Икона Услышательница (тропарь, кондак, молитва и величание)
Тропарь, глас 3:
Твоего́ предста́тельства увере́ние и милосе́рдия Твоего́ явле́ние ико́на Твоя́ «Услы́шательница» на́м, Влады́чице, показа́ся; пред не́юже ду́ши на́ша в моли́тве излива́ем и ве́рою Тебе́ вопие́м: воззри́, Милосе́рдая, на лю́ди Твоя́, вся́ ско́рби на́ша и печа́ли утоли́, утеше́ние благо́е в сердца́ на́ша низпосли́, моле́ния на́ша ско́ро услы́ши и спасе́ние ве́чное душа́м на́шим, Пречи́стая, испроси́.
Кондак, глас 3:
Дне́сь, Влады́чице, преподо́бный Косма́ к ико́не Твое́й с мольбо́ю припаде́ и Тобо́ю ско́ро услы́шан бы́сть, непреста́нно Тебе́ хвалу́ воздая́. И на́м, под свяще́нный покро́в Тво́й прибега́ющим, да да́рует Госпо́дь оставле́ние грехо́в и ве́лию ми́лость.
Молитва
Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния // всем с ве́рою притека́ющим.
Назад к списку
