако́на Твоего́ не забы́х.
154 Суди́ суд мой и изба́ви мя,/ словесе́ ра́ди Твоего́ живи́ мя.
155 Дале́че от гре́шник спасе́ние,/ я́ко оправда́ний Твои́х не взыска́ша.
156 Щедро́ты Твоя́ мно́ги, Го́споди,/ по судьбе́ Твое́й живи́ мя.
157 Мно́зи изгоня́щии мя и стужа́ющии ми,/ от свиде́ний Твои́х не уклони́хся.
158 Ви́дех неразумева́ющия и иста́ях,/ я́ко слове́с Твои́х не сохрани́ша.
159 Виждь, я́ко за́поведи Твоя́ возлюби́х, Го́споди,/ по ми́лости Твое́й живи́ мя.
160 Нача́ло слове́с Твои́х и́стина,/ и во век вся судьбы́ пра́вды Твоея́.
161 Кня́зи погна́ша мя ту́не,/ и от слове́с Твои́х убоя́ся се́рдце мое́.
162 Возра́дуюся аз о словесе́х Твои́х,/ я́ко обрета́яй коры́сть мно́гу.
163 Непра́вду возненави́дех и омерзи́х,/ зако́н же Твой возлюби́х.
164 Седмери́цею днем хвали́х Тя/ о судьба́х пра́вды Твоея́.
165 Мир мног лю́бящым зако́н Твой,/ и несть им собла́зна.
166 Ча́ях спасе́ния Твоего́, Го́споди,/ и за́поведи Твоя́ возлюби́х.
167 Сохрани́ душа́ моя́ свиде́ния Твоя́ / и возлюби́ я́ зело́.
168 Сохрани́х за́поведи Твоя́ и свиде́ния Твоя́,/ я́ко вси путие́ мои́ пред Тобо́ю, Го́споди.
169 Да прибли́жится моле́ние мое́ пред Тя, Го́споди,/ по словеси́ Твоему́ вразуми́ мя.
170 Да вни́дет проше́ние мое́ пред Тя, Го́споди,/ по словеси́ Твоему́ изба́ви мя.
171 Отры́гнут устне́ мои́ пе́ние,/ егда́ научи́ши мя оправда́нием Твои́м.
172 Провеща́ет язы́к мой словеса́ Твоя́,/ я́ко вся за́поведи Твоя́ пра́вда.
173 Да бу́дет рука́ Твоя́ е́же спасти́ мя,/ я́ко за́поведи Твоя́ изво́лих.
174 Возжела́х спасе́ние Твое́, Го́споди,/ и зако́н Твой поуче́ние мое́ есть.
175 Жива́ бу́дет душа́ моя́ и восхва́лит Тя,/ и судьбы́ Твоя́ помо́гут мне.
176 Заблуди́х, я́ко овча́ поги́бшее,/ взыщи́ раба́ Твоего́, я́ко за́поведей Твои́х не забы́х.
Сла́ва Отцу́ и Сы́ну/ и Свято́му Ду́ху / Аллилуиа.
И ны́не и при́сно/ и во ве́ки веко́в, ами́нь./ Аллилуиа.
И по конце абие: Благослове́н еси́, Го́споди,/ научи́ мя оправда́нием Твои́м.
Святы́х лик обре́те исто́чник жи́зни, и дверь ра́йскую:/ да обря́щу и аз путь покая́нием,/ поги́бшее овча́ аз есмь,// воззови́ мя, Спа́се, и спаси́ мя.
Благослове́н еси́, Го́споди,/ научи́ мя оправда́нием Твои́м.
А́гнца Бо́жия пропове́давше,/ и закла́ни бы́вше я́коже а́гнцы,/ и к жи́зни нестаре́емей, святи́и,/ и присносу́щней преста́вльшеся,/ Того́ приле́жно, му́ченицы, моли́те,// долго́в разреше́ние нам дарова́ти.
Благослове́н еси́, Го́споди,/ научи́ мя оправда́нием Твои́м.
В путь у́зкий хо́ждшии приско́рбный,/ вси в житии́ крест я́ко яре́м взе́мшии,/ и Мне после́довавшии ве́рою,/ прииди́те, наслади́теся,/ и́хже угото́вах вам по́честей // и венцо́в Небе́сных.
Благослове́н еси́, Го́споди,/ научи́ мя оправда́нием Твои́м.
О́браз есмь неизрече́нныя Твоея́ сла́вы,/ а́ще и я́звы ношу́ прегреше́ний:/ уще́дри Твое́ созда́ние, Влады́ко,/ и очи́сти Твои́м благоутро́бием,/ и возжеле́нное оте́чество пода́ждь ми,// рая́ па́ки жи́теля мя сотворя́я.
Благослове́н еси́, Го́споди,/ научи́ мя оправда́нием Твои́м.
Дре́вле у́бо от не су́щих созда́вый мя,/ и о́бразом Твои́м Боже́ственным почты́й,/ преступле́нием же за́поведи,/ па́ки мя возврати́вый в зе́млю, от нея́же взят бых,/ на е́же по подо́бию возведи́,// дре́внею добро́тою возобрази́тися.
Благослове́н еси́, Го́споди,/ научи́ мя оправда́нием Твои́м.
Упоко́й, Бо́же, раба́ Твоего́,/ и учини́ его́ в раи́,/ иде́же ли́цы святы́х, Го́споди,/ и пра́ведницы сия́ют, я́ко свети́ла,/ усо́пшаго раба́ Твоего́ упоко́й,// презира́я его́ вся согреше́ния.
Сла́ва Отцу́ и Сы́ну/ и Свято́му Ду́ху.
Трисия́тельное еди́наго Божества́,/ благоче́стно пое́м вопию́ще:/ свят еси́, О́тче Безнача́льный,/ Собезнача́льный Сы́не, и Боже́ственный Ду́ше,/ просвети́ нас ве́рою Тебе́ служа́щих,// и ве́чнаго огня́ исхити́.
И ныне и ны́не и при́сно/ и во ве́ки веко́в, ами́нь
Ра́дуйся Чи́стая,/ Бо́га пло́тию ро́ждшая во спасе́ние всех,/ Е́юже род челове́ческий обре́те спасе́ние,/ Тобо́ю да обря́щем рай,// Богоро́дице Чи́стая Благослове́нная.
Аллилу́ия, аллилу́ия, аллилу́ия,/ сла́ва Тебе́ Бо́же. (трижды).
Таже ектениа:
Паки и паки миром Господу помолимся.
Лик: Господи, помилуй.
Еще́ мо́лимся о упокое́нии души́ усо́пшаго раба́ Бо́жия диа́кона (имярек) и о е́же прости́тися ему́ вся́кому прегреше́нию во́льному же и нево́льному.
Лик: Го́споди, поми́луй.
Я́ко да Госпо́дь Бог учини́т ду́шу его́, иде́же пра́веднии упокоя́ются.
Лик: Го́споди, поми́луй.
Ми́лости Бо́жия, Ца́рства Небе́снаго и оставле́ния грехо́в его́ у Христа́, Безсме́ртнаго Царя́ и Бо́га на́шего, про́сим.
Лик: Пода́й, Го́споди.
Го́споду помо́лимся.
Лик: Господи, помилуй.
Священник глаголет молитву: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ диа́кона (имярек), в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ диакона (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Таже степенна, 1-й антифон, глас 6:
На Не́бо о́чи мои́ / возвожу́ к Тебе́, Сло́ве:/ уще́дри мя, да живу́ Тебе́.
Поми́луй нас, уничиже́нных,/ устроя́я благопотре́бныя / Твоя́ сосу́ды, Сло́ве.
Слава, и ныне: Свято́му Ду́ху / вся́кая всеспаси́тельная вина́:/ а́ще ко́ему Сей по достоя́нию дхнет,/ ско́ро взе́млет от земны́х,/ восперя́ет, возраща́ет,/ устроя́ет Горе́.
Таже диакон: Во́нмем.
Священник: Мир всем.
Лик: И ду́хови твоему́.
Диакон: Премудрость, вонмем, прокимен, глас 6: Блаже́н путь, во́ньже и́деши днесь, душе́,/ я́ко угото́вася тебе́ ме́сто упокое́ния.
Стих: Обрати́ся, душе́ моя́, в поко́й твой, я́ко Госпо́дь бла́го сотвори́ тебе́.
