Князьям Феодору Смоленскому и чадам его Давиду и Константину Ярославским (тропари, кондаки, молитвы и величание)

Тропарь святых, глас 4:

От ю́ности ва́шея Христо́ве любви́ прилепи́вшеся, святи́и,/ усе́рдно зако́н и оправда́ния Того́ сохрани́сте,/ отону́дуже и чуде́сными дарова́ньми обогати́вшеся,/ исцеле́ния источа́ете,/ Фео́доре, Дави́де и Константи́не,/ о ве́рою вас почита́ющих,/ моли́те Христа́ Бо́га,// спасти́ся душа́м на́шим.

Тропарь на преставление князя Феодора, глас 4:

Я́ко цели́тель преизря́ден и каза́тель благоприя́тен / мирски́й мяте́ж оста́вил еси́,/ и, крест свой на ра́мо взем, / боже́ственным житие́м пожи́л еси́, и воздержа́нием пло́ти украси́лся еси́ / к тебе́ притека́ющим сосу́д избра́нный показа́вся, всеблаже́нне Феодо́ре, / воспева́ющих твою́ па́мять в псалме́х и пе́снех, преподо́бне,// моли́ся о душа́х на́ших.

Ин тропарь князя Феодора, глас 4:

Измла́да яви́лся еси́, богому́дре кня́же, / боже́ствен сосу́д невозбра́нен Бо́гови, / ны́не то́чиши нам многоцеле́ния, / вся е́реси потопля́я и спаса́я при́сно свой град, / и всех ве́рных сохраня́я, и неви́димо от ви́димых враг, / ве́рою тя мо́лим, преподо́бне о́тче наш, кня́же Фео́доре, // моли́ спасти́ся душа́м на́шим.

Тропарь на перенесение мощей святых, глас 8:

Я́ко зве́зды многосве́тлыя от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ во пло́ти я́ко А́нгели на земли́ показа́стеся,/ поще́нием насажде́ни бы́сте,/ я́ко древа́ при вода́х воздержа́ния,/ напое́ни струя́ми сле́з ва́ших, и скве́рну омы́сте./ Сего́ ра́ди яви́стеся прия́телища Бо́жия Ду́ха,/ Фео́доре, и Дави́де, и Константи́не,// моли́те Христа́ Бо́га, спасти́ся душа́м на́шим.

Ин тропарь, глас 4:

Я́ко апо́столом сприча́стницы и вра́чеве предо́брии,/ служи́телие богоприя́тнии, / па́мяти ва́шей боже́ственней притека́ющим, / святи́и богому́дрии, достоблаже́ннии, благочести́вии кня́зие, / новоявле́ннии чудотво́рцы Фео́доре и Дави́де, и Константи́не, / соше́дшеся любо́вию в па́мять ва́шу све́тло пра́зднуем / в пе́снех и пе́ниих, ра́дующеся Христа́ сла́вяще,/ такову́ю благода́ть дарова́вшего вам исцеле́ний, // гра́ду ва́шему Яросла́влю вели́кое утвержде́ние.

Тропарь, глас 4:

Измла́да яви́стеся святи́и, / Богому́дре Фео́доре и блаже́нне Дави́де с Константи́ном сла́вным, / Боже́ственнии сосу́ди, избра́ннии Бо́гови. / Ны́не же источа́ете нам мно́га исцеле́ния от честны́х моще́й ва́ших, / вся е́реси потопля́юще, / и спаса́юще при́сно град свой, / и всех ве́рных сохраня́юще невреди́мо / от ви́димых и неви́димых враг. / Те́мже ве́рою мо́лим вас, святи́и: / моли́те Христа́ Бо́га // в ми́ре сохрани́тися нам и спасти́ ду́ши на́ша.

Ин тропарь, глас 4:

И́же от ю́ности Христо́вы любве́ / прилепи́вшеся усе́рдно, святи́и / зако́ны и оправда́ния Того́ сохраня́юще, / отню́дуже и чуде́сными дарова́нии обогати́стеся, / исцеле́ния источа́ете и́же ве́рою вас почита́ющих, / те́мже моли́те Христа́ Бо́га // спасти́ся душа́м на́шим.

Кондак на преставление, глас 4:

Яви́ся ве́лие со́лнце Христо́ве Це́ркви,/ просвеща́я уче́нием светлостьми́, всече́стне,/ я́ко черпа́лом златы́м от Кла́дязя неиско́паннаго чуде́с поче́рпл еси́,/ от Исто́чника неистощи́маго, всеблаже́нне Фео́доре,// и ны́не о всех мо́лиши, да улучи́м грехо́в проще́ние.

Ин кондак, глас 1:

Многому́дренне пресели́вся, преподо́бне кня́же Фео́доре, в град присноцвету́щ,/ яви́лся еси́ я́ко многосве́тлая звезда, в ми́ре сия́я,/ в поще́нии испра́вив жизнь свою́,// ны́не получи́л еси́ живо́т ве́чный на Небесе́х.

