Икона Сладкое лобзание (тропарь, кондак, молитва и величание)
Тропарь, глас 7:
Одержа́щей е́реси, / о честне́й ико́не Твое́й, Де́во, / я́ве промышля́еши: / мореше́ствием Твое́й оби́тели / я́ко дар досто́ин приноша́еши. / Сию́ же мы Сладколю́бящую пра́ве нарица́юще, // Тя ублажа́ем.
Кондак, глас 8:
И́же в хр́аме и оби́тели Твое́й приходя́щия Ти / и богоуго́дно спаси́тельная гоня́щия / и почита́ющия Твой святы́й о́браз, / сим да́руй, Де́во, Твоя́ ми́лости, / от вся́ких избавля́ши сих скорбе́й, Тебе́ вопию́щия: // ра́дуйся, Еди́на Богоневе́стная.
Молитва
Цари́це моя́ преблага́я, наде́ждо моя́ Богоро́дице, прия́телище си́рых и стра́нных предстáтельнице, скорбя́щих рáдосте, оби́димых покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стрáнна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я предстáтельницы, ни благи́я уте́шительницы, то́кмо Тебе́, о Богомáти, я́ко да сохрани́ши мя и покры́еши во ве́ки веко́в. Ами́нь.
Величание
Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния // всем с ве́рою притека́ющим.
Назад к списку