Апостол к Солуняном, зачало 270:
Бра́тие, не хощу́ вас неве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршия во Иису́се приведе́т с Ним. Сие́ бо вам глаго́лем сло́вом Госпо́дним, я́ко мы живу́щии, оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии, во гла́се Арха́нгелове и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы, живу́щии оста́вшии, ку́пно с ни́ми восхище́ни бу́дем на о́блацех в сре́тение Госпо́дне на возду́се, и та́ко всегда́ с Го́сподем бу́дем.
Аллилуиа, глас 8:
Блаже́н, его́же избра́л и прия́л еси́, Го́споди.
Диакон: Прему́дрость, про́сти, услы́шим свята́го Ева́нгелиа.
Священник: Мир всем.
Лик: И ду́хови твоему́.
Священник: От Иоа́нна свята́го Ева́нгелиа чте́ние.
Лик: Сла́ва Тебе́, Го́споди, сла́ва Тебе́.
Диакон: Во́нмем.
Евангелие от Иоанна, зачало 16:
Рече́ Госпо́дь ко прише́дшим к Нему́ иуде́ем: ами́нь, ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя, и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь, ами́нь глаго́лю вам, я́ко гряде́т час, и ны́не есть, егда́ ме́ртвии услы́шат глас Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́. И о́бласть даст Ему́ и суд твори́ти, я́ко Сын Челове́чь есть, не диви́теся сему́. Я́ко гряде́т час, во́ньже вси су́щии во гробе́х услы́шат глас Сы́на Бо́жия, и изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же. Я́коже слы́шу, сужду́, и суд Мой пра́веден есть, я́ко не ищу́ во́ли Моея́, но во́ли посла́вшаго Мя Отца́.
Лик: Сла́ва Тебе́, Го́споди, сла́ва Тебе́.
Таже 2-й антифон, глас 6:
А́ще не Госпо́дь бы был в нас,/ никто́же от нас проти́ву возмо́гл бы/ вра́жиим бра́нем одоле́ти:/ побежда́ющии бо от зде возно́сятся.
Зубы́ их да не я́та бу́дет душа́ моя́,/ я́ко птене́ц, Сло́ве./ Увы́ мне, ка́ко и́мам от врага́ избы́ти,/ грехолюби́вый сый!
Слава, и ныне: Святы́м Ду́хом обоже́ние всем,/ благоволе́ние, ра́зум,/ мир и благослове́ние:/ Равноде́телен бо есть Отцу́ и Сы́ну.
Таже диакон: Во́нмем.
Священник: Мир всем.
Лик: И ду́хови твоему́.
Диакон: Премудрость, вонмем, прокимен, глас 6: Блаже́н, его́же избра́л/ и прия́л еси́, Го́споди.
Стих: Тебе подобает песнь, Боже, в Сионе.
Деяний святых апостол чтение, зачало 16:
Во днех же сих, умно́жившимся ученико́м, бысть ропта́ние е́ллинов ко евре́ом, я́ко презира́емы быва́ху во вседне́внем служе́нии вдови́цы их. Призва́вше же двана́десять мно́жество учени́к, ре́ша: не уго́дно есть нам, оста́вльшым сло́во Бо́жие, служи́ти трапе́зам: усмотри́те у́бо, бра́тие, му́жы от вас свиде́тельствованы седмь, испо́лнены Ду́ха Свя́та и прему́дрости, и́хже поста́вим над слу́жбою се́ю: мы же в моли́тве и служе́нии сло́ва пребу́дем. И уго́дно бысть сло́во сие́ пред всем наро́дом: и избра́ша Стефа́на, му́жа испо́лнена ве́ры и Ду́ха Свя́та, и Фили́ппа, и Про́хора и Никано́ра, и Ти́мона и Парме́на, и Никола́я прише́льца антиохи́йскаго, и́хже поста́виша пред апо́столы: и помоли́вшеся возложи́ша на ня ру́це. И сло́во Бо́жие растя́ше, и мно́жашеся число́ учени́к во Иерусали́ме зело́: мног же наро́д свяще́нников послу́шаху ве́ры.
Аллилуиа, глас 6: Блаже́н, его́же избра́л и прия́л еси́, Го́споди.
Диакон: Прему́дрость, про́сти, услы́шим свята́го Ева́нгелиа.
Священник: Мир всем.
Лик: И ду́хови твоему́.
Священник: От Иоа́нна свята́го Ева́нгелиа чте́ние.
Лик: Сла́ва Тебе́, Го́споди, сла́ва Тебе́.
Диакон: Во́нмем.
Евангелие от Иоанна, зачало 21:
Рече́ Госпо́дь ко прише́дшим к Нему́ иуде́ем: Аз есмь хлеб живо́тный; гряды́й ко Мне, не и́мать взалка́тися, и ве́руяй в Мя, не и́мать вжажда́тися никогда́же. Но рех вам, я́ко и ви́десте Мя, и не ве́руете. Все, е́же даст Мне Оте́ц, ко Мне прии́дет; и гряду́щаго ко Мне не изжену́ вон. Я́ко снидо́х с Небесе́, да не творю́ во́лю Мою́, но во́лю посла́вшаго Мя Отца́. Се же есть во́ля посла́вшаго Мя Отца́, да все, е́же даст Ми, не погублю́ от Него́, но воскрешу́ е в после́дний день.
Лик: Сла́ва Тебе́, Го́споди, сла́ва Тебе́.
Блаженна, глас 6:
Во Ца́рствии Твое́м помяни́ нас, Го́споди,/ егда́ прии́деши во Ца́рствии Твое́м.
Блаже́ни ни́щии ду́хом,/ я́ко тех есть Ца́рство Небе́сное.
Блаже́ни пла́чущии,/ я́ко ти́и уте́шатся.
Блаже́ни кро́тцыи/, я́ко ти́и насле́дят зе́млю.
Блаже́ни а́лчущии, и жа́ждущии пра́вды,/ я́ко ти́и насы́тятся.
Блаже́ни ми́лостивии,/ я́ко ти́и поми́ловани бу́дут.
Помяни́, Благоутро́бне, раба́ Твоего́, я́коже помяну́л еси́ разбо́йника во Ца́рствии Твое́м.
Блаже́ни чи́стии се́рдцем,/ я́ко ти́и Бо́га у́зрят.
Вси боя́щиися Бо́га, та́мо возвеселя́тся о Нем во Ца́рствии Небе́снем.
Блаже́ни миротво́рцы,/ я́ко ти́и сы́нове Бо́жии нареку́тся.
Усе́рдно рабо́тавшаго Тебе́ Христе́, и до́бре потруди́вшагося на земли́, диа́кона (имярек), просла́ви, Спа́се, и на Небесе́х.
Блаже́ни изгна́ни пра́вды ра́ди,/ я́ко тех есть Ца́рство Небе́сное.
Христо́с тя упоко́ит во стране́ живу́щих, и врата́ ра́йския да отве́рзет ти, и Ца́рствия пока́жет жи́теля, и оставле́ние тебе́ даст о ни́хже согреши́л еси́ в житии́, христолю́бче.
Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.
Упоко́й раба́ Твоего́, Бо́же, со святы́ми, я́ко Благ, во Ца́рствии Небе́снем.
Ра́дуйтеся и весели́теся,/ я́ко мзда ва́ша мно́га на Небесе́х.
Преста́вленный и во гро́бе лежа́й ме́ртвый, благопримири́тельный всем вопие́т: прииди́те, дру́зи мои́, ко мне, у́зрите добро́ту теле́сную увя́дшу: те́мже бра́тие, со слеза́ми возопии́м: упоко́й, Бо́же, его́же прия́л еси́, со святы́ми Твои́ми.
Слава, и ныне, Богородичен:
Вси ублажа́ем Тя, Чи́стая, безсе́менно бо родила́ еси́ пло́тию Бо́га, и Царя́ Небе́снаго.
Таже 3-й антифон, глас 6:
Наде́ющиися на Го́спода/ враго́м стра́шни и всем ди́вни,/ горе́ бо зрят.
В беззако́ния рук свои́х,/ пра́ведных жре́бий, Помо́щника Тя име́я,/ Спа́се, не простира́ет.
Слава, и ныне: Свята́го Ду́ха держа́ва на всех,/ Ему́же Вы́шняя во́инства покланя́ются,/ со вся́ким дыха́нием до́льним.
Таже диакон: Во́нмем.
Священник: Мир всем.
Лик: И ду́хови твоему́.
Диакон: Прему́дрость, во́нмем, проки́мен, глас 6: Душа́ его́ / во благи́х водвори́тся.