Кондак на перенесение мощей, глас 8:

Яви́стеся свети́льницы всесве́тлии, во пло́ти я́ко А́нгели,/ и я́ко жи́зни древеса́ ра́йская,/ поще́нием, бде́нием и ве́рою возраща́еми, процвели́ есте́/ моли́твами ва́шими, Небе́сныя благода́ти прие́мше,/ вра́чеве же кре́пцы я́вльшеся, исцеля́ете неду́гующих ду́ши,/ с ве́рою прибега́ющих к ра́це моще́й ва́ших,/ чудотво́рцы сла́внии, Фео́доре, Дави́де и Константи́не./ Моли́те Христа́ Бо́га, грехо́в оставле́ние дарова́ти,// ве́рою и любо́вию чту́щим па́мять ва́шу.

Ин кондак, на перенесение мощей, глас 8:

Я́ко свети́льницы и вра́чеве преизря́днии яви́стеся,/ ве́рныя озаря́юще светлостьми́ чуде́с ва́ших,/ во пло́ти бо на земли́ благоугоди́сте Бо́гу,/ И́же во святы́х Прославля́емому,// Его́же непреста́нно моли́те о всех нас.

Кондак, глас 8:

Богому́дренно пресели́стеся, святи́и, / во град, при́сно доброде́тельми цвету́щий, / в жи́зни сей принося́ще Бо́гови плоды́ бла́ги, / преподо́бне Фео́доре и блаже́нне Дави́де с Константи́ном сла́вным, / и яви́стеся, я́ко многоцвету́щая ра́йская древеса́ жи́зни / и я́ко многосве́тлыя зве́зды, в ми́ре сия́юще благода́тию, / в доброде́тели испра́вивше жизнь свою́, / и сего́ ра́ди получи́сте живо́т ве́чный на Небесе́х. / Те́мже благода́рственно вам зове́м: // ра́дуйтеся, всеми́рнии свети́льницы и гра́ду на́шему Яросла́влю вели́кое утвержде́ние.

Ин кондак князя Феодора, глас 1:

Многому́дренне пресели́вся, преподо́бне кня́же Фео́доре, в град цвету́щ,/ при́сно плоды́ благи́я,/ яви́лся еси́ я́ко рай, па́че жи́зни,/ я́ко многосве́тлая звезда́ в ми́ре сия́я, в поще́нии испра́вив жизнь свою́,// и ны́не Того́ получи́л еси́ живо́т ве́чный на Небесе́х.

Молитва

О уго́дницы Бо́жии, святи́и и благове́рнии кня́зи Фео́доре, Дави́де и Константи́не! Простри́те благоприя́тныя моли́твы ва́ши ко Го́споду и Созда́телю на́шему и умоли́те Его́ бла́гость дарова́ти нам (имена) вся к ве́чному спасе́нию потре́бная, та́же и к житию́ сему́ вре́менному ну́жная: ве́руем бо несомне́нно, я́ко вся возмо́жна, вам, я́ко и́стинным Его́ уго́дником. Ей, чудотво́рцы святи́и! Не посрами́те упова́ния на́шего, но моли́твами ва́шими сотвори́те нас насле́дники бы́ти Ца́рствия Христо́ва, да прославля́ем человеколю́бие в Тро́ице сла́вимаго и покланя́емаго Бо́га, Отца́ и Сы́на и Свята́го Ду́ха, и ва́ше свято́е заступле́ние, во ве́ки веко́в. Ами́нь.

Ина молитва

О вели́ции уго́дницы Бо́жии и чудотво́рцы, святи́и и благове́рнии кня́зе Фео́доре, Дави́де и Константи́не, припа́дающе к святы́м и многоцеле́бным моще́м ва́шим, мо́лим вы со смире́нием, ве́рою и любо́вию: простри́те благоприя́тные моли́твы ва́ша ко Го́споду и Созда́телю на́шему, и умоли́те Его́ бла́гость, дарова́ти нам вся ну́жная к житию́ сему́ вре́менному, и потре́бная к ве́чному спасе́нию на́шему: ве́руем бо несумне́нно, я́ко вся возмо́жна вам, я́ко и́стинным Его́ уго́дником. Сего́ ра́ди про́сим вы: испроси́те нам у Царя́ ца́рствующих и Го́спода госпо́дствующих стра́ждущую страну́ Росси́йскую от лю́тых безбо́жник и вла́сти их Госпо́дь да свободи́т, ве́рных рабо́в Его́, в ско́рби и печа́ли день и нощь вопию́щих к Нему́, многоболе́зный вопль да услы́шит и да изведе́т от поги́бели живо́т наш. Испроси́те престо́льным гра́дом, гра́ду на́шему и всем гра́дом Росси́йским благополу́чие, изоби́лие и от злых сохране́ние, всем же правове́рным лю́дем, почита́ющим вас, и на поклоне́ние моще́м ва́шим святы́м приходя́щим, ми́лость Бо́жию и благи́х проше́ний ско́рое исполне́ние. Ей, чудотво́рцы святи́и, не посрами́те упова́ния на́шего, но моли́твами ва́шими сотвори́те нас насле́дники бы́ти Ца́рствия Христо́ва: да прославля́ем человеколю́бие в Тро́ице сла́вимаго и поклоня́емаго Бо́га, Отца́ и Сы́на, и Свята́го Ду́ха, и ва́ше свято́е заступле́ние во ве́ки веко́в. Ами́нь.

Величание

Велича́ем вас,/ святи́и благове́рнии Фео́доре, и Дави́де, и Константи́не,/ и чтим святу́ю па́мять ва́шу,/ вы бо мо́лите за нас // Христа́ Бо́га на́шего.

Назад к списку