Икона Купятицкая (тропарь, кондак, молитва и величания)
Тропари, глас 4:
Дне́сь ра́достно пра́зднуем па́мять явле́ния / чудотво́рнаго о́браза Твоего́ в Кресте́, Влады́чице,/ и́же щи́т яви́ся Ве́ры Правосла́вныя,/ укрепля́яй и спаса́яй во дни́ тя́жких испыта́ний / с ве́рою притека́ющих к Тебе́./ Си́це приле́жно мо́лимся: // бу́ди всегда́ на́ша Засту́пница.
Кондак, глас 8:
Взбра́нной Воево́де победи́тельная,/ прия́вши святу́ю ико́ну Твою́ в Кресте́ Купя́тицкую,/ благода́рственная воспису́ем Ти раби́ Твои́, Богоро́дице./ Непреста́нно ро́ду христиа́нскому чудоде́ющая,/ Ты еси́ вои́стину Засту́пница на́ша усе́рдная,/ от враг ви́димых и неви́димых ско́ро избавля́ющи./ Сего́ ра́ди вы́ну прославля́ем Тя и уми́льными гла́сы зове́м: // ра́дуйся, Неве́сто Неневе́стная.
Ин кондак, глас 8:
Мно́гими чудесы́ просла́ви Госпо́дь це́рковь Купя́тицкую Твое́ю ико́ною, Богоро́дице: все́м бо предста́тельствуеши, Блага́я, прибега́ющим с ве́рою в Свяще́нный Тво́й Покро́в. Ина́го у́бо не иму́ще гре́шнии в беда́х и ско́рбех при́снаго избавле́ния, обремене́ннии грехми́ мно́гими, ра́зве Тебе́, Ма́ти Бо́га Вы́шняго, вопие́м Ему́.
Молитва
О, Преблагослове́нная Влады́чице, всемо́щная Засту́пнице, непосты́дное на́ше Упова́ние! Приими́ хвале́бное и благода́рственное пе́ние на́с, недосто́йных ра́б Твои́х, и вознеси́ моли́твы на́ша ко Престо́лу Сы́на и Бо́га Твоего́, да ми́лостив бу́дет непра́вдам на́шим, проба́вит бла́гость Свою́ чту́щим Всечестно́е и́мя Твое́ и с ве́рою и любо́вию поклоня́ющимся чудотво́рному о́бразу Твоему́. Сохрани́ зе́млю на́шу от вся́кия беды́, посли́ ми́р лю́дем на земли́, собери́ вся́ христиа́ны во еди́но ста́до пра́во сла́вящих Бо́га в Тро́ице Еди́наго. Утверди́ на́с все́х в Ве́ре Христо́ве и в усе́рдии к Це́ркве Правосла́вней. Вложи́ в сердца́ на́ша ду́х стра́ха Бо́жия, благоче́стия и смире́ния. В напа́стех терпе́ние на́м пода́ждь, во благоде́нствии воздержа́ние, к бли́жним любо́вь, ко врага́м всепроще́ние, в до́брых де́лех преуспе́яние. Изба́ви на́с от вся́каго искуше́ния и от окамене́ннаго нечу́вствия. В стра́шный де́нь Суда́ сподо́би на́с хода́тайством Твои́м ста́ти одесну́ю Сы́на Твоего́ Христа́ Бо́га на́шего. Ему́же подоба́ет вся́кая сла́ва, че́сть и поклоне́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния // всем с ве́рою притека́ющим.
Ино величание
Велича́ем Тя,/ Пресвята́я Де́во,/ и почита́ем о́браз Твой в Кресте́,/ его́же в Купя́тицех // мно́гими чудесы́ просла́вила еси́.
Назад к списку