Стих: : К Тебе́, Го́споди, воззову́, Бо́же мой, да не премолчи́ши от мене́.
Апостол к Коринфяном, зачало 153:
Бра́тие, вы есте́ те́ло Христо́во, и у́ди от ча́сти. И о́вы у́бо положи́ Бог в Це́ркви, пе́рвее апо́столы, второ́е проро́ки, тре́тие учи́тели: пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков. Еда́ вси апо́столи! Еда́ вси проро́цы! Еда́ вси учи́тели! Еда́ вси си́лы! Еда́ вси дарова́ния и́мут исцеле́ний! Еда́ вси язы́ки глаго́лют! Еда́ вси сказу́ют! Ревну́йте же дарова́ний бо́льших, и еще́ по превосхожде́нию путь вам показу́ю. А́ще язы́ки челове́ческими глаго́лю и а́нгельскими, любве́ же не и́мам, бых (я́ко) медь звеня́щи, или́ кимва́л звяца́яй. И а́ще и́мам проро́чество и вем та́йны вся, и весь ра́зум, и а́ще и́мам всю ве́ру, я́ко и го́ры преставля́ти, любве́ же не и́мам, ничто́же есмь. И а́ще разда́м вся име́ния моя́, и а́ще преда́м те́ло мое́, во е́же сжещи́ е, любве́ же не и́мам, ника́я по́льза ми есть. Любы́ долготерпи́т, милосе́рдствует, любы́ не зави́дит, любы́ не превозно́сится, не горди́тся, не безчи́нствует, не и́щет своя́ си, не раздража́ется, не мы́слит зла, не ра́дуется о непра́вде, ра́дуется же о и́стине: вся лю́бит, всему́ ве́ру е́млет, вся упова́ет, вся терпи́т. Любы́ николи́же отпа́дает.
Аллилуиа, глас 6: Блаже́н, его́же избра́л и прия́л еси́, Го́споди.
Стих: Душа́ его́ во благи́х водвори́тся.
Диакон: Прему́дрость, про́сти, услы́шим свята́го Ева́нгелиа.
Священник: Мир всем.
Лик: И ду́хови твоему́.
Священник: От Иоа́нна свята́го Ева́нгелиа чте́ние.
Лик: Сла́ва Тебе́, Го́споди, сла́ва Тебе́.
Диакон: Во́нмем.
Евангелие от Иоанна, зачало 23:
Рече́ Госпо́дь ко прише́дшым к Нему́ иуде́ем: Аз есмь хлеб живо́тный. Отцы́ ва́ши ядо́ша ма́нну в пусты́ни, и умро́ша. Сей есть хлеб сходя́й с Небесе́, да а́ще кто от него́ яст, не у́мрет. Аз есмь хлеб живо́тный, и́же сше́дый с Небесе́: а́ще кто снесть от хле́ба сего́, жив бу́дет во ве́ки: и хлеб, его́же Аз дам, Плоть Моя́ есть, ю́же Аз дам за живо́т ми́ра. Пря́хуся ме́жду собо́й жи́дове, глаго́люще: ка́ко мо́жет Сей нам да́ти Плоть Свою́ я́сти? Рече́ же им Иису́с: ами́нь, ами́нь глаго́лю вам, а́ще не сне́сте Пло́ти Сы́на Челове́ческаго, ни пие́те Кро́ви Его́, живота́ не и́мате в себе́. Яды́й Мою́ Плоть, и пия́й Мою́ Кровь, и́мать живо́т ве́чный: и Аз воскрешу́ его́ в после́дний день.
Лик: Сла́ва Тебе́, Го́споди, сла́ва Тебе́.
Таже псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вая пред Тобо́ю сотвори́х; я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твоей. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на олта́рь Твой тельцы́.
И канон, глас 6.
Песнь 1
Ирмос: Волно́ю морско́ю/ Скры́вшаго дре́вле/ гони́теля мучи́теля -/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м, сла́вно бо просла́вися.
Припев: Упоко́й, Го́споди, ду́шу усо́пшаго раба́ Твоего́.
Тебе́ Благоде́телю и всех Влады́це Христу́ припа́даем со слеза́ми те́пле, надгро́бную сию́ песнь с пла́чем взыва́юще: ве́рнаго раба́ Твоего́ упоко́й, я́ко Благоутро́бен.
Е́же одесну́ю Тебе́ сподо́би, Спа́се, свята́го стоя́ния со избра́нными Твои́ми, в наде́жди воскресе́ния уме́ршаго, Человеколю́бче, приле́жно мо́лимся со гла́сом хвале́ния.
В Небе́снем Честне́м Ца́рствии избра́ннаго раба́ Твоего́, от земли́ преста́вльшагося, све́тло ра́доватися сподо́би, Человеколю́бче, презира́яй, я́ко Благоутро́бен, вся его́ согреше́ния.
Слава, и ныне: По до́лгу вси любо́вию воспева́ем Тя, Де́во Пречи́стая Мари́е, Ма́ти Бо́жия, я́ко неусыпа́емое о́ко при́сно и́маши моли́твы Твоея́: от прегреше́ний и Суда́ сме́ртнаго изба́ви нас.
Песнь 3
Ирмос: Тебе́, на вода́х/ пове́сившаго всю зе́млю неодержи́мо,/ тварь, ви́девши на ло́бнем ви́сима,/ у́жасом мно́гим содрога́шеся,/ несть свят,/ ра́зве Тебе́, Го́споди, взыва́ющи.
Несть челове́к на земли́, Спа́се, и́же не согреши́: те́мже моле́ние на́ше приими́ и прости́ вся согреше́ния раба́ Твоего́.
И кто Человеколю́бец, я́коже Ты, Го́споди, проща́я грехи́ живы́м и ме́ртвым вла́стию мно́гою! Те́мже то́ю спаси́ и раба́ Твоего́.
Го́рняго зва́ния, Спа́се, ве́рно преста́вльшагося покажи́ насле́дника, прие́мля того́ коне́чную моли́тву сле́зную, Еди́не Безгре́шне.
Слава, и ныне: Су́щая Влады́чице на́ша, Всесвята́я Де́во, моля́щи не преста́й, Его́же родила́ еси́ Бо́га, преста́вльшагося ве́рно Ца́рствия Твоего́ сподо́бити.
Седален, глас 6:
Вои́стину суета́ вся́ческая,/ житие́ же сень и со́ние:/ и́бо всу́е мяте́тся всяк земноро́дный,/ я́коже рече́ Писа́ние:/ егда́ мир приобря́щем,/ тогда́ во гроб всели́мся,/ иде́же ку́пно ца́рие и ни́щии./ Те́мже, Христе́ Бо́же,/ преста́вльшагося раба́ Твоего́ упоко́й,/ я́ко Человеколю́бец.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Всесвята́я Богоро́дице,/ во вре́мя живота́ моего́ не оста́ви мене́,/ челове́ческому предста́тельству не вве́ри мя,/ но Сама́ заступи́ и поми́луй мя.
Песнь 4
Ирмос: На Кресте́ Твое́ Боже́ственное истоща́ние/ прови́дя, Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де, я́ко Всеси́лен.
Бра́тия мои́, и ча́да, и дру́зи мои́, не забыва́йте мя, оба́че моли́теся ко Го́споду, я́ко да Ми́лостив ми бу́дет, вопие́т преста́вленный во гро́бе лежа́й, и пода́ст проще́ние всех согреше́ний мои́х.
Покая́нием, пре́жде сме́рти, служи́теля Твоего́, возже́гшаго све́тло свещу́ Тебе́, Христе́, Благоутро́бне Спа́се, Черто́га Твоего́ све́тло сподо́би.
Егда́ обнажи́ши сокрове́нная вся и обличи́ши, Христе́, на́ша грехи́, пощади́, Го́споди, его́же прия́л еси́, помина́яй его́ испове́дание.
Слава, и ныне: Не пре́зри моле́ния вопию́щих Ти с пла́чем приле́жно, Пресвята́я Влады́чице, во е́же упокое́ние обрести́ ве́рному рабу́ Твоему́, от нас преста́вльшемуся.
Песнь 5
Ирмос: Богоявле́ния Твоего́, Христе́,/ к нам ми́лостивно бы́вшаго,/ Иса́ия, Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии, и воста́нут су́щии во гробе́х,/ и вси земноро́днии возра́дуются.
