Икона Аксайская (тропарь, кондак, молитва и величание)
Тропарь, глас 4:
Днесь лику́ет земля́ Донска́я, / воспева́я о́браз Богома́тери, / явле́нный во гра́де Акса́е, / и с наде́ждою упова́я на по́мощь Засту́пницы, / взыва́ет со умиле́нием: / бу́ди нам Путеводи́тельницей в Ца́рствие Бо́жие / и умоли́ Сы́на Твоего́ – Христа́ Бо́га на́шего, / да покры́ет грехи́ людски́я свое́ю ми́лостию // и спасе́т ду́ши на́ша.
Кондак, глас 6:
Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице. / Ты нам помози́: / на Тебе́ наде́емся и Тобо́ю хва́лимся, / Твои́ бо есмы́ раби́, // да не постыди́мся.
Молитва
Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния // всем с ве́рою притека́ющим.
Назад к списку