В ли́це избра́нных и в сла́дости ра́йстей, его́же в ве́ре от нас преста́вил еси́, Спа́се, упоко́й, рекл бо еси́ ученико́м Твои́м: бди́те и моли́теся; и, я́коже Влады́ка всех, сего́ усе́рднаго моли́твенника сподо́би Ца́рствия Твоего́.
Созда́ние Твое́, Го́споди, его́же зако́ну челове́ческому покори́л еси́, ми́луеши влады́чне, Еди́не Человеколю́бче: те́мже осла́би, оста́ви, Спа́се, грехи́ преста́вльшагося и сподо́би его́ Ца́рствия Твоего́.
Све́тлаго и Боже́ственнаго улучи́ти сия́ния Твоего́, Христе́, преста́вльшагося ве́рно благоволи́, и, я́ко Еди́н Ми́лостив, со избра́нными упокое́ние ему́ да́руй, сподобля́я Ца́рствия Твоего́.
Слава, и ныне: Влады́чице, Богоро́дице, се вре́мя по́мощи, се вре́мя Твоего́ заступле́ния, о не́мже день и нощь припада́х те́пле и моля́хся Тебе́.
Песнь 6
Ирмос: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́.
Смерть и суд нас ожида́ет, облича́яй вся дела́: от него́же раба́ Твоего́ изба́ви, Человеколю́бче, его́же преста́вил еси́.
Отве́рзи, Спа́се наш, преста́вльшемуся две́ри ми́лости Твоея́, да ликовству́ет во сла́ве, причаща́яся ра́дости Ца́рствия Твоего́.
Ми́лостию Твое́ю, Человеколю́бче, изба́ви прегреше́ний служи́теля Твоего́ ны́не преста́вльшагося, я́ко да в земли́ кро́тких упокое́ние обря́щет.
Слава, и ныне: Сме́рти умерщвле́ние и кля́твы отъя́тие, Созда́тель всех, от Тебе́ пло́тию роди́ся, Богороди́тельнице, и всех в ве́ре уме́рших спаса́ет, я́ко Благ и Человеколю́бец.
Таже ектениа:
Па́ки и па́ки ми́ром Го́споду помо́лимся.
Лик: Го́споди, поми́луй.
Еще́ мо́лимся о упокое́нии души́ усо́пшаго раба́ Бо́жия диа́кона (имярек) и о е́же прости́тися ему́ вся́кому прегреше́нию во́льному же и нево́льному.
Лик: Го́споди, поми́луй.
Я́ко да Госпо́дь Бог учини́т ду́шу его́, иде́же пра́веднии упокоя́ются.
Лик: Го́споди, поми́луй.
Ми́лости Бо́жия, Ца́рства Небе́снаго и оставле́ния грехо́в его́ у Христа́, Безсме́ртнаго Царя́ и Бо́га на́шего, про́сим.
Лик: Пода́й, Го́споди.
Го́споду помо́лимся.
Лик: Го́споди, поми́луй.
Священник глаголет молитву: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ диа́кона (имярек), в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ диакона (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Кондак, глас 8:
Со святы́ми упоко́й,/ Христе́, ду́шу раба́ Твоего́,/ иде́же несть/ боле́знь, ни печа́ль,/ ни воздыха́ние,// но жизнь безконе́чная.
Икос:
Сам Еди́н еси́ Безсме́ртный,/ сотвори́вый и созда́вый челове́ка:/ земни́и у́бо от земли́ созда́хомся,/ и в зе́млю ту́южде по́йдем,/ я́коже повеле́л еси́, созда́вый мя и реки́й ми:/ я́ко земля́ еси́, и в зе́млю оти́деши,/ а́може вси челове́цы по́йдем,/ надгро́бное ры́дание творя́ще песнь:/ Аллилу́иа.
Песнь 7
Ирмос: Неизрече́нное чу́до:/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.
Огня́ гее́нскаго и стра́шнаго изрече́ния изба́ви, Го́споди, его́же в ве́ре ны́не прия́л еси́ и пода́ждь пе́ти Тебе́: Изба́вителю Бо́же, благослове́н еси́.
Ме́ста селе́ния сла́вы ди́вныя, ве́рнаго раба́ Твоего́, Го́споди, сподо́би и пода́ждь пе́ти Тебе́: Изба́вителю Бо́же, благослове́н еси́.
Вели́к суд, ну́жда же неисповеди́мая гее́нны есть, бра́тие: та́мо бо ду́ши гре́шных с те́лом у́бо паля́тся, и с боле́знию слезя́т, не могу́ще пе́ти: Изба́вителю Бо́же, благослове́н еси́.
Слава, и ныне: Пою́щия Тя, Богоро́дице Пренепоро́чная, при́сно огражда́й моли́твами Твои́ми, преста́вльшияся го́рьких муче́ний изба́ви, да с Тобо́ю Христу́ вопию́т: Изба́вителю Бо́же, благослове́н еси́.
Песнь 8
Ирмос: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во Гроб мал странноприе́млется./ Его́же, о́троцы благослови́те, свяще́нницы, воспо́йте, / лю́дие, превозноси́те во вся ве́ки.
О, кий час стра́шный согреша́ющих ожида́ет, бра́тие! О, кий страх тогда́! Огнь поя́ст гее́нский и ве́чно му́чити бу́дет. Те́мже, Христе́, от нас ны́не преста́вленнаго стра́шнаго преще́ния изба́ви и гее́нскаго муче́ния исхи́ти во веки.
О, ра́дости пра́ведных, ю́же прие́млют, егда́ прии́дет Судия́! Та́мо бо черто́г угото́вася и рай, и все Христо́во Ца́рство: в не́мже Твоя́ рабы́ веселя́щияся покажи́, со святы́ми, Христе́, во ве́ки.
Кто постои́т, Христе́, прише́ствия Твоего́ стра́шному преще́нию! Та́мо не́бо свие́тся я́коже сви́ток стра́шно, и паду́т зве́зды, стра́хом поколе́блется вся тварь, и свет измени́тся: но тогда́ пощади́, Сло́ве, от нас преста́вльшагося.
Слава, и ныне: Его́же воплоти́ла еси́ Сы́на, па́че естества́, Чи́стая, Сей есть Судия́ и живы́х и ме́ртвых, и судя́й всей земли́ спаса́ет мно́гия: па́че же любо́вию Тому́ покланя́ющихся и Тя воспева́ющих Богоро́дицу во вся ве́ки.
Песнь 9
Ирмос: Не рыда́й Мене́, Ма́ти,/ зря́щи во Гро́бе,/ Его́же во чре́ве без се́мене зачала́ еси́, Сы́на:/ воста́ну бо, и просла́влюся,/ и вознесу́ со сла́вою непреста́нно я́ко Бог,/ ве́рою и любо́вию Тя велича́ющия.
Не рыда́йте вси, и́же в ве́ре уме́ршии, я́ко Христо́с о нас претерпе́ пло́тию крест и погребе́ние, безсме́ртия сы́ны соде́ла вся вопию́щия к Нему́: не вни́ди в суд с рабо́м Твои́м.
Яко в ве́ре и наде́жди воскресе́ния усо́пшаго бра́та во оби́телех святы́х вчини́ти Христо́ви усе́рдно помо́лимся и возопии́м: не вни́ди в суд, Го́споди, с рабо́м Твои́м.
В нестаре́емей Твое́й сла́ве и сла́дости ра́йстей, от нас ны́не преста́вльшагося вчини́, Бла́же, и сотвори́ его́ избра́нна предста́теля Ца́рствия Твоего́.
Слава, и ныне: Тя, я́ко Ма́терь Жи́зни па́че естества́ су́щую, Богоро́дице Де́во, благоче́стно воспева́ем, ве́рнии: Тобо́ю бо мы, уме́ршии пре́жде, обезсме́ртившеся, обрето́хом живо́т и се Тебе́ песнь исполня́ем.
Таже ектениа:
Па́ки и па́ки ми́ром Го́споду помо́лимся.
Лик: Го́споди, поми́луй.
Еще́ мо́лимся о упокое́нии души́ усо́пшаго раба́ Бо́жия диа́кона (имярек) и о е́же прости́тися ему́ вся́кому прегреше́нию во́льному же и нево́льному.
Лик: Го́споди, поми́луй.
Я́ко да Госпо́дь Бог учини́т ду́шу его́, иде́же пра́веднии упокоя́ются.
Лик: Го́споди, поми́луй.
Ми́лости Бо́жия, Ца́рства Небе́снаго и оставле́ния грехо́в его́ у Христа́, Безсме́ртнаго Царя́ и Бо́га на́шего, про́сим.
Лик: Пода́й, Го́споди.
Го́споду помо́лимся.
Лик: Го́споди, поми́луй.
Священник глаголет молитву: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ диа́кона (имярек), в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ диакона (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
Светилен:
Ны́не упоко́ихся и обрето́х осла́бу мно́гу, я́ко преста́вихся от истле́ния и приложи́хся к животу́: Го́споди, сла́ва Тебе́.
Таже стихи и на кийждо стих светилен.
Стих 1: Челове́к, я́ко трава́ дни́е его́, я́ко цвет се́льный.
Стих 2: Я́ко дух про́йде в нем и не бу́дет.
Стих 3: И и́стина Госпо́дня пребыва́ет во век.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Ны́не избра́х Богома́терь Отрокови́цу, я́ко роди́ся из Нея́ Христо́с Изба́витель всех: Го́споди, сла́ва Тебе́.
И абие хвалитны:
Хвали́те Го́спода с небе́с: Тебе́ подоба́ет песнь Бо́гу.
Хвали́те Го́спода с небе́с, хвали́те Его́ в Вы́шних: Тебе́ подоба́ет песнь Бо́гу.
Хвали́те Его́ вси А́нгели Его́, хвали́те Его́, вся Си́лы Его́. Тебе́ подоба́ет песнь Бо́гу.
Хвали́те Его́ со́лнце и луна́, хвали́те Его́ вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. Поста́ви я в век и в век ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны: огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́. И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющымся Ему́.
Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о Сотво́ршем eго́, и сы́нове Сио́ни возра́дуются о Царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их: сотвори́ти отмще́ние во язы́цех, обличе́ния в лю́дех, связа́ти ца́ри их пу́ты, и сла́вныя их ручны́ми око́вы желе́зными. Сотвори́ти в них суд напи́сан: сла́ва сия́ бу́дет всем преподо́бным Его́. Хвали́те Бо́га во святы́х Его́, хвали́те Его́ во утверже́нии си́лы Его́.
Хвали́те Его́ на си́лах Его́, хвали́те Его́ по мно́жеству вели́чествия Его́.
Таже стихиры, глас 6. Подобен: Отча́янная:
Обоготворе́н в преставле́нии животворя́щим Твои́м, Христе́, ны́не та́инством,/ к Тебе́ пре́йде боже́ственный служи́тель Твой:/ приими́ в ру́це Твои́ ду́шу его́, я́ко птенца́,/ учини́ его́ во дво́рех Твои́х и во а́нгельская ликостоя́ния,/ и упоко́й, его́же прия́л еси́ повеле́нием Твои́м, Го́споди,/ вели́кия ра́ди Твоея́ ми́лости.
Хвали́те Его́ во гла́се тру́бнем,/ хвали́те Его́ во псалти́ри и гу́слех.
Обоготворе́н в преставле́нии животворя́щим Твои́м, Христе́, ны́не та́инством,/ к Тебе́ пре́йде боже́ственный служи́тель Твой:/ приими́ в ру́це Твои́ ду́шу его́, я́ко птенца́,/ учини́ его́ во дво́рех Твои́х и во а́нгельская ликостоя́ния,/ и упоко́й, его́же прия́л еси́ повеле́нием Твои́м, Го́споди,/ вели́кия ра́ди Твоея́ ми́лости.
Хвали́те Его́ в тимпа́не и ли́це,/ хвали́те Его́ во стру́нах и орга́не.
Жи́тельствовав во благоче́стии, и укра́шен диа́кон Твой, Христе́,/ сослужи́тель Боже́ственных Та́инств,/ Твои́м Боже́ственным повеле́нием пре́йде от жите́йских молв к Тебе́:/ его́же я́ко служи́теля Твоего́, Спа́се, прии́м, спаси́,/ и с пра́ведными упоко́й, его́же прия́л еси́,/ вели́кия ра́ди Твоея́ ми́лости.
Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.
Жи́тельствовав во благоче́стии, и укра́шен диа́кон Твой, Христе́,/ сослужи́тель Боже́ственных Та́инств,/ Твои́м Боже́ственным повеле́нием пре́йде от жите́йских молв к Тебе́:/ его́же я́ко служи́теля Твоего́, Спа́се, прии́м, спаси́,/ и с пра́ведными упоко́й, его́же прия́л еси́,/ вели́кия ра́ди Твоея́ ми́лости.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен, глас тойже: Бо́га из Тебе́ вопло́щшагося позна́хом,/ Богоро́дице Де́во:/ Того́ моли́, спасти́ся душа́м на́шим.
Таже глаголем Славословие великое:
Сла́ва в Вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Царю́ Небе́сный, Бо́же, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, в сла́ву Бо́га Отца́, ами́нь.
На всяк день благословлю́ Тя и восхвалю́ и́мя Твое́ во ве́ки, и в век ве́ка.
Сподо́би, Го́споди, в день сей без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено и́мя Твое́ во ве́ки, ами́нь.
Бу́ди, Го́споди, ми́лость Твоя́ на нас, я́коже упова́хом на Тя.
Благослове́н еси́, Го́споди, научи́ мя оправда́нием Твои́м. (трижды).
Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́.
Го́споди, к Тебе́ прибего́х, научи́ мя твори́ти во́лю Твою́, я́ко Ты еси Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Святы́й Безсме́ртный, поми́луй нас.
Таже высочайшим гласом Святы́й Бо́же, Святы́й Кре́пкий, Святы́й Безсме́ртный, поми́луй нас.
И по еже: Сподо́би, Го́споди: глаголем настоящия стихиры самогласны преподобнаго Иоанна Дамаскина.
Стихиры, глас 1:
Ка́я жите́йская сла́дость пребыва́ет печа́ли неприча́стна?/ Ка́я ли сла́ва стои́т на земли́ непрело́жна?/ Вся се́ни немощне́йша, вся со́ний преле́стнейша:/ еди́нем мгнове́нием, и сия́ вся смерть прие́млет./ Но во све́те, Христе́, лица́ Твоего́,/ и в наслажде́нии Твоея́ красоты́,/ его́же избра́л еси́ упоко́й, я́ко Человеколю́бец.
Стих: Госпо́дь пасе́т мя/ и ничто́же мя лиши́т.
Де́лом, Спа́се мой, показу́еши,/ я́ко Ты еси́ всех воскресе́ние,/ сло́вом, Сло́ве, Ла́заря из ме́ртвых воскреси́л еси́:/ тогда́ вереи́ сотро́шася, врата́ же а́дова смути́шася:/ тогда́ сон смерть показа́ся челове́ческая./ Но во е́же спасти́ Твое́ созда́ние,/ а не во е́же осуди́ти прише́дый,/ его́же избра́л еси́, упоко́й я́ко Человеколю́бец.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Всем Предста́тельница те́плая показа́лася еси́, Богороди́тельнице,/ всех Покро́ве, держа́ва же от Бо́га прибега́ющым к Тебе́:/ в ну́ждах су́щым Помо́щница./ Пле́нным ско́рое Избавле́ние,/ Тебе́ бо Христо́с на ва́рвары положи́л есть Мсти́тельницу,/ и Засту́пницу, и Сте́ну неразруши́мую,/ и немощны́м кре́пость непребори́мую,/ и ми́ра Пода́тельницу душа́м на́шым.
Стихиры, глас 2:
Увы́ мне, яковы́й по́двиг и́мать душа́ разлуча́ющися от телесе́!/ Увы́, тогда́ коли́ко слези́т, и несть поми́луяй ю́!/ Ко а́нгелом о́чи возводя́щи, безде́льно мо́лится:/ к челове́ком ру́це простира́ющи, не и́мать помога́ющаго./ Те́мже, возлю́бленнии мои́ бра́тие,/ помы́сливше на́шу кра́ткую жизнь,/ преста́вленному упокое́ния от Христа́ про́сим,/ и душа́м на́шым ве́лию ми́лость.
Стих: Ко Го́споду, внегда́ скорбе́ти ми, воззва́х,/ и услы́ша мя.
Прииди́те, у́зрим вси чу́до па́че ума́,/ и́же вчера́ с на́ми сый,/ ны́не лежи́т мертв./ Прииди́те, позна́ем, я́ко пома́ле в погреба́льная пови́ты и мы сконча́емся:/ и́же ми́ры помазу́ющиися благоуха́нными, лежа́т смра́дни:/ ка́ко зла́том крася́щиися, не укра́шени лежа́т и безъобра́зни./ Те́мже, возлю́бленнии мои́ бра́тие, разуме́вше на́шу кра́ткую жизнь,/ преста́вленному упокое́ния у Христа́ про́сим,/ и душа́м на́шым ве́лию ми́лость.
Стих: Го́споди, изба́ви ду́шу мою́/ от усте́н непра́ведных.
Спаса́йся су́етный животе́./ Спаса́йтеся, вси дру́зи, сро́дницы же и ча́да:/ в путь бо иду́, и́мже никогда́же ше́ствовах./ Но прииди́те, помяну́вше мою́ к вам любо́вь,/ после́дуйте, и гро́бу предади́те бре́ние мое́ сие́:/ и иму́щаго суди́ти смире́нную мою́ ду́шу,/ со слеза́ми Христа́ моли́те,/ я́ко да огня́ и́змет мя неугаси́маго.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Непроходи́мая врата́, та́йно запеча́тствованная,/ Благослове́нная Богоро́дице Де́во,/ приими́ моле́ния на́ша,/ и принеси́ Твоему́ Сы́ну и Бо́гу,/ да спасе́т Тобо́ю ду́шы на́шя.
Стихиры, глас 3:
Се лежу́, возлю́бленнии мои́ бра́тие,/ посреде́ всех молчали́в и безгла́сен:/ уста́ упраздни́шася, язы́к преста́ и устне́ препя́шася:/ ру́це связа́стеся, и но́зе сплето́стеся:/ зрак измени́ся, о́чи угасо́сте, и не ви́дят рыда́ющих:/ слух не прие́млет печа́лующих во́пля,/ нос не уха́ет кади́льнаго благово́ния:/ и́стинная же любо́вь никогда́же умерщвля́ется./ Те́мже молю́ всех зна́емых, и друго́в мои́х,/ помяни́те мя пред Го́сподем,/ я́ко да в День су́дный обря́щу ми́лость на суди́щи о́ном стра́шном.
Стих: Возведо́х о́чи мои́ в го́ры,/ отню́дуже прии́дет по́мощь моя́.
Вся суета́ челове́ческая,/ ели́ка не пребыва́ют по сме́рти:/ не пребыва́ет бога́тство, ни сше́ствует сла́ва:/ прише́дши бо сме́рти, сия́ вся потреби́шася./ Те́мже Христу́ Безсме́ртному возопии́м:/ преста́вленнаго от нас упоко́й,/ иде́же всех есть веселя́щихся жили́ще.
Стих: Госпо́дь сохрани́т вхожде́ние твое́/ и исхожде́ние твое́ от ны́не и до ве́ка.
Челове́цы, что всу́е мяте́мся?/ Тече́ние ско́рое и жесто́кое есть, и́мже тече́м:/ дым есть житие́, па́ра, и пе́пел,/ и прах по ма́ле бу́дем, и я́ко цвет увяда́ем./ Те́мже Христу́ Безсме́ртному возопии́м:/ преста́вльшагося от нас упоко́й,/ иде́же всех есть веселя́щихся жили́ще.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Приста́нище Тя спасе́ния и́мамы, Богоро́дице Де́во,/ в пучи́не жития́ обурева́емии./ Те́мже моли́ от Тебе́ безсе́менно вопло́щшагося Бо́га,/ и неизрече́нно вочелове́чшагося,/ спасти́ ду́шы на́шя.
Стихиры, глас 4:
Где есть мирско́е пристра́стие?/ Где есть привре́менных мечта́ние?/ Где есть зла́то и сребро́?/ Где есть рабо́в мно́жество и молва́?/ Вся персть, вся пе́пел, вся сень./ Но, прииди́те, возопии́м Безсме́ртному Царю́:/ Го́споди, ве́чных Твои́х благ сподо́би преста́вльшагося от нас,/ упокоя́я его́ в нестаре́ющемся блаже́нстве Твое́м.
Стих: Возвесели́хся о ре́кших мне:/ в дом Госпо́день по́йдем.
На́йде смерть я́ко хи́щник,/ на́йде тли́тель, и низложи́ мя,/ на́йде и не су́ща мя показа́:/ на́йде, и земля́ сый, я́ко не сый лежу́./ Вои́стинну со́ние, вои́стинну привиде́ние есмы́ челове́цы./ Но прииди́те, возопии́м Безсме́ртному Царю́:/ Го́споди, ве́чных Твои́х благ сподо́би преста́вльшагося от нас,/ упокоя́я его́ в нестаре́емей жи́зни.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Еди́на чи́стая и непоро́чная Де́во,/ Бо́га безсе́менно ро́ждшая,/ моли́ спасти́ся душа́м на́шым.
Стихиры, глас 5:
Помяну́х проро́ка вопию́ща:/ аз есмь земля́ и пе́пел./ И па́ки разсмотри́х во гробе́х, и ви́дех ко́сти обнаже́ны и рех:/ у́бо кто есть царь, или́ во́ин,/ или́ бога́т, или́ убо́г,/ или́ пра́ведник, или́ гре́шник,/ но упоко́й, Го́споди, с пра́ведными раба́ Твоего́.
Стих: Стоя́ще бя́ху но́ги на́шя/ во дво́рех твои́х, Иерусали́ме.
Ты рекл еси́, ве́руяй в Тя, Христе́,/ сме́рти не у́зрит:/ но я́коже Аз от Све́та во Свет, Свет есмь,/ та́ко просвети́теся и во Мне в сла́ве Мое́й:/ и́стинный бо Бог сый приидо́х спасти́,/ и́же во и́стинном Правосла́вии чту́щих Мя еди́наго Го́спода Бо́га,/ сугу́ба естество́ма пло́ти и Божества́,/ еди́наго же ипоста́сию./ Тем си́це Тя испове́давшаго ве́рнаго Твоего́ раба́,/ во све́те лица́ Твоего́ со святы́ми упоко́й, я́ко Человеколю́бец.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Тебе́ мо́лимся,/ я́ко Бо́жии Ма́тери,/ Благослове́нная, моли́ спасти́ся нам.
Стихиры, глас 6:
Нача́ток мне и соста́в,/ зижди́тельное Твое́ бысть повеле́ние:/ восхоте́в бо от неви́димаго же и ви́димаго,/ жи́ва мя соста́вити естества́:/ от земли́ те́ло мое́ созда́л еси́,/ дал же ми еси́ ду́шу Боже́ственным Твои́м и животворя́щим вдохнове́нием./ Те́мже, Христе́, раба́ Твоего́ в стране́ живу́щих,/ и в селе́ниих пра́ведных упоко́й.
Стих: К Тебе́ возведо́х о́чи мои́/ живу́щему на Небеси́.
Поче́л еси́ о́бразом Твои́м/ рук Твои́х, Сло́ве, созда́ние:/ живописа́в бо в веще́ственном зра́це,/ у́мнаго существа́ подо́бие,/ его́же и прича́стника мя поста́вил еси́,/ положи́в на земли́ нача́льствовати тва́рем самовла́стием./ Те́мже, Спа́се, раба́ Твоего́ во стране́ живы́х,/ и в ски́ниях пра́ведных упоко́й.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Бо́га из Тебе́ вопло́щшагося позна́хом,/ Богоро́дице Де́во:/ Того́ моли́ спасти́ся душа́м на́шым.
Стихиры, глас 7:
По о́бразу Твоему́ и по подо́бию/ созда́вый в нача́ле челове́ка,/ в раи́ поста́вил еси́ владе́ти Твои́ми тва́рьми:/ за́вистию же диа́волею прельсти́вся, сне́ди прича́стися,/ за́поведей Твои́х престу́пник быв./ Те́мже па́ки в зе́млю, от нея́же взят бысть,/ осуди́л еси́ возврати́тися, Го́споди,/ и испроси́ти [у Тебе́] упокое́ния.
Стих: Коль возлю́бленна селе́ния Твоя́,/ Го́споди сил!
Разреша́ет вся́кую печа́ль смерть,/ пода́нная естеству́ Ада́мову:/ и́бо тле́нни бы́хом, сне́ди причасти́вшеся:/ позна́ем у́бо, я́ко созда́вшеся от земли́,/ па́ки прах и пе́пел бу́дем,/ я́коже бе́хом пре́жде./ Те́мже со гла́сом плаче́вным Созда́теля умо́лим,/ преста́вльшемуся осла́бу дарова́ти и ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Тя, Богоро́дице, сте́ну неруши́мую, и наде́жду, ве́рнии, и́мамы,/ те́мже не преста́й, Влады́чице, моли́ти/ о и́же ве́рою усо́пших Твои́х рабе́х,/ осла́бе им бы́ти в Суде́,/ егда́ ся́дет Сын Твой и Бог:/ естество́ бо Ты ве́си,/ я́ко вся́кими грехи́ ны́не смеси́ся,/ да Тя вси ублажи́м.
Стихиры, глас 8:
Пла́чу и рыда́ю,/ егда́ помышля́ю смерть,/ и ви́жду во гробе́х лежа́щую,/ по о́бразу Бо́жию созда́нную на́шу красоту́,/ безъобра́зну, безсла́вну,/ не иму́щую ви́да./ О чудесе́,/ что сие́ е́же о нас бысть та́инство?/ Ка́ко преда́хомся тле́нию?/ Ка́ко сопряго́хомся сме́рти,/ вои́стинну Бо́га повеле́нием,/ я́коже пи́сано есть,/ подаю́щаго преста́вльшемуся упокое́ние.
Тле́нни ка́ко бы́хом,/ нетле́нный о́браз носи́вше,/ и дунове́нием Боже́ственным безсме́ртную прие́мше ду́шу,/ смеше́ни бы́вше, я́коже пи́сано есть?/ Ка́ко же преступи́хом Бо́жия повеле́ния?/ О чудесе́,/ ка́ко снедь жи́зни оста́вльше,/ ядо́хом снедь, хода́таицу го́рькия сме́рти?/ Ка́ко прельще́ни лиши́хомся жи́зни Боже́ственныя?/ Про́чее возопии́м Христу́:/ Его́же преста́вил еси́,/ во дво́рех Твои́х всели́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Покро́в Твой, Богоро́дице Де́во,/ врачевство́ есть духо́вное:/ в той бо прибега́юще,/ душе́вных неду́гов избавля́емся.
Стихиры, глас 8. Самогласны:
Безме́рна есть блу́дно живу́щым му́ка,/ скре́жет зу́бный, и плачь неуте́шимый,/ мрак несвети́мый, и тьма кроме́шняя,/ и червь неусыпа́емый,/ сле́зы недействи́тельны, и суд без ми́лости./ Сего́ ра́ди пре́жде конца́ возопии́м, глаго́люще:/ Влады́ко Христе́, его́же избра́л еси́,/ со избра́нными Твои́ми упоко́й.
Подобен:
Возгласи́т труба́, и я́ко от сна ме́ртвии воста́нут,/ живо́т небе́сный прия́ти жела́юще,/ наде́яшася на Тя Созда́теля и Го́спода:/ не осуди́ у́бо раба́ Твоего́,/ сме́ртен бо, Безсме́ртне, нас ра́ди был еси́./ Сего́ ра́ди пре́жде конца́ возопии́м, глаго́люще:/ Влады́ко Христе́, его́же избра́л еси́,/ со избра́нными Твои́ми упоко́й.
Се и стихи́и, не́бо и земля́ изменя́тся,/ и вся тварь в нетле́ние облече́тся:/ разруши́тся тле́ние, и поги́бнет тьма в прише́ствии Твое́м:/ и́маши бо па́ки приити́ со сла́вою, я́коже пи́сано есть,/ возда́ти кому́ждо, я́коже соде́ла./ Влады́ко Христе́, его́же избра́л еси́,/ со избра́нными Твои́ми упоко́й.
Слава, глас 6.
Сла́ва Отцу́ и Сы́ну и Свято́му Ду́ху.
Прииди́те и ви́дите вси стра́нное и гро́зное виде́ние всем познава́емое,/ о́браз ны́не ви́димый,/ и не ктому́ му́дрствуйте привре́менная./ Днесь душа́ от те́ла разлуча́ется,/ к ве́чному преставля́ема ми́ру:/ в путь бо и́дет, и́мже никогда́же ше́ствова,/ и к Судии́ Нелицеприе́мному, иде́же предстоя́т а́нгелов чи́ни./ Стра́шно бо, бра́тие мои́, суди́ще о́но,/ иде́же вси предста́нем на́зи! О́вии у́бо венчава́еми,/ о́вии же посрамля́еми./ Те́мже возопии́м к Безсме́ртному Царю́:/ егда́ и́маши испыта́ти сокрове́нная челове́ческая,/ пощади́ раба́ Твоего́,/ его́же прия́л еси́, Го́споди Человеколю́бче.
И ны́не и при́сно и во ве́ки веко́в, ами́нь.
Богородичен: Моли́твами, Христе́, ро́ждшия Тя,/ и Предте́чи Твоего́,/ апо́столов, проро́ков, иера́рхов,/ преподо́бных и пра́ведных, и всех святы́х,/ усо́пшаго раба́ Твоего́ упоко́й.
Таже: Бла́го есть испове́датися Го́сподеви, и пе́ти и́мени Твоему́, Вы́шний: возвеща́ти зау́тра ми́лость Твою́ и и́стину Твою́ на вся́ку нощь.
Святы́й Бо́же, Святы́й Кре́пкий, Святы́й Безсме́ртный, поми́луй нас. (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Возглас: Я́ко Твое́ есть Ца́рство, и си́ла и сла́ва, Отца́, и Сы́на, и Свята́го Ду́ха, и ны́не и при́сно, и во ве́ки веко́в.
Чтец: Аминь.
И по возгласе поем тропари, глас 5:
Поко́й, Спа́се наш,/ с пра́ведными раба́ Твоего́,/ и сего́ всели́ во дворы́ Твоя́,/ я́коже есть пи́сано,/ презира́я я́ко Благ прегреше́ния его́,/ во́льная и нево́льная,/ и вся я́же в ве́дении и не в ве́дении, Человеколю́бче.
Сла́ва Отцу́ и Сы́ну и Свято́му Ду́ху,/ и ны́не и при́сно и во ве́ки веко́в, ами́нь.
Богородичен: От Де́вы возсия́вый ми́ру Христе́ Бо́же,/ сы́ны све́та То́ю показа́вый, поми́луй нас.
Таже ектениа:
Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй. (трижды).
Еще́ мо́лимся о упокое́нии души́ усо́пшаго раба́ Бо́жия диа́кона (имярек) и о е́же прости́тися ему́ вся́кому прегреше́нию во́льному же и нево́льному.
Лик: Го́споди, поми́луй. (трижды).
Я́ко да Госпо́дь Бог учини́т ду́шу его́, иде́же пра́веднии упокоя́ются.
Лик: Го́споди, поми́луй. (трижды).
Ми́лости Бо́жия, Ца́рства Небе́снаго и оставле́ния грехо́в его́ у Христа́, Безсме́ртнаго Царя́ и Бо́га на́шего, про́сим.
Лик: Пода́й, Го́споди.
Го́споду помо́лимся.
Го́споди, поми́луй.
Священник глаголет молитву: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т ми́ру Твоему́ дарова́вый: Сам, Го́споди, упоко́й ду́шу усо́пшаго раба́ Твоего́ диа́кона (имярек), в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное им сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пшаго раба́ Твоего́ диакона (имярек), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Лик: Ами́нь.
И по возгласе предстоятель чтет молитву разрешительную по обычаю, либо сию:
И́же жили́ще име́яй не́бо и вся соблюда́яй на земли́, Сам ве́си де́лание сконча́вшагося бра́та на́шего, диа́кона (имярек), е́же в дому́ Твое́м, Тобо́ю укрепля́емь, с на́ми соверша́ше, сего́ ра́ди пода́ждь, Бла́же, ему́ во све́те пребыва́ти и во стране́ пра́ведных, проща́я ему́ грехи́ во́льныя и нево́льныя, и нас сподобля́я во све́те повеле́ний Твои́х жи́ти, до́ндеже и мы от се́ни сея́ изы́дем.
Я́ко покланя́емо есть всесвято́е и́мя Твое́, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.
И бывает целование, лику поющу стихиры, глас 2:
Приидите, последнее целование дадим, братие, умершему: И прочая, якоже преднаписашася в последовании мирском. Слава: Зряще мя безгласна: И ныне: Молитвами Рождшия Тя, Христе:
Прииди́те, после́днее целова́ние/ дади́м бра́тие уме́ршему,/ благодаря́ще Бо́га:/ се́й бо оскуде́ от сро́дства своего́,/ и ко гро́бу тщи́тся не ктому́ пеки́йся /о су́етных, и о многостра́стной пло́ти./ Где́ ны́не сро́дницы же и дру́зи?/ Се́ разлуча́емся./ Его́же упоко́ити, Го́споду помо́лимся.
Ко́е разлуче́ние, о бра́тие? Ки́й пла́чь?/ Ко́е рыда́ние в настоя́щем часе́?/ Прииди́те у́бо целу́йте бы́вшаго вма́ле с на́ми:/ предае́тся бо гро́бу,/ ка́менем покрыва́ется,/ во тьму́ вселя́ется,/ с ме́ртвыми погреба́ется,/ и все́х сро́дников и друго́в ны́не разлуча́ется./ Его́же упоко́ити, Го́споду помо́лимся.
Ны́не жите́йское лука́вое разруша́ется торжество́ суеты́:/ ду́х бо оскуде́ от селе́ния, бре́ние очерни́ся,/ сосу́д раздра́ся, безгла́сен, нечу́ствен, ме́ртвен, недви́жимь./ Его́же посыла́юще гро́бу, Го́споду помо́лимся,/ да́ти сему́ во ве́ки упокое́ние.
Яко́в живо́т на́ш е́сть? Цве́т, и ды́м, и роса́ у́тренняя вои́стинну./ Прииди́те у́бо, у́зрим на гробе́х я́сно, где́ добро́та теле́сная?/ Где́ ю́ность? Где́ су́ть очеса́, и зра́к плотски́й:/ вся́ увядо́ша я́ко трава́, вся́ потреби́шася./ Прииди́те ко Христу́ припаде́м со слеза́ми.
Ве́лий пла́чь и рыда́ние, ве́лие воздыха́ние, и ну́жда,/ разлуче́ние души́, а́д и поги́бель,/ привре́менный живо́т, се́нь непостоя́нная,/ со́н преле́стный: безвременномечта́нен тру́д жития́ земна́го./ Дале́че отбежи́м мирска́го вся́каго греха́, да небе́сная насле́дим.
Ви́дяще предлежа́ща ме́ртва,/ о́браз восприи́мем вси́ коне́чнаго часа́:/ се́й бо отхо́дит я́ко ды́м от земли́,/ я́ко цве́т отцвете́,/ я́ко трава́ посече́ся,/ вре́тищем повива́емь,/ земле́ю покрыва́емь./ Его́же неви́дима оста́вивше, Христу́ помо́лимся,/ да́ти сему́ во ве́ки упокое́ние.
Прииди́те вну́цы Ада́мовы, уви́дим на земли́ пове́рженнаго,/ по о́бразу на́шему все́ благоле́пие отлага́юща,/ разруше́на во гро́бе гно́ем, червьми́, тьмо́ю иждива́ема, земле́ю покрыва́ема./ Его́же неви́дима оста́вльше, Христу́ помо́лимся,/ да́ти во ве́ки сему́ упокое́ние.
Егда́ душа́ от те́ла и́мать ну́ждею восхи́титися стра́шными А́нгелы,/ все́х забыва́ет сро́дников и зна́емых,/ и пече́тся о бу́дущих суди́лищей стоя́нии, я́же суеты́, и многотру́дныя пло́ти разреше́нии:/ тогда́ Судию́ моля́ще, вси́ помо́лимся,/ да прости́т Госпо́дь, я́же соде́ла.
Прииди́те бра́тие, во гро́бе у́зрим пе́пел и пе́рсть, из нея́же созда́хомся./ Ка́мо ны́не и́дем? Что́ же бы́хом?/ Ки́й убо́г или́ бога́т? или́ ки́й влады́ка?/ Ки́й же свобо́дь? И не вси́ ли пе́пел?/ Добро́та лица́ согни́, и ю́ности ве́сь цве́т увяди́ сме́рть.
Вои́стинну суета́ и тле́ние,/ вся́ жите́йская, ви́ды, и безсла́вная:/ вси́ бо исчеза́ем, вси́ у́мрем,/ ца́рие же и кня́зи,/ судии́ и наси́льницы,/ бога́тии и убо́зии,/ и все́ естество́ челове́ческое:/ ны́не бо, и́же иногда́ в житии́, во гро́бы верга́ются,/ и́хже да упоко́ит Госпо́дь, помо́лимся.
Вси́ теле́снии ны́не орга́ны пра́здни зря́тся,/ и́же пре́жде ма́ла дви́жими бя́ху,/ вси́ недействи́тельни, ме́ртви, нечу́вственни:/ о́чи бо заидо́ша, связа́стеся но́зе,/ ру́це безмо́лвствуете, и слу́х с ни́ми:/ язы́к молча́нием заключи́ся, гро́бу предае́тся./ Вои́стинну суета́ вся́ челове́ческая.
Спаса́й наде́ющыяся на тя́,/ Ма́ти незаходи́маго со́лнца Богороди́тельнице:/ умоли́ моли́твами твои́ми преблага́го Бо́га,/ упоко́ити, мо́лимся, ны́не преста́вльшагося,/ иде́же упокоева́ются пра́ведных ду́си:/ Боже́ственных бла́г насле́дника покажи́,/ во дво́рех пра́ведных,/ в па́мять, всенепоро́чная, ве́чную.
Сла́ва, гла́с 6: Сла́ва Отцу́ и Сы́ну и Свято́му Ду́ху.
Зря́ще мя́ безгла́сна,/ и бездыха́нна предлежа́ща,/ воспла́чите о мне́ бра́тие и дру́зи,/ сро́дницы и зна́емии:/ вчера́шний бо де́нь бесе́довах с ва́ми,/ и внеза́пу на́йде на мя́ стра́шный ча́с сме́ртный:/ но прииди́те вси́ лю́бящии мя́,/ и целу́йте мя́ после́дним целова́нием:/ не ктому́ бо с ва́ми похожду́,/ или́ собесе́дую про́чее./ к Судии́ бо отхожду́,/ иде́же не́сть лицеприя́тия:/ ра́б бо и влады́ка вку́пе предстоя́т,/ ца́рь и во́ин, бога́тый и убо́гий/ в ра́внем досто́инстве:/ ки́йждо бо от свои́х де́л,/ или́ просла́вится, или́ постыди́тся./ Но прошу́ все́х и молю́,/ непреста́нно о мне́ моли́теся Христу́ Бо́гу,/ да не низведе́н бу́ду по грехо́м мои́м,/ на ме́сто муче́ния:/ но да вчини́т мя́, иде́же све́т живо́тный.
И ны́не, богоро́дичен, гла́с то́йже: И ныне, и присно и вовеки веков, аминь.
Моли́твами ро́ждшия Тя́ Христе́,/ и Предте́чи Твоего́,/ апо́столов, проро́ков, иера́рхов,/ преподо́бных, и пра́ведных, и все́х святы́х,/ усо́пшаго раба́ Твоего́ упоко́й.
Слава, и ныне: И отпуст:
Диакон: Прему́дрость.
Священник: Пресвята́я Богоро́дице, спаси́ нас.
Хор: Честне́йшую херуви́м и сла́внейшую без сравне́ния серафи́м, / без истле́ния Бо́га Сло́ва ро́ждшую, / су́щую Богоро́дицу Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Хор: Сла́ва Отцу́ и Сы́ну и Свято́му Ду́ху, ны́не и при́сно, и во ве́ки веко́в. Ами́нь.
Го́споди, поми́луй (трижды).
Благослови́.
Священник: Воскресы́й из ме́ртвых, Христо́с И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, преподо́бных и богоно́сных оте́ц на́ших, и всех святы́х, ду́шу от нас преста́вльшагося раба́ Своего́ диа́кона (имярек), в селе́ниих пра́ведных учини́т, в не́дрех Авраа́ма упоко́ит, и с пра́ведными сопричте́т, и нас поми́лует, я́ко Благ и Человеколю́бец. Ами́нь.
Диакон: Во блаже́нном успе́нии ве́чный поко́й пода́ждь, Го́споди, усо́пшему рабу́ Твоему́ диа́кону (имярек), и сотвори́ ему́, ве́чную па́мять.
Лик: Ве́чная па́мять. (трижды).
Отходяще же ко гробу поют священницы: Святый Боже: И погребаются мощи. И бывает лития.
Текст последования утвержден на заседании Священного Синода 13 октября 2022 года (журнал № 105).
Назад к списку
